SNGEWSYNEI 3 - Khasi CL Bible (BSI)

Ka jingpynshitom, ka jingkylla-kaba-mut, bad ka jingkyrmen

¹ Nga long uta uba tip kaba kumno ka long ban shah pynshitom ha U Blei.

² U la beh ïa nga jylliew bad kham jylliew sha ka jingdum,

³ Bad u la ïai sympat ïa nga da ki jingtied bym don jingisynei.

⁴ U la ieh ïa ka doh jong nga ha ka jing-lhieh bad u la pynkheiñ ïa ki shyieng jong nga.

⁵ U la set ïa nga ha ka ïingbyndi jong ka jingjynjar bad ka jinglyng-a.

⁶ U la pynbor ïa nga ban shong ha ka jingdum baneh hajuh jong ka jingïap.

⁷ U la khum ïa nga ha ki kynjri; nga long u koidi u bym don kano kano ka jingkyrmen ban lait phet.

⁸ Nga kyang jam ban ïoh jingïarap, hynrei U Blei u kyntait ban shahshkor;

⁹ nga thap kyllon katba nga ïaid; ki kynroh maw ki khang ïa nga kat shaba nga phai.

¹⁰ U la ap ïa nga kum ka dngiem; u kynrup ïa nga kum u sing.

¹¹ U beh krad ïa nga sharud surok, u tar lyngkhot ïa nga, bad u iehnoh ïa nga.

¹² U la sei ïa ka ryntieh jong u bad u pynlong ïa nga ka sohpdung ïa ki khnam jong u.

¹³ U siat ïa la ki khnam jylliew shapoh ka met jong nga.

¹⁴ Ki briew ki rkhie ïa nga baroh shi sngi; nga long ka jingbiria ïa ki baroh.

¹⁵ Ka jingshah shitom bakthang ka long baroh kaba u la ai ïa nga kum ka jingbam bad jingdih.

¹⁶ U la kyrshut ïa ka durkhmat jong nga ha khyndew bad la pynkheiñ ïa ki bniat jong nga ha ki mawria.

¹⁷ Nga la klet noh kaba kumno ka jingkhiah bad ka jingsuk bad ka jingkmen ki long.

¹⁸ Ngam slem shuh ban im; ka jingkyrmen jong nga ha U Trai ka la duh.

¹⁹ Ka jingpyrkhat ïa ka jingpang jong nga, ka jingbymdon ïing jong nga, ka long ka bih bakthang.

²⁰ Nga ïai pyrkhat ïa ka bad ka mynsiem jong nga ka noh sngewsih.

²¹ Pynban ka jingkyrmen ka wan phai haba nga kynmaw ïa kane kawei:

²² Ka jingieit baneh bad ka jingisynei jong U Trai ka ïaineh,

²³ Ka pyngngad kum ka step, ka thikna kum ka jingmih ka sngi.

²⁴ U Trai u long baroh kaba nga don, bad kumta nga buh ïa la ka jingkyrmen ha u.

²⁵ U Trai u long uba bha ïa uwei pa uwei uba shaniah ha u,

²⁶ Kumta ka long kaba bha tam ïa ngi ban ap ha ka jingïaishah — ban ap ïa u ban pynim ïa ngi —

²⁷ Bad ka long kaba bha tam ban nang ïa kane ka jingïaishah ha ka jinglong samla jong ngi.

²⁸ Haba ngi shahshitom, ngi dei ban shong marwei ha ka jingïaishah bajar jar;

²⁹ ngi dei ban nguh ha ka jingpyndem, namar dang lah ban don ka jingkyrmen.

³⁰ La ngi la shah tied bad shah ibeiñ, ngi dei ban pdiang ïa ka baroh.

³¹ U Trai u dap da ka jingisynei bad un ym kyntait ïa ngi junom.

³² U lah ban wallam ka jingsngewsih ha ngi, hynrei ka jingieit jong u ïa ngi ka long kaba thikna bad kaba khlaiñ.

³³ Um don jingsngewbha ban pynlong ïa ngi ban sngewsih lane ban pang.

