1 SAMUEL 17 - KA BAIBL

U Dabid u pynïap ïa u Goliath

¹ Te ki Philistia ki la lum lang ïa la ki paidïapom ïa ka ban ïaleh thma, bad ki la ïalum lang ha Shokhoh, kaba ha Judah, bad ki la ïasher dara hapdeng Shokhoh bad Asekah, ha Ephes-dammim.

² Bad u Saul bad ki paidbah Israel ki la ïalum lang, bad ki la ïasher dara ha ka them Elah, bad ki la khreh riang ïa u paidïapom ban ïaleh ïa ki Philistia.

³ Te ki Philistia ki la ïeng halor u lum ha kawei ka liang, bad ki Israel ki la ïeng halor u lum ha kawei pat ka liang: te la don ka them hapdeng jong ki.

⁴ Te la wan mih u briew hapdeng jong ki na ka jaka shong dara ki Philistia, uba kyrteng “u Goliath”, na Gath, uba ka rynïeng jong u, hynriew pruh shi tda.

⁵ Te ka jingïada khlieh rnong ka la don ha ka khlieh jong u, bad u la phong da ka jingphong nar; te ka jingkhia kata ka jingphong ka la don san hajar shekel ka rnong.

⁶ Bad ki sop'jat rnong ki la don ha ki kjat jong u, bad ka stieh rnong hapdeng ki siang tyrpeng jong u.

⁷ Bad u dieng-thung-sum jong u la kat u khung u nongthain jaiñ: te u nar sum jong u, u la hynriewspah shekel ka jingkhia jong u: bad u nongrah stieh u la ïaid ha shuwa jong u.

⁸ Te u la ïeng bad u la pyrta ïa ki paidïapom ki Israel, bad u la ong ha ki, “Balei phi ïamih ban khreh riang ïa la ki paidïapom? Nga ngam long u Philistia, phi ruh ki shakri u Saul? to jied ïa phi da u briew ban wan hiar sha nga.

⁹ Lada un lah ïaleh bad nga, bad pynïap ïa nga, kumta ngin long shakri ïa phi: hynrei, lada ngan lah ma nga ïa u, bad pynïap ïa u, te kumta ma phi phin long ki shakri jong ngi, bad phin shakri ïa ngi.”

¹⁰ Bad uta u Philistia u la ong, “Nga la beiñ ïa ki paidïapom ki Israel ha kane ka sngi; to ai ïa u briew ha nga, ba ngin ïaleh.”

¹¹ Haba u Saul bad ki Israel baroh ki la ïohsngew ïa kita ki ktien jong uta u Philistia, ki la khaw-eit, bad ki la sheptieng shikatdei.

¹² Te u Dabid u la long u khun jong u nong Ephrath na Bethlehem Judah, uba kyrteng u Jesse; bad u la don phra ngut ki khun shynrang: te ha ki sngi u Saul, ïa une u briew la ñiew riewtymmen hapdeng ki briew.

¹³ Te ki lai ngut ki khun ki banyngkong u Jesse ki la leit bad ki la bud ïa u Saul sha kata ka thma: te ki kyrteng kine ki lai ngut ki khun jong u kiba la leit sha kata ka thma, ki la long “u Eliab” u banyngkong, bad “u Abinadab” uba bud; bad “u Shammah” u balai.

¹⁴ Te u Dabid u la long u bakhatduh; bad kita ki lai ngut ki hynmen ki la bud ïa u Saul.

¹⁵ Te u Dabid u la ju ïaleit ïawan na u Saul ïa ka ban sharai ïa ki langbrot u kpa jong u ha Bethlehem.

¹⁶ Te uta u Philistia u la wan mih mynstep bad janmiet, bad u la pyni ïa lade sawphew sngi.

¹⁷ Te u Jesse u la ong ha u Dabid u khun jong u, “To shim mynta ha la ki hynmen shi ephah na une u Kew sdieh, bad kine ki shiphew tylli ki kpu, bad to leit lam kloi sha ka jaka shong dara ha la ki hynmen;

¹⁸ bad to rah ïa kine ki shiphew tylli ki ktung dud ha uta u rangbah shihajar jong ki, bad to leit jngoh ïa la ki hynmen, la ki koit ki khiah ne em, bad to pyllait ïa ka bynda jong ki.”

¹⁹ Te u Saul, bad ki, bad kita ki paidbah Israel baroh, ki la don ha ka them Elah, ki da ïaleh thma bad kita ki Philistia.

²⁰ Te u Dabid u la khie dang step, bad u la iehnoh ïa kita ki langbrot bad u nongsumar, bad u la shim, bad u la leit, kumba la hukum u Jesse ïa u; te u la poi sha kata ka jaka shong dara, katba ki paidïapom ki dang ïaleit mih sha kata ka jaka ïaleh, bad ki da ïarisa ban sa ïaleh.

²¹ Namar ki Israel bad ki Philistia ki la ïakhreh riang ïa la ki paidïapom, ki da ïaïeng marpyrshah.

²² Te u Dabid u la iehnoh ïa kata ka jingkit jong u ha ka kti uta uba sumar ïa ki jingbuh, bad u la phet sha uta u paidïapom, bad u la poi bad u la khublei ïa la ki hynmen.

