TITOS 3 - Khasi CL Bible (BSI)

Ka rukom im kiba ngeit

¹ To pynkynmaw ïa la ki briew ban pyndem ha ki nongsynshar bad ki bor synshar, ban kohnguh ïa ki, bad ban long kiba kloi ban leh ïa kaba bha da ki lad baroh.

² Ong ïa ki ban ym kren sniew ïano ïano, hynrei ban long kiba shongsuk bad ïadei paralok, bad ban pyn-i borabor da ka jinglong bajemnud sha baroh.

³ Naba ngi ruh ngi la long shisien kiba bieit, ki bymkohnguh bad kiba leh bakla. Ngi la long ki mraw ha ki jingkwah brai bad ki jingsngewbha babun jait. Ngi la pynlut ïa la ka jingim ha ka jingsniew bad jingpihuiñ; kiwei ki la isih ïa ngi bad ngi la isih ïa ki.

⁴ Hynrei haba la pynpaw ïa ka jingsbun bad ka jingieit U Blei U Nongpynim jong ngi, u la pynim ïa ngi.

⁵ Ym namar kano kano na ki kam babha kiba ma ngi hi ngi la leh, hynrei namar ka jingisynei jong u hi ba u la pynim ïa ngi, lyngba U Mynsiem Bakhuid, uba ai ïa ngi ka jingkha thymmai bad ka jingim kaba thymmai da kaba sait ïa ngi.

⁶ U Blei u la theh noh kyrhai ïa U Mynsiem Bakhuid ha ngi lyngba U Jisu Khrist U Nongpynim jong ngi,

⁷ khnang ba ngi lah ban don ka jingïadei kaba beit bad U Blei bad ïohpdiang ïa ka jingim bymjukut kaba ngi ap kyrmen.

⁸ Kane ka long ka jingong kaba shisha. Nga kwah ba men ïai ban kyrpang ïa kine kiei kiei, khnang ba kito kiba ngeit ha U Blei kin kitkhia ha kaba ai ïa ka por jong ki ban leh ïa ki kam babha, kiba long ki babha bad kiba myntoi ïa baroh.

⁹ Hynrei to kiar noh na ki jingïasaid ba-bieit, na ka thup kyrteng ki kpa tymmen, na ki jingïania bad ki jingïaleh shaphang ka Hukum. Kine ki long ki bymmyntoi bad kiba sep-ei.

¹⁰ La kumno kumno to ai ïa ka jingmaham ar sien ïa u briew uba pynmih ki jingïapait, bad hadien kata to kiar noh na u.

¹¹ Me tip ba kum uta u briew u long uba bamsap bad ki pop jong u ki pynshisha ba u bakla.

Ki jingbthah bakhatduh

¹² Ynda nga phah ïa u Artemas lane ïa u Tukhikos sha me, ïaleh shitom ban wan sha nga ha Nikopolis, namar nga la rai ban pynlut ïa ka tlang hangta.

¹³ To leh kaba bha tam ban ïarap ïa u Senas u riewsaid bad ïa u Apollos ba kin sdang ïa ki jingleit jong ki, bad khmih ba kin ïoh ïa kiei kiei baroh kiba ki donkam.

¹⁴ Ki briew jong ngi ki dei ban nang ban pynlut ïa la ka por ha kaba leh babha, khnang ba ki lah ban pyndap ïa ki jingdonkam bashisha; kim dei ban im ka jingim ka bymlarkam.

¹⁵ Baroh kiba ïadon ryngkat bad nga ki phah ïa ki jingai khublei ïa me. To ai khublei ïa ki paralok jong ngi kiba ha ka jingngeit. Ka jingaiei U Blei kan long lem bad phi baroh.