TITOS 1 - Khasi CL Bible (BSI)

¹ Na u Paul, u shakri jong U Blei bad u apostol jong U Jisu Khrist. Ïa nga la jied bad la phah ban ïarap ïa ka jingngeit jong ki briew ba la jied jong U Blei bad ban ïalam ïa ki sha ka jingshisha ba la hikai kat kum ka jingngeit jong ngi,

² kaba pynshong nongrim ha ka jingkyrmen ïa ka jingim bymjukut. U Blei, u bym ju shukor, u la kular ïa ngi ïa kane ka jingim naduh mynnyngkong,

³ bad ha ka por kaba biang u la pynpaw ïa ka ha ka khubor jong u. Ïa kane la pynkhamti ha nga, bad nga pynbna ïa ka da ka hukum U Blei U Nongpynim jong ngi.

⁴ Nga thoh sha u Titos, u khun bashisha jong nga ha ka jingngeit kaba ngi ïadon lang. To U Blei uba long U Kpa bad U Khrist Jisu uba long U Nongpynim jong ngi un ai ha phi ïa ka jingaiei bad ka jingsuk.

Ka jingtrei u Titos ha Krit

⁵ Nga la iehnoh ïa me ha Krit, khnang ba men buh ryntih ïa kiei kiei kiba dang donkam ban leh bad ban thung ïa ki nongsharai balang ha man la ki shnong. To kynmaw ïa ki jingbthah jong nga:

⁶ U nongsharai balang u dei ban long u bym don jingshah kynnoh pop; u dei ban don tang kawei ka tnga, bad ki khun jong u ki dei ban long ki bangeit bad ki bym don jingbudnam ba ki long kiba leh thurmur lane ki bymkohnguh.

⁷ Namar ba u nongïalam balang u long uba pynïaid ïa ka kam U Blei, u dei ban long u bym don jingshah kynnoh pop. Um dei ban long uba leh meng ne uba bitar shen, ne uba buaid ne uba leh jubor ne uba lalot pisa.

⁸ U dei ban long uba lehsbun bad uba ieit ïa kaei kaba bha. U dei ban long uba synshar ïa lade, uba beit, u bakhuid, bad uba leh ryntih.

⁹ U dei ban long uba batskhem ïa ka khubor kaba lah ban shaniah bad kaba ïadei bad ka jinghikai shongtynrai. Ha kane ka rukom un lah ban ai mynsiem ïa kiwei da ka jinghikai bashisha bad ban pyn-i ruh ïa ka jingbakla jong kito kiba ïeng pyrshah ïa ka.

¹⁰ Naba don shibun, khamtam kiba la kylla na ka niam Jiw, kiba ïaleh pyrshah bad kiba shukor ïa kiwei da ka jingleh bym don jingmut jong ki.

¹¹ Ka long kaba donkam ban pynsngap jar ïa ka jingïathuh jong ki, namar ki pynkylla khongpong ïa ki longïing baroh da kaba hikai ïa kaei kaba kim dei ban hikai, bad baroh ka long ïa ka jingthmu basngewlehrain ban thaw pisa.

¹² Dei u nong Krit hi, uwei na ki nongïathuhlypa jong ki, uba la kren ïa ka jingshisha mynba u la ong, “Ki nong Krit ki long borabor kiba lamler, ki riewkhlaw bymman, bad ki jlawnguid bajaipdeh.”

¹³ Na kane ka daw me dei ban sneng tyngeh ïa ki, khnang ba kin don ka jingngeit kaba shisha

¹⁴ bad ban nym pynshahshkor shuh ha ki khanatang jong ki Jiw bad ha ki hukum briew kiba wan na ki briew kiba la kyntait ïa ka jingshisha.

¹⁵ Baroh ka long kaba khuid ha kito kiba long kiba khuid ha lade; hynrei ym don kaba khuid ha kito kiba la tngit bad ki bymngeit, namar ba ki jingmut bad ki jingïatiplem jong ki, ki long ba la pyntngit.

¹⁶ Ki kam ba ki tip ïa U Blei, hynrei ki jingleh jong ki, ki len ïa kata. Ki long kiba dap da ka jingisih bad bymkohnguh, ki bym biang ban leh ïa kano kano kaba bha.