1 SAMUEL 11 - KA BAIBL

U Saul u jop ïa ki Ammon

¹ Ynda kumta, u Nahash u nong Ammon u la leit kiew, bad u la sher dara ïaleh pyrshah ïa ki Jabesh-gilead: te ki nong Jabesh-gilead ki la ïa-ong ha u Nahash, “To pynlong ka jutang bad ngi, te ngin shakri ïa me.”

² Te u Nahash u nong Ammon u la ong ha ki, “Ngan pynlong ïa ka bad phi da kumne, ba ngan ïoh khlaw noh ïa ka khmat kamon jong phi baroh; bad ngan buh ïa kane ba kan long kaba jahburom halor ki Israel baroh.”

³ Bad ki tymmen basan jong ka Jabesh ki la ong ha u, “To shah ïa ngi hynñiew sngi, ba ngin ïoh phah ki nonglam-ktien sha ki phang ka Israel baroh: hadien kata te, lada ym don ban pynim ïa ngi, ngin mih shabar sha me.”

⁴ Te kita ki nonglam-ktien ki la wan sha Gibeah u Saul, bad ki la kren ïa kine ki ktien ha kaba ïohsngew u paidbah: te u paidbah baroh u la pynjam ïa la ka ktien, bad u la ïam.

⁵ Te ha khmih, u Saul u dang wan ñiah ïa ki masi na lyngkha; bad u Saul u la ong, “Na ka balei ba u ïam u paidbah?” Te ki la ïathuh ha u ïa ki ktien jong ki rangbah Jabesh.

⁶ Te U Mynsiem U Blei u la wan jur ha u Saul haba u la ïohsngew ïa kita ki ktien, bad ka jingbitar jong u ka la meh shikatdei.

⁷ Bad u la shim shi jur ki masi dab, bad u la ot lyngkhot ïa ki, bad u la phah ïa ki ha ki phang ka Israel baroh da ka kti ki nonglam-ktien, u da ong, “Jar u ban ym wan mih hadien u Saul bad hadien u Samuel, kumta yn leh ha ki masi dab jong u.” Te ka jingsheptieng U Trai ka la hap ha u paidbah, bad ki la wan mih ryntih.

⁸ Bad u la kheiñ ïa ki ha Besek; te ki khun Israel ki la long laispah hajar bad ki rangbah Judah laiphew hajar.

⁹ Bad ki la ong ha kita ki nonglam-ktien kiba la wan, “Kumne phin ong ha ki rangbah Jabesh-gilead, ‘Lashai, hamar ba la shit ka sngi, phin ïohlait im.’ ” Te kita ki nonglam-ktien ki la wan ïathuh ha ki Jabesh; ki te ki la sngewkmen.

¹⁰ Namar kata, ki Jabesh ki la ong, “Lashai ngin wan mih sha phi, bad phin leh ïa ngi ïa kiei kiei baroh katba phi ibit.”

¹¹ Te ha kaba lashai, u Saul u la pynlong lai kynhun ïa u paidbah; bad ki la wan hapdeng kata ka jaka shong dara ha ka jingap kaba mynstep, bad ki la pom ïa ki Ammon haduh kaba la shit ka sngi: te ïa kita kiba sah la pynsaphred, ba kumta ym don na ki kiba la sah ryngkat ar ngut.

¹² U paidbah te u la ong ha u Samuel, “Uei uta uba la ong, ‘Une u Saul un synshar halor jong ngi?’ To wallam ïa kita ki briew, ba ngin pynïap ïa ki.”

¹³ Te u Saul u la ong, “Yn ym pynïap ïano ïano ha kane ka sngi: naba ha kane ka sngi, U Trai u la pynlong ka jingpynim ha Israel.”

¹⁴ Hangta u Samuel u la ong ha u paidbah, “Ïa ngin ïaleit sha Gilgal ban pynthymmai ïa ka jinglong syiem hangta.”

¹⁵ Bad u paidbah baroh u la leit sha Gilgal; bad hangta ki la pynlong syiem ïa u Saul ha khmat U Trai ha Gilgal; bad hangta ki la kñia ki jingkñia da ki jingainguh pynïasuk ha khmat U Trai; bad hangta u Saul bad ki rangbah Israel baroh ki la leh kmen shikatdei.