1 KHRONIKL 5 - KA BAIBL

Kiba hiar pateng na u Reuben

¹ Bad ki khun shynrang u Reuben u khun nyngkong jong u Israel, (naba u la long u khun nyngkong; hynrei, namar ba u la pyntngit ïa ka jingthiah u kpa jong u, ïa ka hok ka jinglong hynmen jong u la ai ha ki khun shynrang u Joseph u khun u Israel; bad ïa ka jingkha pateng ym dei ban kheiñ katba kum ka jinglong hynmen.

² Naba u Judah u la jop halor ki para jong u, bad na u la wan uta u nongïalam; hynrei, ka jinglong hynmen ka la long ka jong u Joseph:)

³ ki khun shynrang u Reuben u khun nyngkong jong u Israel: u Hanokh, bad u Pallu, u Hesron, bad u Karmi.

⁴ Ki khun shynrang u Joel: u Shemaïah u khun jong u, u Gog u khun jong u, u Shimei u khun jong u;

⁵ u Mikah u khun jong u, u Reaïah u khun jong u, u Baal u khun jong u;

⁶ u Birah u khun jong u, ïa uba u Tilgath-pilneser u syiem ka Assyria u la ring mraw noh; u la long u rangbah jong ki Reuben.

⁷ Bad ki para jong u da ki kur jong ki, haba la kheiñ ïa ka jingkha pateng ki jinghiar pateng jong ki: uba kham rangbah, u Jeiel, bad u Sekhariah:

⁸ bad u Bela u khun u Asas, u khun u Shema, u khun u Joel, uba la shong ha Aroer, jin haduh Nebo bad Baal-meon.

⁹ Bad shaphang mihngi u la shong haduh kaba rung sha ri khlaw na ka wah Ïuphratis: naba ki masi jong ki, ki la nang roi ha ka ri Gilead.

¹⁰ Bad ha ki sngi u Saul, ki la ïaleh thma ïa ki Hagar, kiba la kyllon da ka kti jong ki: bad ki la shong ha ki ïingjaiñ jong ki ha ka ri baroh shaphang mihngi ïa ka Gilead.

Kiba hiar pateng na u Gad

¹¹ Bad ki khun shynrang u Gad ki la shong ha marpyrshah jong ki, ha ka ri Bashan haduh Salekah:

¹² u Joel uba kham rangbah, bad u Shapham u ba-ar, bad u Janai, bad u Shaphat ha Bashan:

¹³ bad ki para jong ki na ki ïing ki kpa jong ki: u Mikhael, bad u Meshullam, bad u Sheba, bad u Jorai, bad u Jakan, bad u Sia, bad u Eber, hynñiew ngut.

¹⁴ Kine ki la long ki khun shynrang u Abihail u khun u Huri, u khun u Jaroah, u khun u Gilead, u khun u Mikhael, u khun u Jeshishai, u khun u Jahdo, u khun u Bus;

¹⁵ u Ahi u khun u Abdiel, u khun u Guni, u rangbah ki ïing ki kpa jong ki.

¹⁶ Te ki la shong ha Gilead, ha Bashan, bad ha ki shnong jong ka, bad ha baroh ki rudnong jong ka Sharon, kat haduh ki pud jong ki.

¹⁷ Ïa kine baroh, la ñiew da ki jingkha pateng ha ki sngi u Jotham u syiem ka Judah, bad ha ki sngi u Jeroboam u syiem ki Israel.

Ki ar jaid bad ki shiteng ka jaid u Manasseh

¹⁸ Ki khun shynrang u Reuben, bad ki Gad, bad shiteng ka jaid u Manasseh, ki rangbah bashlur, ki briew kiba lah ban rah stieh rah wait, bad ban siat da ka ryntieh, bad kiba nang ha ka thma, ki la don sawphew saw hajar hynñiewspah hynriewphew, kiba lah ban leit mih ha ka thma.

¹⁹ Bad ki la ïaleh thma ïa ki Hagar, ïa u Jetur, bad ïa u Naphish, bad ïa u Nodab.

²⁰ Bad la ïarap ïa ki ban ïaleh ïa kita, bad la ai noh ïa ki Hagar ha ka kti jong ki, bad ïa baroh kat kiba la don lem bad ki; naba ki la pyrta ha U Blei ha ka thma, bad U la shahshkor ïa ki; namar ba ki la shaniah ha U.

²¹ Bad ki la knieh noh ïa ki jingri jong ki: na ki ut jong ki, sanphew hajar, bad na ki langbrot jong ki, arspah sanphew hajar, bad na ki kadda jong ki, ar hajar, bad na ki briew, shispah hajar.

²² Naba shibun ki la kyllon ba la pynïap ïa ki, namar kata ka thma ka la long na U Blei. Bad ki la shong ha ka jaka jong ki haduh kata ka jingring mraw.

²³ Bad ki khun jong kata ka shiteng ka jaid u Manasseh ki la shong ha ka ri: ki la nang roi naduh Bashan haduh Baal-hermon bad Senir bad u lum Hermon.

²⁴ Bad kine ki la long ki rangbah ka ïing ki kpa jong ki, kata: u Epher, bad u Ishi; bad u Eliel, bad u Asriel, bad u Jeremaïah, bad u Hodabiah, bad u Jahdiel, ki rangbah bashlur, ki rangbah ba-donnam, ki rangbah ki ïing ki kpa jong ki.

²⁵ Te ki la leh palat ïa U Blei ki kpa jong ki, bad ki la leit klim hadien ki blei jong ki kynja bynriew jong kata ka ri, ïa kiba U Blei u la pynduh noh ha khmat jong ki.

²⁶ Bad U Blei ki Israel u la pynkhih ïa ka mynsiem u Pul u syiem ka Assyria, bad ïa ka mynsiem u Tilgath-pilneser u syiem ka Assyria, bad u la ïalam noh ïa ki, kata, ïa ki Reuben, bad ïa ki Gad, bad ïa ka shiteng ka jaid u Manasseh, bad u la leit lam noh ïa ki sha Halah, bad Habor, bad Hara, bad sha ka wah Gosan, haduh kane ka sngi.