1 SAMUEL 19 - KA BAIBL

U Saul u thew ban pynïap ïa u Dabid

¹ Te u Saul u la kren ha u Jonathan u khun jong u, bad ha ki shakri jong u baroh, ba kin pynïap ïa u Dabid.

² Hynrei, u Jonathan u khun u Saul u la ieit eh ïa u Dabid. Bad u Jonathan u la ïathuh ha u Dabid, u da ong, “U Saul u kpa jong nga u thew ban pynïap ïa me: namar kata te, nga kyrpad ïa me, to sumar ïa lade lashai mynstep, bad to sah ha ka jaka rieh, bad to buhrieh ïa lade:

³ te ngan mih shabar bad ngan ïeng hajan u kpa jong nga ha kata ka lyngkha ha kaba me don, te ngan ïakren bad u kpa jong nga shaphang jong me; te katba nga tip, ngan ïathuh ha me.”

⁴ Bad u Jonathan u la kren bha shaphang u Dabid ha u Saul u kpa jong u, bad la ong ha u, “To u syiem un ym leh pop ïa la u shakri, ïa u Dabid keiñ; namar um shym leh pop ma u ïa me, bad namar ba ki jingleh jong u ki long ki babha eh ïa me:

⁵ namar u la kheiñduh ïa la ka jingim, bad u la pynïap ïa uta u Philistia, bad U Trai u la pynlong ïa ka jinglait im bakhraw ïa ki Israel baroh; te me la ïohi ïa kata bad me la shadkmen; na ka balei te men leh pop ïa ka snam kaba lui lui, da kaba pynïap ïa u Dabid khlem daw?”

⁶ Bad u Saul u la shahshkor ïa ka ktien u Jonathan: bad u Saul u la smai, “Katba im U Trai, yn ym pynïap ïa u.”

⁷ Te u Jonathan u la khot ïa u Dabid, bad u Jonathan u la ïathuh ha u ïa kine kiei kiei baroh. Bad u Jonathan u la ïalam ïa u Dabid sha u Saul, bad u la long ha khmat jong u, kumba mynhynnin mynshisngi.

⁸ Te ka la don ka thma pat; bad u Dabid u la leit mih noh, bad u la ïaleh ïa ki Philistia, bad u la pynïap ïa ki da ka jingpynïap kaba khraw; te ki la phet ïap na khmat jong u.

⁹ Te u mynsiem bymman uba na U Trai u la don ha u Saul, katba u la shong ha la ïing bad la u sum ha la ka kti: te u Dabid u la tem da la ka kti.

¹⁰ Bad u Saul u la pyrshang ban sum lyngba ïa u Dabid haduh kata ka kynroh da uta u sum; hynrei, u la kynriah noh na khmat u Saul, u te u la sum ïa uta u sum sha kata ka kynroh: bad u Dabid u la phet ïap bad u la lait im ha kata ka miet.

¹¹ Bad u Saul u la phah briew sha ka ïing u Dabid, ban ap thap ïa u, bad ban pynïap ïa u mynstep; te ka Mikhal ka tnga jong u, ka la ïathuh ha u, ka da ong, “Lada men ym pynim ïa la ka jingim mynta mynmiet, lashai mynstep yn pynïap ïa me.”

¹² Kumta, ka Mikhal ka la pynhiar arsut ïa u Dabid na ka jingkhang ïit: te u la leit, bad u la phet ïap, bad u la lait.

¹³ Te ka Mikhal ka la shim ïa ki teraph, bad ka la buh ïa ki ha kata ka jingthiah, bad ka la buh ka syngkhlieh kaba na u 'ñiuh blang ha ka khlieh jong ka, bad ka la tap ïa ka da ki jaiñ.

¹⁴ Te haba u Saul u la phah briew ban kem ïa u Dabid, ka la ong, “U pang”.

¹⁵ Te u Saul u la phah ïa kita ki briew ban jngoh ïa u Dabid, u da ong, “Wallam noh artet ïa u sha nga ha la ka jingthiah, ba ngan ïoh pynïap ïa u.”

¹⁶ Te haba kita ki briew ki la poi, ha khmih, kita ki teraph pleng ha kata ka jingthiah, bad ka syngkhlieh kaba na u 'ñiuh blang ha ka khlieh jong ka.

¹⁷ Te u Saul u la ong ha ka Mikhal, “Balei pha la shukor ïa nga kumne, bad ba pha la pyllait noh ïa u nongshun jong nga, ba un ïohlait?” Te ka Mikhal ka la ïathuh ha u Saul, “U la ong ha nga, ‘To pyllait noh ïa nga; ngan pynïap balei ïa pha?’ ”

¹⁸ Kumta, u Dabid u la phet ïap, bad u la lait, bad u la wan poi ha u Samuel sha Ramah, bad u la ïathuh ha u ïa kiei kiei baroh kiba u la leh u Saul ha u. Te ma u bad u Samuel ki la leit bad ki la ïashong ha Naioth.

¹⁹ Te la ïathuh ha u Saul, da kaba ong, “Ha khmih, u Dabid u ha Naioth ha Ramah.”

²⁰ Bad u Saul u la phah briew ban kem ïa u Dabid: te haba kita ki la ïohi ïa uta u paidbah ki nongïathuhlypa ba ki ïathuhlypa, bad ba u Samuel u la ïeng kum u rangbah jong ki, U Mynsiem U Blei u la wan ha kita ki briew jong u Saul, ba kumta ki hi ruh ki la ïathuhlypa.

²¹ Te haba la ïathuh ïa kane ha u Saul, u la phah ïa kiwei pat ki briew, te kita ruh ki la ïathuhlypa. Te u Saul u la phah briew pat ka balai sien, kita ruh ki la ïathuhlypa.

²² Ynda kumta, u hi ruh u la leit sha Ramah, bad u la wan poi ha kata ka pukri ka bakhraw kaba ha Sekhu: bad u la kylli bad u la ong, “U Samuel bad u Dabid ki ha-ei?” Te uwei u la ïathuh, “Ha khmih, ki don ha Naioth ha Ramah.”

²³ Te u la leit sha Naioth ha Ramah: bad U Mynsiem U Blei u la wan ha u ruh, te u la nang leit, bad u la ïathuhlypa, haduh ba u la poi sha Naioth ha Ramah.

²⁴ Bad u ruh u la loit noh ïa la ki jaiñ, bad u la ïathuhlypa ruh ha khmat u Samuel, bad u la thiah lyngkhuit baroh kata ka sngi bad baroh kata ka miet. Namar kata, ki la ju ong, “U Saul ruh pleng u don hapdeng ki nongïathuhlypa?”