1 SAMUEL 12 - KA BAIBL

Ka khubor u Samuel ïa ki paidbah

¹ Bad u Samuel u la ong ha ki Israel baroh, “Ha khmih, nga la sngap ïa ka ktien jong phi ha kiei kiei baroh ba phi la ong ha nga, bad nga la thung syiem halor jong phi.

² Te mynta, ha khmih, u syiem u ïaid ha khmat jong phi: nga te nga la tymmen bad nga la phuh 'ñiuhlieh; bad ha khmih, ki khun jong nga ki don bad phi: bad nga la ïaid ha khmat jong phi naduh ba nga dang samla haduh kane ka sngi.

³ Ha khmih ïa nga: to sakhi pyrshah ïa nga ha khmat U Trai, bad ha khmat uba la sleh jong u: u masi dab jongno nga la shim? lane ka kadda jongno nga la shim? lane ïano nga la shukor? ïano nga la banbeiñ? lane na ka kti jongno nga la shim sap ban pynmatlah ïa la ki khmat da ka? te ngan buria ïa kata ha phi.”

⁴ Ki te ki la ong, “Mem shym la shukor ïa ngi, lymne banbeiñ ïa ngi, lymne mem shym la shim ei ei na kti jongno jongno ruh.”

⁵ Bad u la ong ha ki, “U Trai u long sakhi pyrshah ïa phi, bad uba la sleh jong U, u long sakhi ha kane ka sngi, ba phim shym la shem ei ei ha ka kti jong nga.” Ki ruh ki la ong, “U long sakhi keiñ.”

⁶ Bad u Samuel u la ong ha u paidbah, “U long U Trai keiñ uba la thung ïa u Moses bad u Aaron, bad uba la wallam noh ïa ki kpa jong phi na ka ri Ijipt.

⁷ Mynta te, to ïeng, ba ngan ïasaid bad phi ha khmat U Trai shaphang ki jinglehhok ki jong U Trai baroh, ïa kiba u la leh ha phi bad ha ki kpa jong phi.

⁸ Mynba u Jakob u la poi sha Ijipt, bad ki kpa jong phi ki la ïam ha U Trai, hangta U Trai u la phah ïa u Moses bad u Aaron, kiba la wallam noh ïa ki kpa jong phi na Ijipt, bad ki la pynshong ïa ki ha kane ka jaka.

⁹ Ki, hynrei, ki la klet noh ïa U Trai U Blei jong ki, U ruh U la die noh ïa ki ha ka kti u Sisera, u rangbah u paidïapom jong u Hasor, bad ha ka kti ki Philistia, bad ha ka kti u syiem ka Moab, bad ki la ïaleh thma ïa ki.

¹⁰ Te ki la ïam ha U Trai, bad ki la ong, ‘Ngi la leh pop, namar ba ngi la iehnoh noh ïa U Trai, bad ngi la shakri ïa ki Baal bad ki Ashtaroth: hynrei, mynta to pynim ïa ngi na ka kti ki nongshun jong ngi, te ngin shakri ïa me.’

¹¹ Bad U Trai u la phah ïa u Jerubbaal, bad u Bedan, bad u Jephthah, bad u Samuel, bad u la pyllait ïa phi na ka kti ki nongshun jong phi kylleng, bad phi la shong ha kaba suk.

¹² Bad haba phi la ïohi ba u Nahash u syiem ki khun u Ammon u wan ïaleh ïa phi, phi la ong ha nga, ‘Em, hynrei, u syiem un synshar halor jong ngi:’ haba U Trai uba U Blei jong phi u la long u syiem jong phi ruh.

¹³ Mynta te, khmih ïa u syiem ïa uba phi la jied, bad ïa uba phi la pan: bad ha khmih, U Trai u la buh syiem halor jong phi.

¹⁴ Lada phin sheptieng ïa U Trai, bad shakri ïa u, bad sngap ïa ka ktien jong u, bad phin ym ïaleh pyrshah ïa ka hukum U Trai, kumta ma phi bad uta u syiem ruh uba synshar halor jong phi phin long ki nongbud ïa U Trai uba U Blei jong phi:

¹⁵ hynrei, lada phin ym sngap ïa ka ktien U Trai, hynrei, phin ïaleh pyrshah ïa ka hukum U Trai, kumta ka kti U Trai kan long pyrshah ïa phi, kumba ka la long pyrshah ïa ki kpa jong phi.

¹⁶ Mynta, namar kata, to ïeng bad to khmih ïa kane kaba khraw, kaba U Trai un leh, ha kaba i ki khmat jong phi.

¹⁷ Mynta kam long ka aïom ot Kew? Ngan khot kyrpad ha U Trai, te un phah ïa u pyrthat bad u slap: bad phin ïoh tip phin ïohi ruh ba kaba khraw ka jingbymman jong phi, kaba phi la leh ha khmat U Trai, ha kaba phi pan syiem.”

¹⁸ Kumta u Samuel u la khot kyrpad ha U Trai; te U Trai u la phah ïa u pyrthat bad u slap ha kata ka sngi: bad u paidbah baroh u la sheptieng shikatdei ïa U Trai bad ïa u Samuel.

¹⁹ Te u paidbah baroh u la ong ha u Samuel, “To duwai na ka bynta ki shakri jong me ha U Trai uba U Blei jong me, ba ngin ym ïap: namar ngi la pynlang ha ki pop jong ngi baroh sa kane ka jingbymman, ha kaba pan syiem.”

²⁰ U Samuel te u la ong ha u paidbah, “Wat sheptieng: phi la leh shisha ïa kane ka jingbymman baroh: pynban, wat kiar noh na kaba bud ïa U Trai, hynrei, to shakri ïa U Trai da ka dohnud jong phi baroh;

²¹ bad wat kiar noh: naba kumta phi la leit bud ïa kiei kiei kiba thala ki bym lah pynmyntoi lymne pyllait, naba ki long kiba thala keiñ.

²² Naba U Trai un ym kyntait ïa la ki briew na ka bynta ka kyrteng kaba khraw jong u: namar U Trai u la ibit ban pynlong ïa phi u paidbah ha u hi.

²³ Ma nga ruh, ngan nai ba ngan leh pop pyrshah ïa U Trai da kaba wai noh ban duwai na ka bynta jong phi: hynrei, ngan hikai ha phi ïa kata ka lynti ka babha bad kaba dei.

²⁴ Tang ba phin sheptieng ïa U Trai, bad shakri ïa u ha kaba shisha da ka dohnud jong phi baroh: naba to pyrkhat ïa kaba katno kiba khraw u la leh na ka bynta jong phi.

²⁵ Hynrei, lada phin ïai-leh bymman, yn pynjot noh ïa phi, ïa phi bad ïa u syiem jong phi.”