1 SAMUEL 20 - KA BAIBL

Ka jingïalong lok u Dabid bad u Jonathan

¹ Te u Dabid u la phet noh na Naioth kaba ha Ramah, bad u la wan bad u la ong ha khmat u Jonathan, “Hato nga la leh aïu? Kaei ka jingbymman jong nga? Bad kaei ka pop jong nga ha khmat u kpa jong me, ba u wad kumne ïa ka mynsiem jong nga?”

² Te u la ong ha u, “Kam long kumta, em; men ym ïap: ha khmih, u kpa jong nga un ym leh ei ei ruh lymne ka bakhraw lymne ka barit khlem da ïathuh ha nga: te u kpa jong nga un buhrieh ïa kane na nga balei? kam long kumta.”

³ Te u Dabid u la smai de, bad u la ong, “U kpa jong me u tip bha ba nga la shem kaba sngewbha ha khmat jong me; bad u ong, ‘Wat ai ba u Jonathan un ïoh tip ïa kane, ïoh pynsngewsih ïa u;’ da shisha katba im U Trai, bad katba im ka mynsiem jong me ruh, ka don tang kum shi sien-jam hapdeng jong nga bad ka jingïap.”

⁴ Ynda kumta, u Jonathan u la ong ha u Dabid, “Ïa kano kano kaba kwah ka mynsiem jong me, ïa kata ngan leh na ka bynta jong me.”

⁵ Te u Dabid u la ong ha u Jonathan, “Ha khmih, lashai long u bnai u bathymmai, te da lei lei nga dei ban shong bam bad u syiem: hynrei, to shah ba ngan leit, ngan rieh ïa lade ha lyngkha, haduh ka sngi ka balai ynda janmiet.

⁶ Lada u kpa jong me un kylli shaphang jong nga, me te men ong, ‘U Dabid u la pan khnang na nga ba un ïoh leit jang jang sha Bethlehem ka shnong jong u: naba ka jingkñia kaba shi snem shi snem ka don hangta ïa ki kur baroh.’

⁷ Lada un ong kumne, ‘To ñiuma’; u shakri jong me un ïoh suk: hynrei, lada un bitar lep, kumta to tip ba u la thew khnang ïa ka basniew.

⁸ Namar kata, to leh isynei ïa la u shakri; naba me la ïalam ïa la u shakri lem bad me ha ka jutang U Trai: hynrei, lada don ei ei ka basniew ha nga, to pynïap ma me ïa nga; namar ïa ka ban lei ba men ïalam ïa nga sha u kpa jong me?”

⁹ Te u Jonathan u la ong, “Wat ai kan long kumta ïa me haba da lei lei: namar lada nga la tip ei ei ba u kpa jong nga u la thew ïa ka basniew ha me, balei ngan ym ïathuh ïa me?”

¹⁰ Te u Dabid u la ong ha u Jonathan, “Uei u ban ïathuh ha nga, lada u kpa jong me un phai ktien ïa me da kaba eh?”

¹¹ Te u Jonathan u la ong ha u Dabid, “Ale, ngin ïaleit kai sha lyngkha.” Te ki la ïaleit kai baroh ar ngut sha lyngkha.

¹² Bad u Jonathan u la ong ha u Dabid, “U Trai, U Blei ki Israel, un long sakhi: ynda nga la tynjuh ïa la u kpa kum ha kane ka por lashai, lane lashisngi, te ha khmih, lada kan long ka babha ïa u Dabid, nga ngan ym phah ïathuh ïa kata ha me?

¹³ U Trai un leh kumta, bad tam ruh, ïa u Jonathan, lada u kpa jong nga un ibit ban pynsniew ïa me, bad ba ngan ym ïathuh ïa me bad pyllait noh ïa me, ba men ïoh leit ha kaba suk: te U Trai to un long lem bad me, kumba u la long bad u kpa jong nga.

¹⁴ Te men leh ïa ka jingisynei U Trai ïa nga ym tang katba nga dang im ma nga, ba kumta hi ngan ym ïap:

¹⁵ hynrei ruh, wat pynkut noh ïa la ka jingisynei na ka ïing jong nga lano lano ruh: em, lymne ynda U Trai u la pynjot noh ïa ki nongshun u Dabid uwei pa uwei baroh na khmat ka pyrthei.”

¹⁶ Kumta, u Jonathan u la pynlong ka jutang bad ka ïing u Dabid, da kaba ong, “To U Trai un dawa ïa kane na ka kti ki nongshun u Dabid.”

¹⁷ Bad u Jonathan u la pynsmai pat ïa u Dabid ruh, namar ka jingieit jong u ïa u: naba u la ieit ïa u kumjuh kumba u la ieit ïa la ka jong ka mynsiem.

¹⁸ Ynda kumta, u Jonathan u la ong ha u Dabid, “Lashai long u bnai u bathymmai: te yn kylli shaphang jong me, namar kan long suda ka jaka shong jong me.

¹⁹ Te ynda me la sah lai sngi, men leit hiar kloi, bad to wan sha kata ka jaka ha kaba me la rieh mynba la long kata kawei ka kam, bad to sah hajan u maw Esel.

²⁰ Te nga ruh ngan siat lai tylli ki khnam na syndah jong u, kum ban siat nishan.

²¹ Bad, ha khmih, ngan phah ïa u samla uwei, da kaba ong, ‘Khie leit, da wad ïa kita ki khnam.’ Lada ngan ong ha uta u samla, ‘Ha khmih, kita ki khnam ki shaphang shane na me: to shim ïa ki, ale noh’; namar men ïoh suk bad men ym lei lei, katba im U Trai.