³⁴ U Trai u tip mynno ki mynsiem jong ngi ki shah pynlwet ha ka byndi;

³⁵ u tip mynno ngim shym ïoh ïa ki hok jong ngi kiba u la ai ïa ngi;

³⁶ haba ïa ka jingbishar hok la pynkylla khongpong ha ka ïingbishar, u tip.

³⁷ Tang ïa ka mon ka jong U Trai hi la ju ïai pyndep.

³⁸ Kaba bha bad kaba sniew kumjuh ki jia ha ka hukum jong u.

³⁹ Balei ngin shu ïai khñium haba la pynshitom ïa ngi na ka bynta ka pop jong ngi.

⁴⁰ To ngin ïit ïa la ki lynti bad phai pat sha U Trai.

⁴¹ To ngin plie ïa la ki dohnud sha U Blei ha bneng bad duwai,

⁴² “Ngi la leh pop bad ïeng ïaleh pyrshah, bad ma me A Trai, mem pat shym map ïa ngi.

⁴³ “Me la thwet ïa ngi bad pynïap ïa ngi; ïa ka jingisynei jong me la buhrieh da ka jingbitar jong me,

⁴⁴ da u lyoh jong ka jingbitar shla jong me uba rben katta katta ïa ki jingduwai jong ngi ban ksam lyngba.

⁴⁵ Me la pynlong ïa ngi ka kynton jakhlia jong ka pyrthei.

⁴⁶ “Ïa ngi la krenbeiñ bad la ñiewbeiñ da baroh ki nongshun jong ngi.

⁴⁷ Ngi la ïaid lyngba ka jingpynjot bad jingpra; ngi im ha ka jingma bad ka jingsheptieng.

⁴⁸ Ki khmat jong nga ki tuid da ki ummat kum ki wah ha ka jingshah pynjot jong ki briew jong nga.

⁴⁹ “Ki ummat jong nga kin mih kum ki wahduid ba ïai tuid.

⁵⁰ Tad haduh ba U Trai un da khmih sha tbian na bneng bad ïohi ïa ngi.

⁵¹ Ka dohnud jong nga ka la sngewsih haba nga ïohi ïa kaei kaba la jia ha ki kynthei jong ka nongbah.

⁵² “Nga la shah riam kum ka sim ha ki nongshun ki bym don daw ban isih ïa nga.

⁵³ Ki la bret im ïa nga shapoh ka thliew bad ki la khang ïa ka da u maw.

⁵⁴ Ka um ka la sdang ban tyllep ïa nga, bad nga la pyrkhat ba ka jingïap ka la jan.

⁵⁵ “Na trai jong ka thliew, Ko Trai, nga la kyang jam sha me,

⁵⁶ Bad haba nga la kyrpad ïa me ban shahshkor ïa ka jingkyang jong nga, me la ïohsngew.

⁵⁷ Me la jubab ïa nga bad ong ïa nga ban ym sheptieng.

⁵⁸ “Me la wan ban pyllait ïa nga, A Trai, bad me la pyllait im ïa ka jingim jong nga.

⁵⁹ To bishar ha ka liang jong nga; me tip ïa ki jingbakla kiba la leh pyrshah ïa nga.

⁶⁰ Me tip kumno ki nongshun jong nga ki la isih ïa nga bad kumno ki ïasylla pyrshah ïa nga.

⁶¹ “Me la ïohsngew ïa ki ba ki krenbeiñ ïa nga, A Trai; me tip ïa baroh ki jingïasylla jong ki.

⁶² Baroh shi sngi ki ïakren shaphang jong nga bad ki thaw ki jingthmu jong ki.

⁶³ Naduh mynstep haduh mynmiet ki rkhiebeiñ ïa nga.

⁶⁴ “To pynshitom ïa ki na ka bynta kaei kaba ki la leh, A Trai;

⁶⁵ to tim ïa ki bad pyndap ïa ki da ka jingduh jingkyrmen!

⁶⁶ To beh kthong ïa ki bad ñiad noh ïa ki na ka khyndew!”