1 SAMUEL 10 - KA BAIBL

¹ Ynda kumta, u Samuel u la shim shi tyndong ka umphniang, bad u la theh ïa ka halor ka khlieh jong u, bad u la doh ïa u, bad u la ong, “Hato U Trai um shym la pynsleh ïa me ban long u nongïalam halor ka bynta jong u?

² Mynta ka sngi keiñ ynda me la leit noh na nga, men shem ïa ar ngut ki briew hajan ka jingtep ka Rakhel, ha ka pud Benjamin ha Selsah; bad kin ong ïa me, ‘La shem ïa kita ki kadda ïa kiba me la leit wad: te ha khmih, u kpa jong me u la wai noh shaphang ki kadda, bad u khuslai shaphang jong phi, u da ong, “Ngan leh kumno shaphang u khun jong nga?” ’

³ Nangta te men nang leit, bad men poi sha u dieng Sning Tabor, bad hangta kin ïashem bad me lai ngut ki briew kiba leit kiew ha U Blei sha Bethel, uwei u da rah lai tylli ki khun blang, uwei pat u da rah lai tylli ki kpu, bad uwei pat u da rah shi lywa ka Waiñ:

⁴ te kin khublei ïa me, bad kin ïa-ai ïa me ar tylli ki kpu; ma me ruh men shim ïa ki na ka kti jong ki.

⁵ Hadien kata, men poi sha u lum U Blei, ha kaba don ka karod ki Philistia: te ynda me la poi shata sha ka shnong, men ïashem bad u paidbah ki nongïathuhlypa ki da hiar na kata ka jaka jrong, ki da don ruh ha shuwa jong ki ka bela, bad ka kanjari, bad ka sharati, bad ka duitara de; ba ki dang ïathuhlypa:

⁶ bad U Mynsiem U Trai un wan jur ha me, bad ma me hi ruh men ïathuhlypa lem bad ki, bad yn pynkylla kum uwei pat u briew ïa me.

⁷ Te ynda kin jia kine ki dak ïa me, to leh katba me shem lad; namar U Blei u don ryngkat bad me.

⁸ Bad men leit hiar ha shuwa jong nga sha Gilgal; bad ha khmih, nga ruh ngan sa wan hiar sha me, ïa ka ban ainguh da ki jingainguh thang, bad ban kñia ïa ki jingkñia pynïasuk: hynñiew sngi men ap, tad ynda ngan wan sha me, bad ngan sa ïathuh ïa me ïa kaba men leh.”

⁹ Te haba u la phai dien ban leit noh na u Samuel, U Blei u la ai ha u da kawei pat ka dohnud: te kita ki dak baroh ki la jia long ha kata ka sngi.

¹⁰ Te haba ki la poi shata sha uta u lum, ha khmih, u paidbah ki nongïathuhlypa ki la ïashem bad u; bad U Mynsiem U Blei u la wan jur ha u ruh, bad u la ïathuhlypa hapdeng jong ki.

¹¹ Te baroh kiba ju ithuh ïa u mynshuwa ki la ïohi, te ha khmih, u ïathuhlypa hapdeng kita ki nongïathuhlypa, te kita ki briew ki la ïakren paralok, “Kaei kane kaba la wan jia ïa u khun u Kish? Pleng u Saul ruh u don hapdeng ki nongïathuhlypa?”

¹² Te uwei uba nangta u la ïathuh bad u la ong, “Hynrei, u kpa jong ki u long uei?” Namar kata, ka la wan long ka pharshi, “Pleng u Saul ruh u don hapdeng ki nongïathuhlypa?”

¹³ Bad haba u la wai noh kaba ïathuhlypa, u la wan poi sha kata ka jaka jrong.

¹⁴ Te u kñi u Saul u la ong ha u bad ha u shakri jong u, “Shano phi la leit?” U te u la ïathuh, “Ban wad ïa kita ki kadda: te haba ngi la ïohi ba ym shem ïa ki, ngi la leit poi sha u Samuel.”

¹⁵ Bad u kñi u Saul u la ïathuh, “Nga kyrpad ïa me, to ïathuh ha nga, u Samuel u la ong aïu ïa phi.”

¹⁶ Bad u Saul u la ïathuh ha la u kñi, “U la ïathuh skhem ha ngi ba la lah shem ïa kita ki kadda.” Hynrei, ïa kata ka ktien shaphang ka jinglong syiem, kaba u la kren u Samuel, um shym ïathuh ha u.

¹⁷ Bad u Samuel u la khot lang ïa ki paidbah ha U Trai sha Mispah;

¹⁸ bad u la ong ha ki khun Israel, “Kumne u ong U Trai, uba U Blei ki Israel, ‘Nga la wallam noh ïa ki Israel na ka ri Ijipt, bad nga la pyllait noh ïa phi na ka kti ki nong Ijipt, bad na ka kti ki hima baroh kiba la banbeiñ ïa phi:’

¹⁹ phi te ha kane ka sngi phi la kyntait ïa U Blei jong phi, uba ma u hi u ju pynim ïa phi na ki jingjynjar jong phi baroh bad na ki jingkhuslai jong phi baroh; bad phi la ong ha u, ‘Em, hynrei, men thung syiem halor jong ngi.’ Mynta te namar kata, to ïeng ha khmat U Trai ha la ki jaid ki jaid, bad ha la ki hajar hajar.”

²⁰ Te haba u Samuel u la pynwan hajan ïa ki jaid Israel baroh, la bat ïa ka jaid Benjamin.

²¹ Haba la pynwan hajan ïa ka jaid Benjamin ha la ki kur ki kur, la bat ïa ka kur u Matri: bad la bat ïa u Saul u khun u Kish; te haba ki la wad ïa u, kim shem ïa u.

²² Namar kata, ki la kylli shuh ïa U Trai, “La uta u briew un wan pat shane ne em?” Bad U Trai u la ïathuh, “Ha khmih, u rieh ïa lade hapdeng kita ki jingbuh.”

²³ Te ki la phet bad ki la wallam noh ïa u nangta; te haba u la ïeng hapdeng kita ki briew, u la long uba ka rynïeng ba ki briew baroh ki kot tang ha tyrpeng.

²⁴ Bad u Samuel u la ong ha kita ki briew baroh, “Phi ïohi ïa uba u la jied U Trai, ba ym don uba kum ma u hapdeng ki briew baroh?” Te kita ki briew baroh ki la ïarisa, bad ki la ïa-ong, “To un im u syiem.”

²⁵ Ynda kumta, u Samuel u la ïathuh ïa ka rukom jong ka hima ha kita ki briew, bad u la thoh ïa ka ha ka kitab, bad u la buh ïa ka ha khmat U Trai. Bad u Samuel u la pyllait noh ïa ki briew baroh, uwei pa uwei sha la ïing la ïing.

²⁶ Bad u Saul ruh u la leit noh sha la ïing sha Gibeah; bad u paidbah, kiba U Blei u la ktah ïa ki dohnud jong ki, ki la leit lem bad u.

²⁷ Hynrei, don ki khun u Belial kiba la ïa-ong, “Kumno une un pynim ïa ngi?” Bad ki la beiñ ïa u, bad kim shym wallam ka jingai sngewbha ïa u. Hynrei, u, u la leh kum bym ïohsngew.