1 SAMUEL 14 - KA BAIBL

¹ Te ha kawei ka sngi ka la jia, ba u Jonathan u khun u Saul u la ong ha uta u samla uba rah ïa ki atiar jong u, “Ïa, ngin ïaleit sha shiliang sha kata ka karod ki Philistia sha lyndet.” Hynrei, um shym ïathuh ïa la u kpa.

² Bad u Saul u la sah ha ka bakut eh ka Gibeah, hapoh u dieng soh Pong uba ha Migron: bad kita ki briew kiba bad u, ki la don kumba hynriewspah ki rangbah;

³ bad u Ahijah, u khun u Ahitub, uba u hynmen u Ikhabod, u khun u Phinehas, uba u khun u Eli, u lyngdoh U Trai ha Sheiloh, u phong ïa ka ephod. Te kita ki paidbah kim shym tip ba u Jonathan u la leit noh.

⁴ Te hapdeng kita ki phud wah, ha kiba u Jonathan u la pyrshang ban ryngkang sha kata ka karod ki Philistia, la don u mawsiang uba riat eh ha kawei ka liang, bad u mawsiang uba riat eh ha kawei pat ka liang: te ka kyrteng uwei ka la long “Boses”, bad ka kyrteng uta uwei “Seneh”.

⁵ Ka ranab jong uwei ka la don shaphang shatei ha marpyrshah ka Mikhmash, bad ka jong uta uwei na shathie ha marpyrshah ka Geba.

⁶ Bad u Jonathan u la ong ha uta u samla uba rah ïa ki atiar jong u, “Ïa ngin ïaryngkang sha kata ka karod jong kine kiba khlem otsher: lehse U Trai un ïatrei lem bad ngi: namar ym don ka jingwit ïa U Trai ban pynim da ki babun lane da ki bakhyndiat.”

⁷ Te uta uba rah ïa ki atiar jong u, u la ong ha u, “To leh ïa kiei kiei baroh katba don ha ka dohnud jong me; to phai, ha khmih nga don ryngkat bad me katba mon ka dohnud jong me.”

⁸ U Jonathan te u la ong, “Ha khmih, ngin ïaryngkang sha kine ki briew, bad ngin pynpaw ïa lade ha ki.

⁹ Lada kin ong kumne ïa ngi, ‘To da ap tad ynda ngin wan sha phi;’ kumta ngin sah ha la ka jaka, bad ngin ym leit kiew sha ki.

¹⁰ Hynrei, lada kin ong kumne, ‘To wan kiew sha ngi’; kumta ngin leit kiew: namar U Trai u la aiti noh ïa ki ha ka kti jong ngi: bad kane kan long ka dak ïa ngi.”

¹¹ Bad ki la pynpaw ïa lade baroh ar ngut ha kata ka karod ki Philistia: bad kita ki Philistia ki la ong, “Ha khmih, kita ki Hebru ki mih noh na kita ki thliew ha kiba ki la buhrieh ïa lade.”

¹² Bad kita ki briew kiba na kata ka karod ki la ïathuh ha u Jonathan bad ha uta uba rah ïa ki atiar jong u, bad ki la ong, “Wan kiew artet sha ngi, te ngin pyni ei ei ha phi.” Bad u Jonathan u la ong ha la u nongrah atiar, “Ale, bud ïa nga artet: namar U Trai u la aiti noh ïa ki ha ka kti ki Israel.”

¹³ Bad u Jonathan u la par artet da la ki kti bad da la ki kjat, bad uta uba rah ïa ki atiar jong u, u bud na shadien: bad ki la kyllon ïap ha khmat u Jonathan; bad uta uba rah ïa ki atiar u la pynïap na shadien jong u.

¹⁴ Te kata ka jingpynïap ka banyngkong, kaba u Jonathan bad u nongrah atiar jong u ki la pynlong, ka la long arphew ngut ki briew, ha kumba shiteng lynter ka nur lyngkor ha shi bigah ka khyndew.

¹⁵ Bad la don ka jingkyiuh ha ka jaka shong dara, ha lyngkha, bad hapdeng ki briew baroh; kata ka karod, bad kita ki nonglute, ki ruh ki la kyiuh: bad ka khyndew ruh ka la khynñiuh; kumta ka la long ka jingkyiuh ka bakhraw eh.

¹⁶ Bad ki nongap phira jong u Saul ha Gibeah u Benjamin ki la khmih; te ha khmih, u paidbah u la ïasaphred noh, bad ki la phet shane bad shawei.

¹⁷ Ynda kumta, u Saul u la ong ha kita ki briew kiba bad u, “To ñiew mynta, bad to khmih uei uba la leit noh na ngi.” Te haba ki la ñiew, ha khmih, u Jonathan bad uta u nongrah atiar jong u kim don hangta.

