1 SAMUEL 2 - KA BAIBL

Ka jingrwai ka Hannah

¹ Te ka Hannah ka la duwai, bad ka la ong: “Ka dohnud jong nga ka leh kmen ha U Trai, ïa ka reng jong nga la pynkyntiew ha U Trai; la plie wang ïa ka shyntur jong nga halor ki nongshun jong nga: namar nga leh kmen ha ka jingpynim jong me.

² “Ym don u bakhuid kat U Trai; naba nalor jong me ym don shuh mano mano; lymne ym don u mawsiang kum U Blei jong ngi.

³ Wat da kren sarong eh shuh; wat ai ban mih ka jingmeng na ka shyntur jong phi: namar U Trai u long U Blei ka jingtip, bad u ju thew ïa ki jingleh.

⁴ Ïa ki ryntieh jong ki bakhlaiñ la pynkheiñ, bad ïa ki batlot bor la panpoh da ka bor.

⁵ Kita kiba la ju dap kyrhai ki la tyrwa nong ïa lade ban ïoh kpu: bad kita kiba ju thngan kim long kumta shuh: kumta, kaba lyngki ka la kha hynñiew ngut; bad kata kaba bun ki khun ka nangswai.

⁶ U Trai uba pynïap, bad uba pynim: u pynhiar ma u sha ka jingtep, u pynmih ruh ma u.

⁷ U Trai uba pynshipa, bad uba pynriewspah: ma u, uba pyndem, bad uba pynkyntiew.

⁸ U pynïeng ïa ki baduk na ka 'dewmet, u pynkyntiew ruh ïa ki bakyrduh khait na ka thliew sboh, ban pynshong ïa ki lem bad ki syiem, bad ban pynïoh ha ki ka khet ka burom; naba ki rijied jong ka khyndew ki long ki jong U Trai, bad u la pynshong ma u ïa ka pyrthei halor jong ki.

⁹ “Un sumar ïa ki sla'jat ki riewkhuid jong u, hynrei, ïa u bymman un pynsngap noh jar ha ka jingdum; namar un ym jop uno uno u briew da ka bor.

¹⁰ Yn pynlwet jin ïa ki nongïaleh pyrshah ïa U Trai; na bneng un tied pyrthat pyrshah ïa ki: U Trai un bishar ïa ka bakut ka pyrthei; un ai bor ruh ha la u syiem, bad un pynkyntiew ïa ka reng jong uba la sleh jong u.”

¹¹ Bad u Elkanah u la leit sha Ramah ha la ïing. Te uta u khun khynnah u la shakri ïa U Trai ha khmat u Eli lyngdoh.

Ka jingïathuhlypa pyrshah ïa ka ïing u Eli

¹² Te ki khun u Eli ki la long ki khun u Belial; kim ithuh ïa U Trai.

¹³ Bad ka rukom ki lyngdoh bad ki briew ka la long, ba haba uno uno u la ainguh ka jingkñia, u shakri u lyngdoh u ju wan haba dang shet ïa ka doh, bad u proh u balai pnat ha la ka kti;

¹⁴ te u la ju dung ïa u ha ka nar sdieh, lane ha u khiew rnong, lane ha u dek, lane ha u khiew phiang; baroh katba ngat ha u proh, u lyngdoh u la ju shim ha lade. Kumta, ki la ju leh ha Sheiloh ha ki Israel baroh kiba la wan shata.

¹⁵ Bad haba ym pat thang ïa ka khleiñ ruh, u shakri u lyngdoh u ju wan, u da ong ruh ha u briew uba kñia, “To ai doh ban syang ïa u lyngdoh; naba un ym shim ïa ka doh kaba la shet, hynrei, kaba im.”

¹⁶ Bad lada, uno uno ruh u briew u ong ha u, “Hynrei, kin da thang shuwa ïa ka khleiñ, hadien te men shim katba mon ka mynsiem jong me;” u te un da ong, “Em, hynrei men ai mynta keiñ; lym kumta, ngan shim ïa ka da ka bor.”

¹⁷ Kumta, ka pop jong kita ki samla ka la khraw eh ha khmat U Trai; naba ki briew ki la isih ïa ka jingainguh jong U Trai.

¹⁸ Te u Samuel u la shakri ha khmat U Trai, u dang khynnah, ba la panpoh ïa u da ka ephod linen.

¹⁹ Ka kmie jong u ruh ka ju thaw sopti ka barit ïa u, ka la ju wallam ruh ïa ka man la ka snem, haba ka la wan kiew lem bad u tnga jong ka ban ainguh ïa ka jingkñia ba shi snem.

²⁰ Te u Eli u la kyrkhu ïa u Elkanah bad ïa ka tnga jong u, bad u la ong, “To U Trai un ai symbai ha me na kane ka briew namar kata ka jingai kylliang kaba la ai kylliang ha U Trai.” Te ki la leit wan noh sha la ïing.

