1 SAMUEL 22 - KA BAIBL

¹ U Dabid te, namar kata, u la leit noh nangta, bad u la phet noh sha ka krem Adullam: te haba ki hynmen jong u bad baroh ka ïing u kpa jong u ki la ïohsngew ïa kata, ki la ïaleit hiar noh shato sha u.

² Bad uwei uwei baroh uba ha ka jynjar, bad uwei uwei baroh uba dap ram, bad uwei uwei baroh uba la kthang la ka mynsiem, ki la ïalum lang sha u; te u la long rangbah halor jong ki: te ki la don hangta lem bad u kumba sawspah ki rangbah.

³ Te u Dabid u la leit noh nangta sha Mispeh ri Moab: bad u la ong ha u syiem ka Moab, “Nga kyrpad ïa me, to shah ïa u kpa jong nga bad ïa ka kmie jong nga ban wan shong bad phi, tad ynda ngan ïoh tip U Blei un leh kumno ïa nga.”

⁴ Te u la ïalam ïa ki ha khmat u syiem ka Moab: bad ki la shong lem bad u baroh ki sngi ba u Dabid u la don ha kata ka kut.

⁵ Te u Gad u nongïathuhlypa u la ong ha u Dabid, “Wat sah shuh ha kane ka kut; to mih noh, bad leit noh sha ka ri Judah.” Kumta, u Dabid u la mih noh, bad u la leit poi sha ka khlaw Hareth.

U Saul u pynïap ïa ki lyngdoh ka Nob

⁶ Te u Saul u la ïohsngew ba la ïoh tip shaphang u Dabid, bad kita ki briew kiba bad u: te u Saul u la shong ha Gibeah hapoh uwei u dieng ha Ramah, u da don ruh u sum ha la ka kti, bad ki shakri jong u baroh ki da ïeng baroh sawdong ïa u:

⁷ ynda kumta, u Saul u la ong ha la ki shakri kiba ïeng baroh sawdong ïa u, “To sngap mynta, phi ki Benjamin; une u khun u Jesse un ai mo ha uwei uwei baroh na phi da ki lyngkha bad ki brisoh Waiñ, un pynlong ne em ïa phi baroh ki nongïalam halor ki hajar, bad ki nongïalam halor ki spah;

⁸ ba phi baroh phi la ïabuit lem pyrshah ïa nga, bad ba ym don u ban ïathuh ha nga haba u khun jong nga u la ïateh jutang bad une u khun u Jesse, bad ba ym don uno uno na phi uba sngewsih na ka bynta jong nga, lymne uba ïathuh ha nga ba u khun jong nga u la pynkhih ïa u shakri jong nga, ban ap thap, kumba ha kane ka sngi?”

⁹ Ynda kumta, uta u Doeg u nong Edom, ïa uba la buh halor ki shakri u Saul, u la ïathuh, bad u la ong, “Nga la ïohi ïa u khun u Jesse ba u wan sha Nob, ha u Ahimelekh u khun u Ahitub.

¹⁰ Bad u la ïakylli na U Trai na ka bynta jong u, bad u la ai jingbam ïa u, bad u la ai ha u ïa kata ka waitlam u Goliath u nong Philistia.”

¹¹ Ynda kumta, u syiem u la phah khot ïa u Ahimelekh u lyngdoh, u khun u Ahitub, bad ïa baroh ka ïing u kpa jong u, kita ki lyngdoh kiba ha Nob keiñ: bad ki la ïawan baroh ha u syiem.

¹² U Saul te u la ong, “To sngap mynta, me u khun u Ahitub.” U ruh u la ong, “Nga hangne, ko kynrad.”

¹³ Te u Saul u la ong ha u, “Na ka balei phi la ïashet buit lem pyrshah ïa nga, ma me bad u khun u Jesse, ha kaba me la ai kpu ïa u, bad ka waitlam, bad ba me la ïakylli jingkylli na U Blei na ka bynta jong u, ba kumta un ïeng ïaleh ïa nga, ban ap thap, kumba ha kane ka sngi?”

¹⁴ Te u Ahimelekh u la ïathuh ha u syiem, bad u la ong, “Napdeng ki shakri jong me baroh, uei uba bit ban shaniah kat u Dabid, uba long ruh u pyrsa kurim u syiem, bad uba leit ha ka hukum jong me, bad uba donburom ha ka ïing jong me?

¹⁵ Hato dei tang ha kata ka sngi ba nga la sdang ban ïakylli ïa U Blei na ka bynta jong u? kam long kumta, em: wat ai ba u syiem un pynkit ei ei halor u shakri jong u, lymne halor uno uno ruh na ka ïing u kpa jong nga: naba u shakri jong me um tip ei ei na kane baroh, lymne kaba khyndiat lymne shibun.”

¹⁶ U syiem te u la ong, “Ko Ahimelekh, da kaba ïap men ïap shisha, ma me, bad baroh ka ïing u kpa jong me.”

¹⁷ Te u syiem u la ong ha kita ki nongphet kiba ïeng sawdong ïa u, “To phai, bad pynïap ïa ki lyngdoh jong U Trai: naba ka kti jong ki ruh ka don lem bad u Dabid, bad ba haba ki la tip ba u la phet noh, kim shym ïathuh ha nga.” Hynrei, ki shakri u syiem kim treh ban rah ïa la ka kti ban pynïap ïa ki lyngdoh jong U Trai.

¹⁸ Te u syiem u la ong ha u Doeg, “To phai ma me, to pynïap ïa kita ki lyngdoh.” Bad u Doeg u nong Edom u la phai, bad u la tur ha kita ki lyngdoh, bad u la pynïap ha kata ka sngi phraphew san ngut ki rangbah kiba ju phong ïa ka ephod linen.

¹⁹ Bad ïa ka Nob ruh, kaba ka shnong kita ki lyngdoh, u la pynïap da ka syrti waitlam, ïa ki rangbah bad ïa ki kynthei, ïa ki khynnah bad ïa ki khunlung ba dang buiñ, ïa ki masi bad ïa ki kadda bad ïa ki langbrot, da ka syrti waitlam.

²⁰ Uwei te na ki khun shynrang u Ahimelekh u khun u Ahitub, uba kyrteng “u Abiathar”, u la lait im bad u la phet ïap hadien u Dabid.

²¹ Bad u Abiathar u la ïathuh ha u Dabid ba u Saul u la pynïap ïa ki lyngdoh jong U Trai.

²² Te u Dabid u la ong ha u Abiathar, “Nga la tip ha kata ka sngi, haba uta u Doeg u nong Edom u la don hangta, ba un ym pep ban ïathuh ha u Saul: nga la pynwan ma nga ïa ka jingïap ha kita ki briew baroh kiba dei ha ka ïing u kpa jong me.

²³ To sah ma me bad nga, wat sheptieng; naba uta uba wad ïa ka jingim jong nga u wad ïa ka jingim jong me ruh: hynrei, bad nga men ïoh ka jingïada.”