¹⁸ Bad u Saul u la ong ha u Ahijah, “To wallam shane ïa ka synduk U Blei,” namar ka synduk U Blei ka la don bad ki khun Israel ha kata ka por.

¹⁹ Te katba u Saul u dang ïakren bad uta u lyngdoh, kata ka jingkhihwin kaba ha ka jaka shong dara ki Philistia ka dang don bad ka la nang khraw: bad u Saul u la ong ha uta u lyngdoh, “Kynran noh ïa la ka kti.”

²⁰ Te u Saul bad kita ki briew baroh kiba bad u, ki la ïalum lang, bad ki la wan sha ka thma: te ha khmih, ka waitlam jong uwei pa uwei ka la ïaleh ïa la u lok, bad ka la don ka jingpynjot kaba khraw eh.

²¹ Kita ki Hebru ruh kiba la don bad ki Philistia mynshuwa, kiba la leit kiew lem bad ki sha kata ka jaka shong dara na ka ri kylleng, ki ruh ki la kylla ban long ryngkat bad kita ki Israel kiba bad u Saul bad u Jonathan.

²² Kumjuh ruh kita ki rangbah Israel baroh kiba la buhrieh ïa lade ha ri lum Ephraim, haba ki la ïohsngew ba ki la phet ïap ki Philistia, ki ruh ki la beh eh nadien jong ki ha kata ka thma.

²³ Kumta U Trai u la pynim ïa ki Israel ha kata ka sngi: bad kata ka jingïaleh thma ka la ïaid sha shiliang haduh Beth-aben.

²⁴ Te ki rangbah Israel ki la pisa ha kata ka sngi: naba u Saul u la pynsmai ïa ki briew, u da ong, “Long ba la tim ïa uta u briew uba bam jingbam haduh ba la janmiet, ba ngan ïoh pynhiar kput halor ki nongshun jong nga.” Kumta ym shym don uwei na kita ki briew uba la mad jingbam ei ei.

²⁵ Bad kita ki briew baroh ki la poi sha kawei ka khlaw; bad ka la don ka ngap halor ka khyndew.

²⁶ Te haba kita ki briew ki la poi sha kata ka khlaw, ha khmih, ka ngap ka la jaw noh: hynrei, ym shym don uwei u briew uba la rah ïa la ka kti ha la ka shyntur; naba ki briew ki la sheptieng ïa kata ka jingsmai.

²⁷ Hynrei, u Jonathan um shym ïohsngew haba u kpa jong u, u la pynsmai ïa ki briew: namar kata, u la pynmih ïa ka tduh uta u dieng uba ha ka kti jong u, bad u la wieh ïa u ha ka rewngap, bad u la rah ïa la ka kti ha la ka shyntur; te ki khmat jong u ki la shai.

²⁸ Te uwei na kita ki briew u la ïathuh, bad u la ong, “U kpa jong me u la hukum skhem ïa ki briew da ka jingsmai, u da ong, ‘Long ba la tim ïa uta u briew u ban bam jingbam ha kane ka sngi.’ Te ki briew ki la sngewlwait.”

²⁹ Te u Jonathan u la ong, “U kpa jong nga u la pynshitom ïa ka ri: khmih mynta, nga kyrpad ïa phi, kumno ba la pynshai ïa ki khmat jong nga, namar ba nga la mad khyndiat na kane ka ngap.

³⁰ Katno tam te, lada ha kane ka sngi ki briew ki la ïoh ban bam katba mon na kata ka jinglute na ki nongshun jong ki, ïa kaba ki la ïoh? kam la long ka jingpynïap kaba kham khraw shikatdei hapdeng kine ki Philistia?”

³¹ Te ki la pynïap ïa ki Philistia ha kata ka sngi naduh Mikhmash haduh Aijalon: bad ki briew ki la sngewlwait eh.

³² Bad kita ki briew ki la kynrup ïa ka jinglute, bad ki la shim ïa ki langbrot, bad ïa ki masi, bad ïa ki khun masi, bad ki la shohdoh ïa ki halor ka khyndew: bad kita ki briew ki la bam ïa ki lem bad ka snam.

³³ Ynda kumta, ki la ïathuh ha u Saul, ki ïa-ong, “Ha khmih, kine ki briew ki leh pop ïa U Trai, ha kaba ki bam lem bad ka snam.” Te u la ong, “Phi la leh bymman: pyntyllun sha nga ïa u maw baheh ha kane ka sngi.”

³⁴ Bad u Saul u la ong, “To ïaphriang ïa lade hapdeng kine ki briew, bad ong ha ki, ‘To wallam shane sha nga uwei uwei ïa la u masi, bad uwei uwei ïa la ka langbrot, bad pynïap ïa ki hangne, bad bam: bad to wat leh pop ïa U Trai da kaba phi bam lem bad ka snam.’ ” Bad ha kata hi ka miet kita ki briew baroh ki la wallam lem bad ki uwei uwei ïa la u masi, bad ki la shohdoh ïa ki hangta.