²¹ Bad U Trai u la wan khmih ïa ka Hannah, bad ka la punkhun, ka la kha ruh lai ngut ki shynrang bad ar ngut ki kynthei. Bad uta u khynnah, u Samuel u la nang san ha khmat U Trai.

²² Te u Eli u la tymmen eh; bad u la ïohsngew baroh ba ki khun jong u ki la leh ha ki Israel baroh, kumno ba ki la ju thiah ruh bad kita ki kynthei kiba ju shakri ha ka jingkhang Ka Tabernakl ka jingïaseng.

²³ Bad u la ong ha ki, “Balei phi leh kiba kum kine? Naba nga ïohsngew ïa ki jingleh basniew jong phi na kine ki briew baroh.

²⁴ Em phi, ko khun; naba kane ka jingbna ba nga ïohsngew kam long ka babha; phi pynleh ïa ki briew jong U Trai ban leh palat.

²⁵ Lada u briew un leh pop ïa u parabriew, U Blei un bishar ïa u; hynrei, lada u briew un leh pop ïa U Trai, uei u ban ïasaid na ka bynta jong u?” Pynban, kim shym sngap ïa ka ktien u kpa jong ki, naba U Trai u la thew ban pynïap noh ïa ki.

²⁶ Te uta u khynnah u Samuel u la nang san, bad u la long uba sngewbha ïa u da U Trai, bad da ki briew de.

²⁷ Te uwei u briew u jong U Blei u la wan ha u Eli, bad u la ong ha u, “Kumne u ong U Trai, ‘Nga ngam shym la paw shynna ha ka ïing u kpa jong me, mynba ki dang don ha Ijipt ha ka ïing u Pharaoh?

²⁸ Nga ngam shym la jied ïa u ruh na ki jaid Israel baroh ban long u lyngdoh jong nga, ban leit kiew ha ka duwan jong nga, ban thang ka jingiwbih, bad ban phong ïa ka ephod ha khmat jong nga? ngam shym la aiti ruh ha ka ïing u kpa jong me ïa ki jingainguh baroh kiba da ka ding ki jong ki khun Israel?

²⁹ Balei te phi ïuhbeiñ ïa ka jingkñia jong nga bad ïa ka jingainguh jong nga, kiba nga la hukum ban long ha ka jaka shong jong nga: ba me kham pyndonburom ruh ïa la ki khun ban ïa nga, phi da pynsngaid ïa lade da kita ki jingainguh baroh ki babha tam ki jong ki briew jong nga ki Israel?’

³⁰ Namar kata, U Trai, uba U Blei ki Israel, u ong, ‘Nga la ong shisha ba ka ïing jong me, bad ka ïing u kpa jong me, kin ïaid ha khmat jong nga junom:’ hynrei, mynta U Trai u ong, ‘Kata kaba eh ïa nga; naba kiba pyndonburom ïa nga, ïa kita nga ruh ngan pyndonburom, te ïa kita kiba ñiewbeiñ ïa nga, yn ñiewbeiñ kylliang ïa ki.

³¹ Ha khmih, ki sngi kin wan, ha kiba ngan ot noh ïa ka ksang'ti jong me, bad ïa ka ksang'ti ka ïing u kpa jong me, ba yn ym don u riewtymmen ha ka ïing jong me.

³² Bad men ïohi ïa ka jingjynjar ka jaka shong jong nga, ha ka jingmanbha baroh ïa kaba U Blei un ai ha Israel; bad yn ym don riewtymmen ha ïing jong me junom.

³³ Bad uta u briew jong me, ïa uba ngan ym ot noh na ka duwan jong nga, un sah ba un bam duh ïa ki khmat jong me, bad ba un pynjynjar ïa ka dohnud jong me: bad ka jingroi ka ïing jong me baroh kin ïap ruh ha kaba dang shiteng met.

³⁴ Te kane kan long ka dak ha me, ka ban hap halor ki ar ngut ki khun shynrang jong me, halor u Hophni bad u Phinehas; ha kajuh ka sngi kin ïap noh baroh ar ngut.

³⁵ Bad ngan pynmih ha lade ïa u lyngdoh uba ngeit, u ban leh kat kaba don ha ka dohnud jong nga bad ha ka jingmut jong nga: bad ngan tei ïa ka ïing kaba skhem ha u; bad un ïaid ha khmat uba la sleh jong nga junom.

³⁶ Kan jia ruh, ba uwei uwei baroh ïa uba la pynsah na ka ïing jong me un wan un dem ngon ruh ha u ba un ïoh shi dkhot ka rupa bad uwei u kpu, bad un ong, “Nga kyrpad ïa me, to thung ïa nga ha kano kano ka kam kaba dei lyngdoh, ba ngan dup ïoh bam khyndiat u kpu.” ’ ”