1 SAMUEL 1 - KA BAIBL

Ka jingkha ïa u Samuel

¹ Te la don uwei u briew uba na Ramathaim-Sophim, na ka ri lum Ephraim, uba kyrteng “u Elkanah”, u khun u Jeroham, u khun u Elihu, u khun u Tohu, u khun u Suph, u nong Ephraim:

² bad u la don ar ngut ki tnga; ka kyrteng kawei “ka Hannah”, bad ka kyrteng kata kawei “ka Peninnah”: te ka Peninnah ka la don khun, hynrei, ka Hannah kam shym la don khun.

³ Te une u briew, man ka snem u la ju leit kiew na la ka shnong sha Sheiloh ban mane bad ban kñia ha U Trai ki paid. Te ki ar ngut ki khun u Eli, u Hophni bad u Phinehas keiñ, ki lyngdoh jong U Trai, ki la don hangta.

⁴ Te haba la poi ka sngi ba u Elkanah u la ainguh, u la ju ai ki bynta ha ka Peninnah, ka tnga jong u, bad ha ki khun shynrang jong ka bad ha ki khun kynthei jong ka baroh:

⁵ hynrei, ha ka Hannah u la ju ai ka bynta kaba ar shah: naba u la ieit ïa ka Hannah, hynrei, U Trai u la pynlyngki ïa ka.

⁶ Te ka nongïaleh pyrshah jong ka, ka la pynkhih bitar khait ïa ka, khnang ban pynkhuslai ïa ka, naba U Trai u la pynlyngki ïa ka.

⁷ Bad namar ba u la ju leh kumta man ka snem, haba ka la leit kiew ha ïing U Trai, ka ruh ka la ju pynkhih bitar ïa ka; haduh ba ka ju ïam, ka jingbam ruh kam ju bam.

⁸ Te u Elkanah u tnga jong ka u la ong ha ka, “Ko Hannah, balei pha ïam? balei ruh pham bam jingbam? balei pha khuslai ruh ha la ka dohnud? nga ngam long kham bha ïa pha ban ïa shiphew ngut ki khun shynrang?”

⁹ Kumta, ynda ki la bam la dih ha Sheiloh, ka Hannah ka la ïeng. Te u Eli lyngdoh u shong ha la ka jingshong hajan u rishot ka jingkhang ka templ U Trai.

¹⁰ Bad ka la kthang ka mynsiem jong ka, ka la duwai ruh ha U Trai, ka da ïam eh.

¹¹ Ka la smai da ka kular ruh, ka da ong, “A Trai ki paid, lada shisha men khmih ïa ka jingjynjar ka shakri jong me, bad men kynmaw ïa nga, men ym klet ruh ïa la ka shakri, hynrei, men da ai khun shynrang ha la ka shakri, te nga ruh ngan aiti ïa u ha U Trai baroh ki sngi ka rta jong u, bad ka syrti kan ym dei ïa ka khlieh jong u.”

¹² Te katba ka ïaiduwai ha khmat U Trai, u Eli u la khmih ïa ka shyntur jong ka.

¹³ Te ka Hannah, ka la kren ha la ka dohnud; hynrei, tang ki rmiang shyntur jong ka ki la khih, ïa ka ktien jong ka te ym ïohsngew: namar kata, u Eli u la tharai ba ka la buaid.

¹⁴ U Eli u la ong ruh ha ka, “Sa katno phan long kaba buaid? to da buh noh ïa kata ka Waiñ jong pha.”

¹⁵ Te ka Hannah ka la ïathuh ka la ong ruh, “Em, ko kynrad, hynrei, nga ka briew ka bajynjar ka mynsiem: ïa ka Waiñ lane ka kyiad ngam shym la dih, hynrei, nga la theh noh ïa la ka mynsiem ha khmat U Trai.

¹⁶ Wat ñiew ka khun u Belial ïa la ka shakri: naba na kaba dap tam ka jingshitom jong nga bad ka jingpynbitar ïa nga, nga la kren baroh shi katta.”

¹⁷ Te u Eli u la ïathuh, u la ong ruh, “To khie leit ha kaba suk: U Blei ki Israel un ai ruh ïa kata ka jingkyrpad kaba pha la kyrpad na u.”

¹⁸ Ka te ka la ong, “Ai ba ka shakri jong me kan shem ka jingisynei ha khmat jong me.” Kumta, kata ka kynthei ka la leit noh, ka la bam ruh, bad kam shym leh sa shuh.

¹⁹ Te ki la khie la dang step, bad ki la ïamane ha khmat U Trai, ki la leit wan noh ruh, bad ki la poi ha la ïing ha Ramah: bad u Elkanah u la ithuh ïa ka Hannah ka tnga jong u; bad U Trai u la kynmaw ïa ka.

²⁰ Te ynda ka Hannah ka la punkhun, haba ka la dap bnai, ka la kha khun shynrang; bad ka la kyrteng ïa u, “u Samuel”, ka da ong, “Naba na U Trai nga la pan ïa u.”

²¹ Bad uta u briew, u Elkanah lem bad ka ïing jong u baroh, ki la leit kiew ïa ka ban ainguh ha U Trai ïa ka jingkñia ba shi sien shi snem, bad ïa ka jingkular jong u.

²² Hynrei, ka Hannah kam shym leit; naba ka la ong ha la u tnga, “Ngan ym leit kiew, tad ynda la pyniehnoh buiñ ïa u khynnah, hadien te ngan ïalam bad ïa u ruh, ba un paw ha khmat U Trai, ba un ïaisah ruh hangta junom.”

²³ Te u Elkanah u tnga jong ka u la ong ha ka, “Leh katba pha ibit; nang shong ha ban da pha la pyniehnoh buiñ ïa u; tang ba U Trai un pyndep ïa ka ktien jong u.” Kumta, kata ka kynthei ka la shong bad ka la ri ïa u khynnah, tad ynda ka la pyniehnoh buiñ ïa u.

²⁴ Te haba ka la pyniehnoh buiñ ïa u, ka la leit lam ïa u lem bad ka, bad lai tylli ki masi dab, bad shi ephah u 'purew, bad shi lywa ka Waiñ, bad ka la ïalam ïa u sha kata ka ïing U Trai ha Sheiloh: te u khynnah u dang khynnah eh.

²⁵ Te ki la pynïap ïa u masi, bad ki la ïalam ïa u khynnah ha u Eli.

²⁶ Te ka la ong, “Ko kynrad, katba ka im ka mynsiem jong me, ko kynrad, nga long kata ka briew kaba la ïeng hangne hajan jong me, nga da duwai ha U Trai.

²⁷ Namar une u khynnah nga la duwai; te U Trai u la ai ha nga ïa kata ka jingkyrpad kaba nga la pan na u.

²⁸ Namar kata, nga ruh nga la ai noh ïa u ha U Trai; baroh ki sngi ka rta jong u, la ai noh ïa u ha U Trai.” Bad u la mane ïa U Trai hangta.