1 SAMUEL 15 - KA BAIBL

La kyntait ïa u Saul namar ka jingbymkohnguh jong u

¹ Te u Samuel u la ong ha u Saul, “U Trai u la phah ïa nga ban pynsleh ïa me ban long syiem halor u paidbah jong u, halor ki Israel keiñ: mynta te, to men sngap ïa ka jingsawa ki ktien U Trai.

² Kumne u ong U Trai ki paid, ‘Nga la kynmaw ïa kaba u la leh u Amalek ha ki Israel, kumno ba u la ïeng ïaleh ïa u ha ka lynti, mynba u la wan mih noh na ka ri Ijipt.

³ To khie mynta, bad to pom ïa ki Amalek, bad to pynjot noh khoit ïa kiei kiei baroh katba ki don, bad wat pynim ïa ki; hynrei, to men pynïap ïa ki bad shynrang bad kynthei, bad khynnah bad khunlung ba dang buiñ, bad masi bad langbrot, ki ut bad ki kadda.’ ”

⁴ Bad u Saul u la lum khar paid, bad u la ñiew ïa ki ha Telaim, arspah hajar ki briew ba-ïaleh na tbian, bad shiphew hajar ki Judah.

⁵ Te u Saul u la wan sha ka nongbah ki Amalek, bad u la ap thap ha ka them.

⁶ Bad u Saul u la ong ha ki Ken, “Khie noh, kynriah noh, leit hiar noh napdeng kine ki Amalek, ba ïoh ngan pynjot noh ïa phi lem bad ki: namar phi la leh isynei ïa ki khun Israel baroh, mynba ki la wan mih noh na ka ri Ijipt.” Kumta ki Ken ki la kynriah noh napdeng kita ki Amalek.

⁷ Bad u Saul u la pom ïa ki Amalek naduh Habilah haduh ban da poi sha Shur, kaba marpyrshah ka ri Ijipt.

⁸ Bad u la kem im ïa u Agag u syiem ki Amalek, bad u la pynïap noh khoit ïa kita ki briew baroh da ka syrti waitlam.

⁹ Hynrei, u Saul bad kita ki briew ki la ri im ïa u Agag, bad ïa ki babha tam na ki langbrot, bad na ki masi ïa kiba kham sngaid, bad ïa ki khun langbrot, bad ïa kiei kiei baroh ki babha, bad kim pynjot noh khoit ïa ki: hynrei, ïa kaei kaei baroh ka basniew bad ka bymdonkam, ïa kata ki la pynjot noh khoit.

¹⁰ Te ka ktien U Trai ka la wan ha u Samuel, ka da ong,

¹¹ “Nga la kylla-ka-bamut ïa kaba nga la thung syiem ïa u Saul: namar u phai dien noh na kaba bud ïa nga, bad um shym pyndep ïa ki hukum jong nga.” Te u Samuel u la sngewsih eh; bad u la lynñiar ha U Trai baroh shi miet.

¹² Te haba u Samuel u la khie dang step ïa ka ban ïashem bad u Saul kum lashai, te la ïathuh ha u Samuel da kaba ong, “U Saul u la leit sha Karmel, bad ha khmih, u la thung mawbynna ïa lade, bad u la ïaid kylleng, bad u la nang leit, bad u la leit hiar sha Gilgal.”

¹³ Te u Samuel u la poi sha u Saul: bad u Saul u la ong ha u, “To U Trai un kyrkhu ïa me: nga la pyndep ïa kata ka hukum U Trai.”

¹⁴ Bad u Samuel u la ong, “Haba kumta, kaei kane ka jingpah ki langbrot kaba ha ki shkor jong nga, bad kane ka jingpah ki masi kaba nga ïohsngew?”

¹⁵ Bad u Saul u la ïathuh, “Ki la wallam ïa ki na ki Amalek: namar u paidbah u la pynim ïa ki babha tam na ki langbrot bad na ki masi, ïa ka ban kñia ha U Trai uba U Blei jong me.”

¹⁶ Te u Samuel u la ong ha u Saul, “Ha sngap, ngan ïathuh te ha me ïa kaba U Trai u la kren ha nga mynhynne mynmiet.” U te u la ong, “To kren.”

¹⁷ Bad u Samuel u la ong, “La me la long uba ñiew rit ïa lade, la pynlong ne em ïa me u nongïalam ïa ki jaid Israel? Bad U Trai u la pynsleh ïa me ban long syiem halor ki Israel.

