SNGEWSYNEI 4 - Khasi CL Bible (BSI)

Ka Jerusalem hadien ka jingkyllon jong ka

¹ Ka ksiar baphyrnai jong ngi ka la jngut; ki maw jong ka Templ ki don ha ka jingsaphred ha ki lynti bah.

² Ki samla shynrang jong ka Seïon ki la long kiba kordor ïa ngi kum ka ksiar, hynrei mynta la ñiew ïa ki kum ïa ki khiew dewbyrtha bymdondor.

³ Wat ka kmie suri kan sumar ïa la ki khun, hynrei ki briew jong nga ki long kum ki ostrit, kiba lehbeiñ ïa ki khun rit jong ki.

⁴ Ki shah ïa ki khunlung jong ki ban ïap ha ka jingthngan bad jingsliang; ki khynnah ki khrong jingbam kaba ym don mano mano ban ai ha ki.

⁵ Ki briew kiba shisien ki la bam ïa ki jingbam kiba kynsai tam ki ïapthngan ha ki lynti bah; kito kiba la heh la san ha ka pahuh pahai ki kraid lyngba ka jakhlia na ka bynta ka jingbam.

⁶ Ïa ki briew jong nga la pynshitom wat kham jur ban ïa ki nongshong shnong jong ka Sodom, kiba la ïashem da ka jingkyllon kaba kynsan ha ki kti jong U Blei.

⁷ Ki khun syiem shynrang jong ngi ki long ki bym bit tngit bad kiba khuid kum ka ïor, kiba koit bakhiah bad kiba khlaiñ, kiba phyrnai da ka jingkoit jingkhiah.

⁸ Mynta ki thiah khlem don batip ha ki lynti bah, ïa ki durkhmat jong ki la pynïong ha ka jingïap; ka sniehdoh jong ki, ka tyrkhong kum ka dieng, ka la sti halor ki shyieng jong ki.

⁹ Kito kiba la ïap ha ka thma ki la long kiba kham bit ban ïa kito kiba ïap hadien, kiba ïap suki ha ka jingthngan, khlem kano kano ka jingbam ban ri pynim ïa ki.

¹⁰ Ka jingpynjot kaba la wan ha ki briew jong nga ka wallam ka jingsngew shyrkhei; ki kmie kiba ieit ki shet ïa la ki khun ban long jingbam.

¹¹ U Trai u la pyllait ïa ka bor ba-pura jong ka jingbitar jong u; u la pynmeh ka ding ha Seïon kaba la thang duh ïa ka haduh khyndew.

¹² Ym don mano mano hangno hangno, ym don wat ki nongsynshar jong ki hima nongwei, kiba la ngeit ba uno uno u nonghiarthma un lah ban rung lyngba ki khyrdop ka Jerusalem.

¹³ Hynrei ka la jia namar ba ki nongïathuhlypa jong ka ki la leh pop bad ki lyngdoh jong ka ki long kiba la rem namar ka jingpynjia ïa ka jingïap jong ki briew balui lui.

¹⁴ Ki nongïalam jong ka ki la sakma lyngba ki lynti bah kum ki rangbah kiba matlah, kiba la bit da ka snam haduh katta katta ba ym don mano mano ban ktah ïa ki.

¹⁵ “Khie leit noh!” ki briew ki pyrta. “Phi la long kiba tngit! Wat ktah ïa nga!” Kumta ki la sakma na kawei ka ri sha kawei pat, khlem don mano mano ba pdiang sngewbha.

¹⁶ U Trai um shym la don shuh ka jingsngewkhia na ka bynta jong ki; u la pynsakma ïa ki da lade hi. Um shym pyn-i jingñiewkor ei ei ïa ki lyngdoh bad ki nongïalam jong ngi.

¹⁷ Ngi la khmih tad haduh ba ngim lah shuh ban khmih ïa ka jingïarap ka bym ju wan. Ngi la ïai ap ïa ka jingïarap na ka hima ka bym don ei ei ban ai.

¹⁸ U Nongshun u la ap khmih ïa ngi; ngim lah wat ban ïaid ha ki lynti bah. Ki sngi jong ngi ki la kut; kaba kut ka la wan.

¹⁹ Kham stet ban ïa ki pukni kiba suh wia na sahit bneng, ki beh kthong ïa ngi sha tbian. Ki lap ïa ngi ha ki lumrit; ki kurup ïa ngi ha ka jingkyndit ha ka ri shyiap.

²⁰ Ki la kurup ïa ka tynrai jong ka jingim jong ngi, ïa u syiem uba U Trai u la jied, uta uba ngi la shaniah ban ïada ïa ngi na uno uno u nonghiarthma.

²¹ To ïai rkhie, ko ki briew ka Edom bad ka Us; to kmen katba phi dang lah. Ka jingpynjot ïa phi ruh ka wan; ma phi ruh phin ïaid sheng sheng lyngkhuit ha ka jinglehrain.

²² Ka Seïon ka la siew na ka bynta ka pop jong ka; U Trai un ym buh shuh ïa ngi ha ka jingshah ringmraw. Hynrei ko Edom, U Trai un pynshitom ïa pha; un pynpaw ïa ki kam bymman jong pha.