1 SAMUEL 13 - KA BAIBL

Ka jingïaleh thma bad ki Philistia

¹ U Saul u la synshar shi snem: bad haba u la synshar ar snem halor ki Israel,

² u Saul u la jied ha u, lai hajar ngut na ki Israel: ar hajar ki la don bad u Saul ha Mikhmash bad ha u lum Bethel, bad shi hajar bad u Jonathan ha Gibeah u Benjamin: te kita kiwei na u paidbah u la phah uwei uwei sha la ka jong ka jong ka ïingjaiñ.

³ Bad u Jonathan u la pom ïa ka karod ki Philistia kaba ha Geba, te ki Philistia ki la ïohsngew ïa kata. Bad u Saul u la put da ka ronsing kylleng ka ri baroh, da kaba ong, “To kin ïohsngew ki Hebru.”

⁴ Bad ki Israel baroh ki la ïohsngew ïa kaba ong ba u Saul u la pom ïa ka karod ki Philistia, bad ba ki Philistia ki la isih ïa ki Israel. Te ki paidbah ki la ïalum lang ban leit bud ïa u Saul sha Gilgal.

⁵ Bad ki Philistia ki la ïalum lang ban ïaleh thma ïa ki Israel, laiphew hajar ki kali ïapom, bad hynriew hajar ki shipai bashong kulai, bad u paidbah byllien kat u shyiap uba harud ha duriaw: bad ki la wan kiew bad ki la ïasher dara ha Mikhmash, shaphang mihngi na Beth-aben.

⁶ Haba ki rangbah Israel ki la ïohi ba ki la hap ha kaba khim, (naba u paidbah u la pisa eh,) hangta ki paidbah ki la buhrieh ïa lade ha ki krem, bad ha ki bniap, bad ha ki mawsiang, bad ha ki kut bajrong, bad ha ki thliew um.

⁷ Bad na ki Hebru don kiba la leit sha shiliang ka Jordan sha ka ri Gad bad Gilead; u Saul te u dang sah ha Gilgal, bad kita ki paidbah baroh ki la bud ïa u ki da kyiuh that that.

⁸ Te u la ap hynñiew sngi, haduh kata ka por ba la buh da u Samuel; hynrei, u Samuel um pat poi sha Gilgal, bad kita ki paidbah ki la ïasakma noh na u.

⁹ Bad u Saul u la ong, “To wallam hangne ha nga ïa ka jingainguh thang bad ïa ki jingainguh pynïasuk.” Bad u la ainguh ïa kata ka jingainguh thang.

¹⁰ Te haba u dang shu lah ainguh ïa kata ka jingainguh thang, ha khmih, u Samuel u la wan; bad u Saul u la mih ïa ka ban leit tan ïa u, ba un ïoh khublei ïa u.

¹¹ Bad u Samuel u la ong, “Me la leh aïu?” Bad u Saul u la ïathuh, “Namar ba nga la ïohi ba ki briew ki la sakma na nga, bad ba mem wan ha kita ki sngi ba la buh, bad ba ki Philistia ki la ïalum lang ha Mikhmash;

¹² namar kata, nga la ong, ‘Mynta kine ki Philistia kin wan hiar ha nga sha Gilgal, bad nga ruh ngam shym ïoh kyrpad ïa ka jingisynei U Trai:’ namar kata, nga la nud, bad nga la ainguh ïa ka jingainguh thang.”

¹³ Te u Samuel u la ong ha u Saul, “Me la leh bieit: mem shym la sumar ïa ka hukum U Trai uba U Blei jong me, ïa kaba u la hukum ïa me: namar U Trai toi un da pynskhem mynta ïa ka jinglong syiem jong me halor ki Israel junom.

¹⁴ Hynrei, mynta, ka jinglong syiem jong me kan ym neh: U Trai u la wad ha u ïa u briew uba katba kum ka dohnud jong U hi, bad U Trai u la thung ïa uta ban long u nongïalam halor ki briew jong U, namar ma me mem shym la sumar ïa kata kaba U Trai u la hukum ïa me.”

¹⁵ Bad u Samuel u la ïeng, bad u la leit kiew na Gilgal sha Gibeah u Benjamin. Te u Saul u la ñiew ïa kita ki briew kiba sah ryngkat bad u, kumba hynriewspah ki rangbah.

¹⁶ Bad u Saul, bad u Jonathan u khun jong u, bad kita ki briew kiba sah ryngkat bad ki, ki la shong ha Geba u Benjamin: hynrei, ki Philistia ki la shong dara ha Mikhmash.

¹⁷ Bad ki la mih noh na ka jaka shong dara ki Philistia ki nonglute lai kynhun: kawei ka kynhun ka la phai sha ka lynti kaba lam sha Ophrah, ha ka ri Shual:

¹⁸ bad kawei pat ka kynhun ka la phai sha ka lynti Beth-horon: bad kata kawei ka kynhun ka la phai sha lynti jong kata ka pud kaba hiar arsut sha ka them Seboim shaphang ka ri khlaw keiñ.

¹⁹ Te ha ka ri Israel baroh ym shym don kamar: namar ki Philistia ki la ong, “Ïoh ba kine ki Hebru kin thaw ha ki, ki waitlam lane ki sum”:

²⁰ hynrei, ki Israel baroh ki la ju leit hiar sha ki Philistia, ïa ka ban pynnep uwei uwei ïa la u phar, bad ïa la u nar lyngkor, bad ïa la u sdie, bad ïa la u mohkhiew;

²¹ hynrei, ki la don syrti ïa ki mohkhiew, bad ïa ki nar lyngkor, bad ïa ki proh, bad ïa ki sdie; bad ïa ka ban thung nar ha u dieng tyndung.

²² Kumta, ha kata ka sngi ba ïaleh thma, ym shym shem ïa ka waitlam lymne sum ha ka kti jongno jongno na kita ki briew kiba bad u Saul bad u Jonathan: sa tang kita hi kiba la shem ha u Saul bad u Jonathan u khun jong u.

²³ Te ïa ka karod ki Philistia la pynmih noh sha ki phud wah Mikhmash.