¹⁸ U Trai te u la phah leit jingleit ïa me, bad u la ong, ‘To leit bad pynjot noh khoit ïa kita ki bapop, kita ki Amalek keiñ, bad to ïaleh pyrshah ïa ki ha ban da la pynduh noh ïa ki.’

¹⁹ Namar kata te, balei ba mem shym la kohnguh ïa ka ktien U Trai, hynrei, me la kynrup sha kata ka jinglute, bad me la leh ïa ka basniew ha khmat U Trai?”

²⁰ Te u Saul u la ong ha u Samuel, “Da shisha nga la kohnguh ïa ka ktien U Trai, bad nga la leit ha kata ka lynti kaba U Trai u la phah ïa nga, bad nga la wallam ïa u Agag u syiem ki Amalek, bad nga la pynjot noh khoit ïa kita ki Amalek.

²¹ Hynrei, shisha u paidbah u la shim na kata ka jinglute, ïa ki langbrot bad ïa ki masi, ïa ki babha tam keiñ na kita kiba la dei ban pynjot, ïa ka ban kñia ha U Trai uba U Blei jong me ha Gilgal.”

²² Te u Samuel u la ong, “U Trai u sngewbha ma ha ki jingainguh thang bad ha ki jingkñia kumba ha kaba kohnguh ïa ka ktien U Trai? Ha khmih, kaba kohnguh ka kham bha ban ïa ka jingkñia, bad kaba shahshkor ban ïa ka khleiñ ki 'lang sohmoh.

²³ Namar ka jingleh kiat ka long kat ka pop ka jingleh byrtong hi, bad ka jingmutlop ka long kum kaba mane bleithaw bad ki teraph. Namar ba me la kyntait ïa ka ktien U Trai, ma u ruh u la kyntait ïa me na kaba long syiem.”

²⁴ Te u Saul u la ong ha u Samuel, “Nga la leh pop: namar ba nga la palat ïa ka hukum U Trai, bad ïa ki ktien jong me: naba nga la sheptieng ïa ki paidbah, bad ba nga la kohnguh ïa ki ktien jong ki.

²⁵ Hynrei mynta, nga kyrpad ïa me, to map ïa kane ka pop jong nga, bad to wan phai ryngkat bad nga, ba ngan ïoh mane ïa U Trai.”

²⁶ Te u Samuel u la ong ha u Saul, “Ngan ym leit phai bad me: naba me, me la kyntait ïa ka ktien U Trai, bad U Trai ruh u la kyntait ïa me na kaba long syiem halor ki Israel.”

²⁷ Bad haba u Samuel u la phai ïa ka ban leit noh, u ruh u la bat na ka rmiang ka jaiñkup jong u, bad ka la kad.

²⁸ Te u Samuel u la ong ha u, “U Trai u la kad noh ïa ka hima Israel na me ha kane ka sngi, bad u la aiti noh ïa ka ha uwei u paramarjan jong me, uba kham bha ïa me.

²⁹ Ruh putet, uba Ka Bor ki Israel un ym lamler lymne kylla-ka-bamut; namar ma u um long u briew, ba un kylla-ka-bamut.”

³⁰ Ynda kumta, u la ong, “Nga la leh pop: pynban, nga kyrpad ïa me, to burom ïa nga mynta, ha khmat ki tymmen basan ki paidbah jong nga, bad ha khmat ki Israel, bad to wan phai bad nga ba ngan ïoh mane ïa U Trai uba U Blei jong me.”

³¹ Kumta, u Samuel u la phai pat hadien u Saul; bad u Saul u la mane ïa U Trai.

³² Te u Samuel u la ong, “To wallam noh shane sha nga ïa u Agag u syiem ki Amalek.” Bad u Agag u la wan sha u da kaba phuhmat. Bad u Agag u la ong, “Shisha ka jingkthang ka jingïap ka la leit noh.”

³³ Te u Samuel u la ong, “Kat kumba ka waitlam jong me ka la pynduh khun ïa ki kynthei, kumta ïa ka kmie jong me yn pynduh khun hapdeng ki kynthei.” Bad u Samuel u la shaiñ lyngkhot lyngkhai ïa u Agag ha khmat U Trai ha Gilgal.

³⁴ Ynda kumta, u Samuel u la leit noh sha Ramah; bad u Saul u la leit kiew sha la ïing sha Gibeah u Saul.

³⁵ Te u Samuel um shym wan shuh ban khmih ïa u Saul haduh ka sngi ka jingïap jong u; pynban, u Samuel u la ïambriew namar u Saul: bad U Trai u la kylla-ka-bamut ïa kaba u la thung syiem ïa u Saul halor ki Israel.