²³ Te katba u dang ïakren bad ki, ha khmih, uta u rangbah, uta u Philistia na Gath, uba kyrteng “u Goliath”, u la wan mih noh na ki paidïapom ki Philistia, bad u la kren ïa kita kijuh ki ktien: bad u Dabid u la ïohsngew ïa ki.

²⁴ Te ki paidbah Israel baroh, haba ki la ïohi ïa uta u briew ki la phet ïap noh na u, bad ki la sheptieng shikatdei.

²⁵ Bad kita ki paidbah Israel ki la ïa-ong, “Phi la ïohi ne em ïa uta u briew uba la wan mih noh? shisha u la wan mih khnang ïa ka ban beiñ ïa ki Israel: te uta u briew u ban pynïap ïa u, u syiem un pynriewspah ïa u da ka spah kaba khraw, un ai kurim ruh ïa la ka khun ha u, bad un pynlong laitluid ïa ka ïing u kpa jong u ha Israel.”

²⁶ Te u Dabid u la kren ha kita ki briew kiba ïeng hajan jong u, u da ong, “Yn leh aïu ïa uta u briew u ban pynïap ïa une u Philistia, bad u ban pynduh noh ïa kane kaba jahburom na Israel? naba uei une u Philistia uba khlem otsher, ba u beiñ ïa ki paidïapom jong U Blei u ba-im?”

²⁷ Te kita ki briew ki la ïathuh ha u da kata ka rukom, ki da ong, “Kumta keiñ yn leh ïa uta u briew u ban pynïap ïa u.”

²⁸ Te u Eliab u hynmen nyngkong jong u, u la ïohsngew haba u la kren ha kita ki briew; bad ka jingbitar u Eliab ka la meh lep ïa u Dabid, bad u la ong, “Me la wan hiar shane balei? bad me la iehnoh badno ïa kita ki khyndiat ki langbrot ha ka ri khlaw? Nga ithuh ïa ka jingsarong jong me, bad ïa ka jingrunar ka dohnud jong me; namar me la wan hiar khnang tang ba men ïohi ïa ka thma.”

²⁹ Te u Dabid u la ong, “Nga la leh aïu te? Balei ym don daw?”

³⁰ Te u la phai noh na u sha uwei pat, bad u la ong ïa kajuh ka ktien: bad uta u paidbah u la ïathuh pat ha u da kijuh ki ktien kumba mynshuwa.

³¹ Te haba la ïohsngew ïa kita ki ktien kiba u la kren u Dabid, ki la ïathuh pateng ïa ki ha khmat u Saul: u te u la phah khot ïa u.

³² Te u Dabid u la ong ha u Saul, “Wat ai ba kan khaw-eit ka dohnud jongno jongno ruh namar uta: u shakri jong me un leit bad un ïaleh bad une u Philistia.”

³³ Te u Saul u la ong ha u Dabid, “Me mem lah ban mih pyrshah ïa une u Philistia ban ïaleh bad u: namar me, me dang samla, u te u long u riewïapom la myndang khynnah.”

³⁴ Te u Dabid u la ong ha u Saul, “U shakri jong me u la sumar ïa ki langbrot u kpa jong u: te ki la mih u sing bad ka dngiem, bad ki la kynrup ïa u khun langbrot na ka kynhun,

³⁵ te nga la bud nadien jong u, bad nga la shoh ïa u, bad nga la pyllait ïa u na ka shyntur jong u: te haba u la ïeng ïaleh pyrshah ïa nga, nga la kem ïa u na u 'ñiuh tmoh, bad nga la shoh ïa u, bad nga la pynïap noh ïa u.

³⁶ Kumta u shakri jong me u la pynïap ïa uta u sing bad ïa kata ka dngiem: te une u Philistia uba khlem otsher un long kum uwei na kita, namar ba u la beiñ ïa ki paidïapom jong U Blei u ba-im.”

³⁷ Te u Dabid u la ong ruh, “U Trai uba la pynim ïa nga na ka kti u sing, bad na ka kti ka dngiem, uta keiñ, un pynim ïa nga na ka kti une u Philistia.” Te u Saul u la ong ha u Dabid, “Khie leit, bad U Trai un long ryngkat bad me.”

³⁸ Bad u Saul u la pynphong ha u Dabid ïa ki jingkieng atiar jong u, bad u la buh ïa ka jingïada khlieh rnong ha ka khlieh jong u, bad u la pynphong ha u da ka jingphong nar.

³⁹ Te u Dabid u la woh ïa ka waitlam ha kata ka jingkieng atiar jong u, bad u la pyrshang ban ïaid: namar ba um shym mlien. Te u Dabid u la ong ha u Saul, “Ngam lah ïaid ha kine; namar ngam ju mlien.” Bad u Dabid u la loit noh ïa ki.

⁴⁰ Bad u la shim ïa la u diengduh ha la ka kti, bad u la jied ha u na kata ka wah, san tylli ki maw kiba lyngkniap, bad u la thep ïa ki ha kata ka pla snieh u nongaplangbrot kaba u don, kata, ha ka ïarong keiñ; bad ka jingshat maw jong u ka ha ka kti jong u: te u la leit hajan uta u Philistia.