³⁵ Bad u Saul u la tei ïa ka duwan ha U Trai: kata ka la long ka duwan ka banyngkong ba u la tei ha U Trai.

³⁶ Te u Saul u la ong, “To ngin ïahiar nadien kine ki Philistia mynmiet, bad ngin lute ïa ki haduh ba kan da shai mynstep, bad ngin ym pynsah uwei ruh na ki.” Ki te ki la ong, “To leh ïa kaba me ibit.” Te uta u lyngdoh u la ong, “To ngin ïaleit hajan shane sha U Blei.”

³⁷ Bad u Saul u la kylli na U Blei, “Ngan leit hiar ne em hadien kine ki Philistia? ma me ruh men aiti noh ne em ïa ki ha ka kti ki Israel?” Hynrei, um shym phai ktien ha u ha kata ka sngi.

³⁸ Bad u Saul u la ong, “To ïawan hajan shane, phi ki nongïalam baroh jong kine ki briew: bad to wad to khmih ruh ha-ei ka la don kane ka pop ha kane ka sngi.

³⁹ Naba, katba im U Trai, uba pynim ïa ki Israel, la kane ka don wat ha u Jonathan u khun jong nga, da kaba ïap un ïap shisha.” Hynrei, na kita ki briew baroh ym shym don uwei uba la phai ktien ïa u.

⁴⁰ U te u la ong ha ki Israel baroh, “To long ma phi ha kawei ka liang, te ma nga bad u Jonathan u khun jong nga ngin ïalong ha kawei pat ka liang.” Bad kita ki briew ki la ong ha u Saul, “To leh katba me ibit.”

⁴¹ Namar kata, u Saul u la ong ha U Trai, U Blei ki Israel, “To pyni ïa ka hok.” Te la bat ïa u Saul bad u Jonathan: hynrei, kita ki briew ki la lait.

⁴² Bad u Saul u la ong, “To pynnoh ïa ka jingkhalai hapdeng jong nga bad u Jonathan u khun jong nga.” Bad la bat ïa u Jonathan.

⁴³ Ynda kumta, u Saul u la ong ha u Jonathan, “To ïathuh ha nga me la leh aïu.” Bad u Jonathan u la ïathuh ha u, bad u la ong, “Tang kaba shu mad khyndiat ka ngap da ka tduh uta u dieng uba la don ha ka kti jong nga; te ha khmih, ka la dei ïa nga ban ïap pleng.”

⁴⁴ U Saul te u la ong, “U Blei un leh kumta bad tam ruh: naba men ïap shisha, ko Jonathan.”

⁴⁵ Te kita ki briew ki la ong ha u Saul, “Hato un ïap u Jonathan, uba la pynlong ka jingpynim kaba khraw kat kane ha Israel? Kan ym long kumta, em: katba im U Trai, in ym hap iwei na ki 'ñiuh khlieh jong u ha ka khyndew; namar u la trei ryngkat bad U Blei ha kane ka sngi.” Kumta, kita ki briew ki la pynim ïa u Jonathan, ba um shym ïap.

⁴⁶ Kumta, u Saul u la leit kiew noh na kaba beh ïa ki Philistia: bad ki Philistia ki la leit noh sha la ka jong ka jaka.

⁴⁷ Te haba u Saul u la shimti ïa ka jinglong syiem halor ki Israel, u la ïaleh thma ïa la ki nongshun baroh kylleng, ïa ki Moab, bad ïa ki khun u Ammon, bad ïa ka Edom, bad ïa ki syiem Sobah, bad ïa ki Philistia de: bad shano shano ba u la phai la ka khmat, u la jop.

⁴⁸ Bad u leh shlur, bad u la pom ïa ki Amalek, bad u la pyllait ïa ki Israel na ki kti jong kita kiba lute ïa ki.

⁴⁹ Te ki khun shynrang u Saul ki la long u Jonathan, bad u Ishbi, bad u Melkhi-shua de: bad ki kyrteng ki ar ngut ki khun kynthei jong u kine; ka kyrteng ka banyngkong “ka Merab”, bad ka kyrteng ka bakhatduh “ka Mikhal”:

⁵⁰ bad ka kyrteng ka tnga u Saul, “ka Ahinoam” ka khun u Ahimaas: bad ka kyrteng u nongïalam u paidïapom jong u, “u Abner” u khun u Ner, u kñi u Saul.

⁵¹ Te u Kish u la long u kpa jong u Saul; bad u Ner u kpa u Abner u la long u khun u Abiel.

⁵² Bad la don ka jingïaleh thma kaba jur bad ki Philistia baroh ki sngi jong u Saul; bad haba u Saul u ïohi ïa uno uno u rangbah uba khlaiñ bad uba shlur u la ju shim ïa u ha lade.