²² Hynrei, lada ngan ong kumne ha uta u samla, ‘Ha khmih, kita ki khnam ki sha shuwa jong me:’ to men leit noh; naba U Trai u la phah noh ïa me.

²³ Te shaphang kata ka kam kaba ma me bad nga ngi la ïakren, ha khmih, U Trai u long hapdeng jong me bad jong nga junom.”

²⁴ Kumta, u Dabid u la rieh ïa lade ha kata ka lyngkha: te haba la poi u bnai u bathymmai, u syiem u la shong ban bam.

²⁵ Bad u syiem u la shong ha la ka jaka shong, kumba ha kiwei pat ki por, kata, ha ka jaka shong hajan ka kynroh; te u Jonathan u la ïeng, bad u Abner u la shong hajan u Saul: hynrei, ka jaka u Dabid ka la long suda.

²⁶ La kumta ruh, u Saul um shym ong ei ei ha kata ka sngi: namar u la mut, “Ade la jia ei ei ha u, um long khuid: shisha um khuid keiñ.”

²⁷ Te ha kaba lashai u bnai u bathymmai, ka sngi ka ba-ar keiñ, ka jaka u Dabid ka la long suda; bad u Saul u la ong ha u Jonathan u khun jong u, “Balei ba u khun u Jesse um shym wan sha ka jingbam mynhynnin, bad mynta ruh?”

²⁸ Te u Jonathan u la ïathuh ha u Saul, “U Dabid u la kyrpad eh na nga ba un ïoh leit sha Bethlehem:

²⁹ bad u la ong, ‘Nga kyrpad ïa me, to shah ba ngan leit; namar ka ïing jong ngi ka don ka jingkñia ha shnong; bad u hynmen jong nga u la hukum ïa nga ba ngan don hangta: te mynta, lada nga la shem kaba sngewbha ha khmat jong me, nga kyrpad ïa me, to shah ba ngan leit, ba ngan ïoh jngoh ïa la ki hynmen.’ Namar kata, um shym wan sha ka miej u syiem.”

³⁰ Ynda kumta, ka jingbitar u Saul ka la meh lep ïa u Jonathan, bad u la ong ha u, “Me u khun jong kata ka bakiat bad bamutlop, nga ngam tip ba me la jied ïa une u khun u Jesse ban long ka jingjahburom ïa me, bad ban long ka jinglehrain ïa ka jinglyngkhuit ka kmie jong me?

³¹ Namar katba une u khun u Jesse u dang im ha kane ka pyrthei, yn ym pynskhem ïa me, lymne ïa ka hima jong me. Namar kata te, to phah bad wallam ïa u sha nga, namar un ïap shisha keiñ.”

³² Te u Jonathan u la ïathuh ha u Saul u kpa jong u, bad u la ong ha u, “Un ïap namar balei? u la leh aïu?”

³³ Te u Saul u la sum ïa u sum sha u ban sum ïa u: na kane u Jonathan u la tip ba u kpa jong u, u la thew skhem ban pynïap ïa u Dabid.

³⁴ Kumta, u Jonathan u la ïeng na kata ka miej da kaba bitar lep, bad um shym bam jingbam ha kata ka sngi ka ba-ar jong uta u bnai: namar u la sngewsih na ka bynta u Dabid, namar ba u kpa jong u, u la pynjahburom ïa u.

³⁵ Mynstep te, u Jonathan u la leit sha kata ka lyngkha hamar kata ka por ba la ïabuh bad u Dabid, bad u khynnah u barit lem bad u.

³⁶ Bad u la ong ha uta u khynnah jong u, “To mareh, bad wad ïa ki khnam kiba nga siat.” Te katba uta u khynnah u mareh, u ruh u la siat pynbud ïa u khnam sha shuwa jong u.

³⁷ Te haba uta u khynnah u la poi sha kata ka jaka ha kaba la don uta u khnam ba la siat u Jonathan, u Jonathan u la pyrta nadien uta u khynnah, bad u la ong, “Uto u khnam um long sha shuwa jong me?”

³⁸ Bad u Jonathan u la pyrta nadien uta u khynnah, “Pynstet, pynkloi, wat da ap.” Bad uta u khynnah u Jonathan u la khar ïa kita ki khnam, bad u la wan phai sha la u kynrad.

³⁹ Te uta u khynnah um shym tip ei ei: hynrei, tang u Jonathan hi bad u Dabid ki la tip ïa kata ka kam.

⁴⁰ Te u Jonathan u la ai ïa kita ki atiar jong u ha uta u khynnah jong u, bad u la ong ha u, “Khie leit lam sha shnong.”

⁴¹ Te tang shu leit noh uta u khynnah, u Dabid u la mih noh na shaphang shathie, bad u la hap dem la ka khmat sha ka khyndew, bad u la dem nguh lai sien: bad ki la ïadoh paralok hi, bad ki la ïaïam lem, te u la kham jur u Dabid.

⁴² Bad u Jonathan u la ong ha u Dabid, “To khie leit ha kaba suk, namar ngi la ïasmai baroh ar ngut ha ka kyrteng U Trai, da kaba ong, ‘To U Trai un long hapdeng jong nga bad jong me, bad hapdeng u symbai jong nga bad u symbai jong me, junom.’ ” U, te, u la ïeng bad u la leit noh: bad u Jonathan u la leit sha shnong.