⁴¹ Bad uta u Philistia u la nang wan bad u la wan hajan u Dabid; bad uta u briew uba rah ïa ka stieh u la ïaid ha shuwa jong u.

⁴² Te haba uta u Philistia u la khmih, bad ba u la ïohi ïa u Dabid, u la ibeiñ ïa u: naba u dang samla, bad uba saw syntiew, bad uba bhabriew.

⁴³ Bad uta u Philistia u la ong ha u Dabid, “Nga, nga long u ksew, ba me wan ha nga da u diengduh?” Bad uta u Philistia u la tim ïa u Dabid da ki blei jong u.

⁴⁴ Uta u Philistia u la ong ruh ha u Dabid, “Ale me sha nga, te ngan ai ïa ka doh jong me ha ki sim ka suiñ, bad ha ki mrad ka khyndew.”

⁴⁵ U Dabid te u la ong ha uta u Philistia, “Me, me wan ha nga da ka waitlam, bad da u sum, bad da ka stieh: nga te nga wan sha me ha ka kyrteng U Trai ki paid, U Blei ki paidïapom ki Israel keiñ, ïa uba me la krenbeiñ.

⁴⁶ Ha kane ka sngi keiñ U Trai un aiti ïa me ha ka kti jong nga; te ngan shoh ïa me, bad ngan shim noh ïa ka khlieh jong me na me; bad ha kane ka sngi ngan ai noh ïa ki metïap ki paid ki Philistia ha ki sim ka suiñ, bad ha ki mrad khlaw ka khyndew; ba ka pyrthei baroh kan ïoh tip ba U Blei u don ha Israel.

⁴⁷ Bad une u paidbah baroh un ïoh tip ba U Trai um pynim da ka waitlam lymne da u sum: namar ka jingïaleh thma ka long ka jong U Trai, bad un aiti noh ïa phi ha ka kti jong ngi.”

⁴⁸ Te haba uta u Philistia u la ïeng, bad ba u la wan hajan ban ïashem bad u Dabid, ynda kumta, u Dabid u la pynkloi, bad u la mareh sha uta u paidïapom ban ïashem bad uta u Philistia.

⁴⁹ Bad u Dabid u la buh ïa la ka kti ha la ka pla, bad u la shim nangta ïa u maw, bad u la shat, bad la dei ïa uta u Philistia na ka shyllangmat; te uta u maw u la ngam shapoh ka shyllangmat jong u, te u la kyllon pyrkup slup ha ka khyndew.

⁵⁰ Kumta, u Dabid u la jop ïa uta u Philistia da ka jingshat maw bad da u maw, bad u la shoh ïa uta u Philistia, bad u la pynïap ïa u; la um don ka waitlam ruh ha ka kti u Dabid.

⁵¹ Ynda kumta, u Dabid u la mareh, bad u la ïeng halor uta u Philistia, bad u la shim ïa ka waitlam jong u, bad u la sei noh ïa ka na kata ka jingsop, bad u la pynïap khoit ïa u, bad u la khrai noh ïa ka khlieh jong u da ka. Te haba kita ki Philistia ki la ïohi ba u la ïap u riewradbah jong ki, ki la phet ïap noh.

⁵² Bad ki paidbah Israel bad Judah ki la ïeng, bad ki la risa, bad ki la beh ïa ki Philistia, haduh kaba poi ha Gath, bad haduh ki khyrdop ka Ekron keiñ. Te kita ki Philistia ki la kyllon ba la pynmynsaw ïa ki ha kata ka lynti sha Shaaraim, jin haduh Gath, bad haduh Ekron de.

⁵³ Te ki khun Israel ki la wan phai noh na kaba beh ïa ki Philistia, bad ki la lute ïa ki ïingjaiñ jong ki.

⁵⁴ Te u Dabid u la shim ïa ka khlieh uta u Philistia bad u la wallam ïa ka sha Jerusalem; hynrei, ïa kata ka jingkieng atiar jong u, u la buh ha la ka ïingjaiñ.

⁵⁵ Te haba u Saul u la ïohi ïa u Dabid ba u da leit mih ban ïaleh bad uta u Philistia, u la kylli ïa u Abner u nongïalam u paidïapom, “Une u samla u khun jongno, ko Abner?” Te u Abner u la ïathuh, “Katba ka im ka mynsiem jong me, ko syiem, ngam tip.”

⁵⁶ Te uta u syiem u la ong, “To da kylli une u samla u long u khun jongno.”

⁵⁷ Te haba u Dabid u la wan phai noh na kaba pynïap ïa uta u Philistia, u Abner u la shim ïa u, bad u la ïalam ïa u ha khmat u Saul, te kata ka khlieh uta u Philistia ka la don ha ka kti jong u.

⁵⁸ Te u Saul u la kylli ïa u, “Me u khun jongno, ko samla?” Te u Dabid u la ïathuh, “Nga u khun u shakri jong me, u Jesse u nong Bethlehem.”