1 SAMUEL 16 - KA BAIBL

La pynsleh ïa u Dabid ban long syiem

¹ Bad U Trai u la ong ha u Samuel, “Men ïambriew ïa u Saul sa katno, haba nga, nga la kyntait ïa u na kaba long syiem halor ki Israel? To pyndap ïa kata ka reng jong me da ka umphniang, bad khie leit, ngan phah ïa me sha u Jesse u nong Bethlehem, naba nga la khreh ïa nga ïa u syiem napdeng ki khun shynrang jong u.”

² Te u Samuel u la ong, “Kumno ngan leit? Lada u Saul un ïohsngew, un pynïap ïa nga.” Bad U Trai u la ong, “To shim bad me da ka masi lud, bad ong, ‘Nga la wan ïa ka ban kñia ha U Trai.’

³ Bad to khot ïa u Jesse sha kata ka jingkñia, te ngan sa pyntip ha me ïa kaba me dei ban leh: me ruh men pynsleh ïa nga ïa uta uba ngan sa ïathuh ha me.”

⁴ Bad u Samuel u la leh ïa kata kaba la kren U Trai bad u la wan sha Bethlehem. Te kita ki tymmen basan kata ka shnong ki la sheptieng shikatdei haba ki la ïashem bad u, bad ki la ong, “Me wan ïa kaba suk?”

⁵ U te u la ïathuh, “Ïa kaba suk keiñ: nga la wan ïa ka ban kñia ha U Trai: to pynkyntang ïa lade, bad wan bad nga sha kata ka jingkñia.” Bad u la pynkyntang ïa u Jesse bad ïa ki khun shynrang jong u, bad u la khot ïa ki sha kata ka jingkñia.

⁶ Te haba ki la wan, u la khmih keiñ ïa u Eliab, bad u la ong, “Shisha uta uba la sleh jong U Trai u don ha khmat jong u.”

⁷ Hynrei, U Trai u la ong ha u Samuel, “Wat khmih ïa ka khmat jong u, lymne ïa ka jingjrong ka rynïeng jong u, namar nga la kyntait ïa u: naba U Blei um ju khmih kumba khmih u briew; naba u briew u ïohi tang ïa ka dur kaba shabar, hynrei, U Trai u ïohi ïa ka dohnud.”

⁸ Kumta, u Jesse u la khot ïa u Abinadab, bad u la phah ïa u ban leit ha khmat u Samuel. U te u la ong, “U Trai um shym la jied ïa une ruh.”

⁹ Kumta, u Jesse u la phah ïa u Shammah ban leit. U te u la ong, “Ïa une ruh U Trai um shym la jied.”

¹⁰ Ynda kumta, u Jesse u la phah hynñiew ngut na ki khun shynrang jong u ban leit ha khmat u Samuel. U Samuel te u la ong ha u Jesse, “U Trai um shym la jied ïa kine.”

¹¹ Bad u Samuel u la ong ïa u Jesse, “Ki khun jong me baroh tang kine?” U te u la ong, “U dang sah sa u bakhatduh, te ha khmih, u sharai ïa ki langbrot.” Bad u Samuel u la ong ha u Jesse, “To phah bad wallam ïa u: namar ngin ym ïashong tad ynda u la wan ma u shane.”

¹² U te u la phah, bad u la wallam ïa u. Te u la long uba saw syntiew, bad uba bhabriew ka khmat bad uba ibha ban khmih ïa u. U Trai te u la ong, “To khie, to pynsleh ïa u: namar u long une keiñ.”

¹³ Te u Samuel u la shim ïa kata ka reng umphniang, bad u la pynsleh ïa u hapdeng kita ki hynmen jong u: bad U Mynsiem U Trai u la wan jur ha u Dabid naduh kata ka sngi. Ynda kumta, u Samuel u la khie, bad u la leit sha Ramah.

U Dabid u tem duitara na ka bynta u Saul

¹⁴ Hynrei, U Mynsiem U Trai u la kynriah noh na u Saul, bad u mynsiem bymman na U Trai u la pynsheptieng ïa u.

¹⁵ Bad ki shakri u Saul ki la ïa-ong ha u, “Ha khmih, pleng u mynsiem bymman na U Blei u pynsheptieng ïa me.

¹⁶ To ai te ba u kynrad jong ngi un hukum ïa la ki shakri, kiba ha khmat jong me, ba kin wad da u briew uba nang tem duitara: te kan jia, haba uta u mynsiem bymman uba na U Blei u wan ha me, ba u ruh un tem da la ka kti, bad me ruh men bha.”

¹⁷ Bad u Saul u la ong ïa la ki shakri, “To pynwad ïa nga da u briew uba nang bha ban tem, bad to wallam ïa u ha nga.”

¹⁸ Te uwei na kita ki shakri u la ïathuh, bad u la ong, “Ha khmih, nga la ïohi ïa uwei u khun u Jesse u nong Bethlehem, uba nang ha kaba tem bad uba khlaiñ bor, bad u long u nongïaleh thma, bad uba stad ktien, bad uba bhabriew lymphuin, bad U Trai ruh u don ryngkat bad u.”

¹⁹ Namar kata, u Saul u la phah ïa ki nonglam-ktien sha u Jesse, bad u la ong, “To phah sha nga ïa u Dabid u khun jong me, uba bad ki langbrot.”

²⁰ Te u Jesse u la shim shi khung u kpu, bad shi lywa ka Waiñ bad u khun blang, bad u la phah ïa ki ha u Dabid u khun jong u, sha u Saul.

²¹ Te u Dabid u la wan ha u Saul, bad u la ïeng ha khmat jong u: u ruh u la ieit ïa u shikatdei: te u de u la long u nongrah atiar jong u.

²² Te u Saul u la phah sha u Jesse, u da ong, “Nga kyrpad ïa me, to shah ïa u Dabid ban sah ha khmat jong nga; namar u la shem ïa ka jingsngewbha ha khmat jong nga.”

²³ Te haba uta u mynsiem bymman uba na U Blei u la wan ha u Saul, kumta u Dabid u la shim ïa ka duitara, bad u la tem da la ka kti: te kumta, la pynshait ïa u Saul, bad la pynbha ïa u, bad uta u mynsiem bymman u la kynriah noh na u.