1 SAMUEL 18 - KA BAIBL

Ka jingïateh jutang u Dabid bad u Jonathan

¹ Te ynda u la wai noh ban kren ha u Saul, u Jonathan bad u Dabid ki la ïa-ieit thep mynsiem, bad u Jonathan u la ieit ïa u kum la ka jong ka mynsiem.

² Bad u Saul u la shim ïa u ha lade ha kata ka sngi, bad um shah shuh ba un leit phai noh sha ka ïing u kpa jong u.

³ Ynda kumta, u Jonathan bad u Dabid ki la ïateh jutang, naba u la ieit ïa u kum la ka jong ka mynsiem.

⁴ Bad u Jonathan u la loit noh na lade ïa kata ka barandi kaba u kup, bad u la aiti ïa ka ha u Dabid, bad ïa la ki jaiñkup jaiñsem, jin haduh ïa la ka waitlam, bad ïa la ka ryntieh, bad ïa la ka jingpanpoh de.

⁵ Te u Dabid u la leit shano shano kat sha kaba u Saul u la phah ïa u, bad u la ïaid leh sian ïa lade: bad u Saul u la buh ïa u halor ki paidïapom, bad u la long uba la sngewbha ïa u ha khmat kita ki paidbah baroh, bad ha khmat ki shakri u Saul ruh de.

U Saul u bishni ïa ka nam u Dabid

⁶ Te haba u Dabid u wan phai noh na kaba pynïap ïa uta u Philistia, ki kynthei ki la ïawan mih na ki nongbah ki Israel baroh, ki da ïarwai bad ki da ïashad, ban tan ïa u Saul syiem, bad ki kanjari, bad ka jingkmen, bad ki kynja jingtem.

⁷ Te kita ki kynthei katba ki ïarwai ki la ïakren markylliang, bad ki la ïa-ong, “U Saul u la pynïap ïa la ki hajar, te u Dabid ïa la ki phew hajar.”

⁸ Te u Saul u la bitar lep, bad kane ka jingong ka la pynsngewsih ïa u; bad u la ong, “Ha u Dabid ki la ai phew hajar, te ha nga ki la ai tang ki hajar: sah sa aïu pat ba un ïoh, hynrei, sa tang ka jinglong syiem hi?”

⁹ Te u Saul u la khmih sian ïa u Dabid naduh kata ka sngi artet.

¹⁰ Te ha kaba lashai, ka la jia ba uta u mynsiem bymman uba na U Blei u la wan jur ha u Saul, bad u la ïathuhlypa hapdeng kata ka ïing; te u Dabid u la tem da la ka kti kumba mynshuwa: bad u sum u la don ha ka kti u Saul.

¹¹ Bad u Saul u la sum ïa uta u sum; bad u la ong, “Ngan sum lyngba ïa u Dabid sha kata ka kynroh.” Te u Dabid u la kynriah noh ar sien na khmat jong u.

¹² Te u Saul u la sheptieng ïa u Dabid, namar ba U Trai u la don lem bad u, bad u la kiar noh na u Saul.

¹³ Namar kata, u Saul u la pynkynriah noh ïa u na u, bad u pynlong ïa u, u nongïalam halor shi hajar; te u la leit shabar bad u la wan shapoh ha shuwa uta u paidbah.

¹⁴ Te u Dabid u la ïaid leh sian ïa lade ha ki lynti jong u baroh; bad U Trai u la don lem bad u.

¹⁵ Bad haba u Saul u la ïohi ba u la ïaid leh sian eh, u la sheptieng ïa u.

¹⁶ Hynrei, ki Israel bad ki Judah baroh ki la ieit ïa u Dabid; namar ba u la leit shabar bad ba u la wan shapoh ha shuwa jong ki.

¹⁷ Te u Saul u la ong ha u Dabid, “Ha khmih, ka khun nyngkong jong nga, ka Merab, ïa ka ngan ai kurim ha me: hynrei, tang ba men long uba shlur ïa nga, bad ba men ïaleh ïa ka jingïaleh thma U Trai.” Namar u Saul u la ong, “Ka kti jong nga kan ym long halor jong u, hynrei, to ka kti ki Philistia kan long halor jong u.”

¹⁸ Te u Dabid u la ong ha u Saul, “Nga, nga long uei? bad ka jingim jong nga, lane ka ïing u kpa jong nga, ki ïalong aïu ha Israel, ba ngan ïoh long u pyrsa kurim u syiem?”

¹⁹ Hynrei, ha kata ka por ha kaba la dei ban ai noh ïa ka Merab ka khun u Saul ha u Dabid, la ai kurim noh ïa ka pynban ha u Adriel u nong Meholath.

²⁰ Te ka Mikhal ka khun u Saul ka la ieit ïa u Dabid: bad ki la ïathuh ha u Saul, bad u la sngewbha ïa kata.

²¹ Bad u Saul u la ong, “Ngan ai ïa ka ha u, ba kan ïoh long ka jingriam ïa u, bad ba ka kti ki Philistia kan long pyrshah ïa u.” Kumta, u Saul u la ong ha u Dabid, “Ha kane ka sngi men ïoh long u pyrsa kurim jong nga sa shi sien pat.”

²² Te u Saul u la hukum ïa la ki shakri kumne, “To ïakren harieh bad u Dabid, da kaba ong, ‘Ha khmih, u syiem u sngewbha ïa me, bad ki shakri jong u baroh ki ieit ïa me: mynta te namar kata, to men long u pyrsa kurim u syiem.’ ”

²³ Bad ki shakri u Saul ki la kren ïa kine ki ktien ha ki shkor u Dabid. Te u Dabid u la ong, “Phi ñiew sting mo ban long u pyrsa kurim u syiem, haba nga ruh u baduk, bad u bapoh?”

²⁴ Te kita ki shakri u Saul ki la ïathuh ha u, ki ong, “Kumne u la kren u Dabid.”

²⁵ Te u Saul u la ong, “Kumne phin ong ha u Dabid, ‘U syiem um kwah hi ïa ka jingaiseng, hynrei, tang ban ïoh shispah tylli ki sher ki Philistia, ba yn pynhiar kput halor ki nongshun u syiem.’ ” Hynrei, u Saul u la thew khnang ban pynïap ïa u Dabid da ka kti ki Philistia.

²⁶ Te haba kita ki shakri jong u ki la ïathuh ha u Dabid ïa kine ki ktien, u Dabid u la sngewbha eh ban long u pyrsa kurim u syiem. Te ym pat biang ki sngi;

²⁷ bad u Dabid u la ïeng bad u la leit, ma u bad ki briew jong u, bad u la pynïap ïa arspah ngut ki Philistia; bad u Dabid u la wallam ïa ki sher jong ki, bad u la ai noh biang biang ïa ki ha u syiem, ba un ïoh long u pyrsa kurim u syiem. Te u Saul u la ai kurim noh ïa ka Mikhal ka khun jong u ha u.

²⁸ Te u Saul u la ïohi bad u la tip ba U Trai u la don lem bad u Dabid; bad ka Mikhal ka khun u Saul ka la ieit ïa u.

²⁹ Bad u Saul u la nang kham sheptieng pynban ïa u Dabid; bad u Saul u la long u nongshun u Dabid ha la ka sngi.

³⁰ Ynda kumta, ki rangbah ki Philistia ki la leit mih: te katba ki leit mih, u Dabid u la ju kham leh sian ïa lade ban ïa ki shakri u Saul baroh; kumta la ñiewkor eh ïa ka nam jong u.