TITOS 2 - Khasi CL Bible (BSI)

Ka jinghikai shongtynrai kaba skhem

¹ Hynrei me dei ban hikai ïa kaei kaba ïahap bad ka jinghikai shongtynrai kaba skhem.

² Hikai ïa kiba la kham rangbah ba kin long kiba adkar, kiba tipbriew bad kiba synshar ïa lade; kiba skhem ha ka jingngeit, ka jingieit bad ka jingïaishah jong ki.

³ Kumjuh ruh hikai ïa ki kynthei kiba la kham san ba kin im donakor kum ki kynthei kiba dei ban leh, kiba im ka jingim bakhuid. Kim dei ban long kiba kren siar lane kiba kyrni ha ka dih waiñ.

⁴ Ki dei ban hikai ïa kaei kaba bha, khnang ba ki lah ban hikai ïa ki kynthei ba dang kham samla ban ieit ïa la ki tnga bad ki khun,

⁵ ban long kiba synshar ïa lade bad kiba sngur mynsiem, bad ki nongsumar ïing babha kiba pyndem ha la ki tnga, ba yn ym don mano mano ba lah ban kren sniew ïa ka khubor kaba wan na U Blei.

⁶ Kumjuh ruh ïa ki shynrang ba dang kham samla to kyntu jur ïa ki ban synshar bha ïa lade.

⁷ Ha kiei kiei baroh phi dei ban long ka nuksa jong ka jinglong babha. To long kiba minot bad kiba kitkhia ha ka jinghikai jong me.

⁸ Pyndonkam da ki ktien kiba shongnia ïa kiba yn ym don ba wad daw, khnang ba yn ïoh pynlehrain ïa ki nongshun jong me da ka bym don ei ei kaba sniew ban ïoh kren pyrshah shaphang jong ngi.

⁹ Ki mraw kin pyndem ha la ki kynrad bad ban pynsngewbha ïa ki ha kiei kiei baroh. Kim dei ban pynphai ktien kylliang ïa ki lane tuh na ki.

¹⁰ Pynban, ki dei ban pyn-i ba ki long borabor kiba bha bad ba lah ban shaniah, khnang ban pynshisha ïa ka jinghikai shaphang U Blei U Nongpynim jong ngi ha baroh ba ki leh.

¹¹ Naba U Blei u la pynpaw ïa ka jingaiei jong U na ka bynta ka jingpynim jong ki briew baroh.

¹² Ba ka jingaiei ka hikai ïa ngi ban iehnoh ïa ka rukom im bymriewblei bad ïa ki jingkwah brai ba kynja pyrthei, bad ban im da kaba synshar ïa lade, ban im hok, bad ban im riewblei ha kane ka pyrthei,

¹³ katba ngi dang ap ïa ka jingwan jong kata ka Sngi ba la kyrkhu kaba ngi ap kyrmen, haba ka burom U Blei bakhraw bad U Jisu Khrist U Nongpynim jong ngi kan paw.

¹⁴ U la aiti ïa lade na ka bynta jong ngi, ban pyllait ïa ngi na ka jingbymman baroh bad ban pynlong ïa ngi ki briew kiba khuid kiba dei ki jong U hi bad kiba kwah hir hir ban leh ïa kaba bha.

¹⁵ Hikai ïa kine kiei kiei bad pyndonkam pura ïa la ka iktiar haba me ai mynsiem bad haba sneng ïa ki nongsngap jong me. Wat ai ïano ïano na ki ban ibeiñ ïa me.