SNGEWSYNEI 2 - Khasi CL Bible (BSI)

Ka jingpynshitom U Trai ïa ka Jerusalem

¹ U Trai ha ka jingbitar jong u, u la tap ïa ka Seïon da ka jingdum. Ïa ka burom ba kynja bneng jong ka u la pynkylla sha ki jingjot. Ha ka sngi ka jingbitar jong u, u la iehnoh wat ïa ka Templ jong u.

² U Trai u la pynjot khlem ka jingisynei ïa kawei pa kawei ka nongrit ha Judah bad u la kad pynpra ïa ki kut kiba ïada ïa ka ri. U la wallam ka jingjahburom ha ka hima bad ki nongsynshar jong ka.

³ Ha ka jingbitar shla jong u, u la pynkhynñiuh ïa ka jingkhlaiñ jong ka Israel; u la kyntait ban ïarap ïa ngi haba u nongshun u wan. U la bitar tyngeh pyrshah ïa ngi kum ka ding, kaba pynjot ïa kiei kiei baroh.

⁴ U la thew ïa ki khnam jong u ha ngi kum ïa u nongshun; u la pynïap ïa baroh kito kiba long ka jingkmen bad ka jingsngewbha jong ngi. Hangne ha Jerusalem ngi la sngew ïa ka jingbitar shla jong u.

⁵ Kum u nongshun, U Trai u la pynjot ïa ka Israel; u la iehnoh ïa ki kut bad ki ïingsyiem jong ka ha ka jingjot. U la wanrah halor ki briew jong ka Judah ïa ka jingsngewsih ka bymkut shuh.

⁶ U la tied pynlwet ïa ka Templ ha kaba ngi la ïamane ïa u; u la pynkut ïa ki sngi khuid bad ïa ki Sabbaton. U Syiem bad u lyngdoh kumjuh ki la sngew ïa ka bor ka jingbitar jong u.

⁷ U Trai u la kyntait ïa la ka duwan bad u la iehnoh ïa ka Templ bakhuid jong u; u la shah ïa u nongshun ban kad pynpra ïa ki kynroh jong ka. Ki la pyrta ha ka jingjop hangta ha kaba shisien ngi la ïamane da ka jingkmen.

⁸ U Trai u la kut jingmut ba ki kynroh jong ka Seïon ki dei ban khyllem; u la thew ïa ki ban pynthikna ïa ka jingpynjot thiaw. Ki mot bad ki kynroh mynta ki ïadon lang ha ka jingjot.

⁹ Ki khyrdop ki la shah tep ha ka kynton ba la pra, ïa ki nar ker jong ki la shoh lyngkhot. U syiem bad ki riewdonburom mynta ki don ha ka jingshah ringmraw. Ïa ka Aiñ ym shym la hikai shuh, bad ki nongïathuhlypa kim don shuh kino kino ki jingïohipaw na U Trai.

¹⁰ Ki tymmen shynrang jong ka Jerusalem ki shong ha khyndew ha ka jingjar jar, da u pui pui halor ki khlieh jong ki bad ka jaiñ khain ha ki met jong ki. Ki samla kynthei ki pyndem ngon ïa ki khlieh jong ki ha khyndew.

¹¹ Ki khmat jong nga ki la tlot da ka jingïam; ka mynsiem jong nga ka don ha ka jinglyng-a. Nga la thait da ka jingsngewsih ha ka jingshah pynjot jong ki briew jong nga. Ki khynnah bad ki khunlung ki ïapler ha ki lynti bah jong ka nongbah.

¹² Ha ka jingthngan bad jingsliang, ki ïam ha la ki kmie; ki kyllon ha ki lynti bah kumba ki la mynsaw, bad ki ïap suki ha ki ksang'ti jong ki kmie jong ki.

¹³ Ko Jerusalem, ko Jerusalem ba-ieit, kaei pat ngan ong? Kumno ngan pyntngen ïa pha? Ym don mano mano ba la ju shahshitom kum kane. Ka jingjot jong pha ka long ka bym don pud kum ka duriaw-bah; ym don shuh kano kano ka jingkyrmen kaba lah ban long.

¹⁴ Ki nongïathuhlypa jong pha kim don ei ei ban ïathuh ïa pha hynrei tang ki jinglamler; ka jingïathuh jong ki ka shukor ïa pha da ka jingbym-pynpaw ei ei ïa ka pop jong pha. Ki pynlong ïa pha ban pyrkhat ba pham donkam ban kylla-kaba-mut.

¹⁵ Ki briew kiba ïaid najan ka nongbah ki khmih sha pha da ka jingibeiñ. Ki pynkhih ïa la ki khlieh bad ki rkhie ïa ka jingjot ka Jerusalem. “Hato kane ka dei kata ka nongbah ba-itynnat? Hato kane ka dei ka jingsarong jong ka pyrthei?”

¹⁶ Baroh ki nongshun jong pha ki rkhiebeiñ ïa pha bad ki khmih ïa pha da ka jingisih. Ki pynran ïa la ki rmiang shyntur bad kren khlem burom, “Ngi la pynjot ïa ka! Kane ka long ka sngi kaba ngi la ïa-ap khmih!”

¹⁷ U Trai u la pyndep khoit ïa kaei kaba u la byrngem ban leh: U la pynjot ïa ngi khlem jingisynei, kumba u la maham ïa ngi la slem bah. U la ai ka jingjop ha ki nongshun jong ngi, u la ai ha ki ka jingkmen ha ka jingkyllon jong ngi.

¹⁸ Ko Jerusalem, ai ba ki kynroh jong pha hi kin kyang jam sha U Trai! Ai ba ki ummat jong pha kin tuid kum ki wah bad miet bad sngi; pynthait ïa lade da ka jingïam bad da ka jingsngewsih!

¹⁹ Baroh shi miet to khie bad ïai khie ban kyang jam ha U Trai; to theh ïa la ka dohnud bad kyrpad ïa u na ka bynta ka jingisynei ïa ki khun jong pha — Ki khun kiba ha ka jingïapthngan ha kawei pa kawei ka kyndong lynti bah!

²⁰ Ha khmih, ko Trai! Khmih ïa kito kiba me la pynshitom! Ki kynthei ki bam ïa ka met jong ki khun kiba ki ieit! Ki lyngdoh bad ki nongïathuhlypa ki shah pynïap hapoh ka Templ hi!

²¹ Kiba samla bad kiba tymmen kumjuh ki thiah ïap ha ki lynti bah, ki samla shynrang bad kynthei, ki la shah pynïap da ki waitlam jong u nongshun jong ki. Me la pynïap ïa ki khlem jingisynei ha ka sngi ka jingbitar jong me.

²² Me la khot sngewbha ïa ki nongshun jong nga ban pynlong ka jinglehsngewbha ha ka jingshyrkhei baroh sawdong jong nga, bad ym don mano mano ba lah ban lait im ha kata ka sngi jong ka jingbitar jong me. Ki la pynïap ïa ki khun jong nga, kiba nga la pynsan bad ieit.