1 SAMUEL 21 - KA BAIBL

U Dabid u phet ïap na u Saul

¹ Ynda kumta, u Dabid u la leit poi sha Nob ha u Ahimelekh u lyngdoh: te u Ahimelekh u la wan tan ïa u Dabid da kaba sheptieng, bad u la ong ha u, “Balei ba me tang weibriew, bad bymdon mano mano ruh lem bad me?”

² Te u Dabid u la ong ha u Ahimelekh u lyngdoh, “U syiem u la hukum ïa nga shaphang kano kano ka kam, bad u la ong ha nga, ‘Wat ai ba uno uno ruh un tip ei ei shaphang kata ka kam ïa kaba nga la phah ïa me, bad kaba nga la hukum ïa me’: te ïa ki samla nga la phah noh hangtai.

³ Te me don aïu ha la ka kti? to ai ïa nga san tylli ki kpu ha ka kti jong nga, lane ïa kaei kaei katba don.”

⁴ Te uta u lyngdoh u la ïathuh ha u Dabid, bad u la ong, “Ym don kpu u bymkyntang ha ka kti jong nga, hynrei, don u kpu bakyntang; tang lada kita ki samla ki la kyndiah na ki kynthei.”

⁵ Te u Dabid u la ïathuh ha uta u lyngdoh, bad u la ong ha u, “Da shisha la pynkyndiah ïa ngi na ki kynthei la kumba lai sngi: naduh ba nga la mih noh, ki pliang jong kine ki samla ki la long ki bakhuid, bad u kpu hi ruh u syriem kum u bymkyntang, haba la don da uwei pat ba la pynkyntang ha u khiew ha kane ka sngi.”

⁶ Kumta, uta u lyngdoh u la ai ha u ïa u kpu bakyntang: namar ym shym don kpu hangta, hynrei, tang uta u 'pu pyni, ïa uba la sei noh na khmat U Trai, ba yn ïoh buh da u kpu bashit ha ka sngi ba la lah sei noh ïa uta keiñ.

⁷ Te ha kata ka sngi la don uwei na ki shakri u Saul, ïa uba la pynsah ha khmat U Trai: uba kyrteng “u Doeg” u nong Edom, uba kham rangbah na ki nongsumar jingri ba dei ha u Saul.

⁸ Te u Dabid u la ong ha u Ahimelekh, “Don ne em hangne ha ka kti jong me u sum lane ka waitlam? namar ngam shym wallam bad nga lymne ïa la ka waitlam lymne ïa la ki atiar, naba ka kam u syiem ka kyrkieh eh.”

⁹ Te uta u lyngdoh u la ong, “Kata ka waitlam u Goliath u nong Philistia, ïa uba me la pynïap ma me ha ka them Elah, ha khmih, ka don hangne ha lyndet kata ka ephod ba la sop ha ka jaiñ: lada men shim ïa kata, to shim: namar ym don kawei pat, sa tang kata hi.” Bad u Dabid u la ong, “Kat kata ym ju don shuh; to ai ïa ka ha nga.”

¹⁰ Bad u Dabid u la ïeng, bad u la phet noh ha kata ka sngi ba u sheptieng ïa u Saul, bad u la leit sha u Akhish u syiem ka Gath.

¹¹ Te ki shakri u Akhish ki la ïa-ong ha u, “Une um long u Dabid u syiem jong kata ka ri? ym long ïa une ruh ba ki la ïarwai markylliang ha kita ki jingshad, ki da ong, “ ‘U Saul u la pynïap ïa la ki hajar, te u Dabid ïa la ki phew hajar?’ ”

¹² Te u Dabid u la buh ïa kita ki ktien ha la ka dohnud, bad u la sheptieng eh ïa u Akhish u syiem ka Gath.

¹³ Bad u la pynbakla ïa la ka jingleh ha khmat jong ki, bad u la leh mynleh lamwir ïa lade ha ki kti jong ki, bad u la trud ha ki jingkhang jong kata ka khyrdop, bad u pynjaw dud umbiah ha u 'ñiuh tmoh jong u.

¹⁴ Kumta te u Akhish u la ong ha la ki shakri, “Ha khmih, phi ïohi ba une u briew uba lamwir; balei te phi la wallam noh ïa u sha nga?

¹⁵ Nga kyrduh kiba lamwir mo, ba phi la wallam ïa une ban leh lamwir ha khmat jong nga? kum une kumno un ïoh wan ha ïing jong nga?”