SNGEWSYNEI 1 - Khasi CL Bible (BSI)

Ki jingsngewsih jong ka Jerusalem

¹ Katno kaba kynjah long ka Jerusalem, kaba shisien ka long kaba dap da ki briew! Shisien la pyndonburom da ka pyrthei, mynta ka long kum ka riewkynthei; kaba donburom tam na ki nongbah ka la kyllon sha ka jinglongmraw.

² Baroh shi miet lynter ka ïam; ki ummat ki tuid ha ki ngab jong ka. Na baroh ki paralok jong ka kiba mynshuwa, ym don iwei ruh iba sah ban pyntngen ïa ka. Kiba ïateh lok bad ka ki la shetkylla ïa ka bad baroh ki la long pyrshah ïa ka mynta.

³ Ki briew jong ka Judah ki long ki mraw ki bym lah leh ei ei, kiba la shah pynmih da ka bor na la ka ïing. Ki la shong la sah ha kiwei pat ki ri, khlem kano kano ka jaka ban khot ka jong ki hi — La kerkut da ki nongshun, khlem kano kano ka lad ban lait im.

⁴ Ym don mano mano ba wan sha ka Templ mynta ban mane ha ki sngi bakhuid. Ki kynthei samla kiba rwai hangta ki shahshitom, bad ki lyngdoh ki lah tang ban shu ud. Ki khyrdop ka nongbah ki ïeng thylli, bad ka Seïon ka don ha ka jingkordit.

⁵ Ki nongshun jong ka ki la jop; ki la bat ïa ka ha ka bor jong ki. U Trai u la pynlong ïa ka ban shahshitom na ka bynta ki pop kiba bun jong ka baroh. Ïa ki khun jong ka la kem bad la shah rah noh.

⁶ Ka burom ba-itynnat tam jong ka Jerusalem ka long ka bynta jong ka mynnor. Ki nongïalam jong ka ki long kum ki skei kiba tlot na ka jingthngan, kaba ka jingkhlaiñ jong ki, ka la jan duh noh katba ki phet na ki nongbeh mrad.

⁷ Ka long ka jingjot bakynjah mynta, ka Jerusalem ka kynmaw ïa la ka burom ba-itynnat kaba mynbarim. Haba ka hap ha ki nongshun, ym don mano mano ba wan ïarap ïa ka; ki nongjop ïa ka ki la rkhie ha ka jingkyllon jong ka.

⁸ Ka burom jong ka, ka la leit noh; ka la lyngkhuit bad ka la don ha ka jingshah ñiewbeiñ. Ka ud bad ka buhrieh ïa la ka durkhmat ha ka jinglehrain. Ka Jerusalem ka la pynjakhlia ïa lade da ka pop kaba shyrkhei.

⁹ Ïa ka jingbymkhuid jong ka lah ban ïohi da kaba suk, hynrei kam shym la pynpaw jingsngewkhia ei ei ïa la ka kupar. Ka jingkyllon jong ka, ka long kaba shyrkhei; ym don mano mano ba lah ban pyntngen ïa ka. Ki nongshun jong ka ki la jop, bad ka kyang sha U Trai na ka bynta ka jingisynei.

¹⁰ Ki nongshun jong ka ki la lute ïa ka jingkynshew jong ka baroh. Ka la ïohi ïa ki, ba ki rung sha ka Templ hi, ha kaba U Trai u la lah khang ïa ki Jentil ban leit.

¹¹ Ki briew jong ka ki ud katba ki wad ei ei ban bam; ki ïa-bujli ïa la ki jingkynshew na ka bynta ka jingbam ban pynsah im ïa lade. “To khmih sha nga, A Trai,” ka nongbah ka kyang; “to peit ïa nga ha ka jinglong rangli jong nga.”

¹² “Khmih sha nga!” ka pyrta sha uwei pa uwei uba ïaid lynti najan. “Ym don mano mano ba don ka jingpang kum ka jong nga, ka Jingpang kaba U Trai u la wallam halor jong nga ha ka por ka jingbitar jong u.

¹³ “U la phah ïa ka ding nalor, ka ding kaba thang hapoh jong nga. U la buh ka jingriam na ka bynta jong nga bad u la wanrah ïa nga sha khyndew. Nangta u la iehnoh ïa nga bad ieh ïa nga ha ka jingpang baneh.

¹⁴ “U la kynmaw ïa ki pop jong nga baroh bad u la teh lang ïa ki baroh; u la sdien ïa ki ha u ryndang jong nga, bad nga la sdang tlot hapoh ka jingbankhia. U Trai u la ai ïa nga ha ki nongshun jong nga, bad ngam lah leh ei ei pyrshah ïa ki.

¹⁵ “U Trai u rkhiebeiñ ïa baroh ki shipai bakhlaiñ tam jong nga; u la phah ka kynhun shipai ban pynjot ïa ki samla shynrang jong nga. U la pynlwet ïa ki briew jong nga kum ïa ki sohwaiñ ha ka jaka khñiot sohwaiñ.

¹⁶ “Kata ka long balei ba ki khmat jong nga ki shlei da ki ummat. Ym don mano mano ba lah ban pyntngen ïa nga; ym don mano mano ba lah ban ai jingshlur ïa nga. U nongshun u la jop ïa nga; ki briew jong nga kim don ei ei shuh kaba sah.

¹⁷ “Nga kner ïa la ki kti, hynrei ym don mano mano ban ïarap ïa nga. U Trai u la khot ïa ki nongshun pyrshah ïa nga na ki liang baroh; ki la leh ïa nga kum ïa kaei kaei kaba jakhlia.

¹⁸ “Hynrei U Trai u long uba hok, namar ngam shym la kohnguh ïa u. To shahshkor ïa nga, ko ki briew hangno hangno; to khmih ïa nga ha ka jingpang jong nga. Ki samla shynrang bad kynthei jong nga ki la shah ringmraw noh.

¹⁹ “Nga la khot ïa kiba ïateh lok bad nga, hynrei ki la kyntait ban ïarap ïa nga. Ki lyngdoh bad ki nongïalam ki la ïap ha ki lynti bah jong ka nongbah, ki da wad ïa ka jingbam ban ri pynim ïa lade.

²⁰ “Ha khmih, A Trai, ha ka jingkordit jong nga, ha ka jingjynjar sat ka mynsiem jong nga! Ka dohnud jong nga ka pait ha ka jingsngewsih na ka bynta ki pop jong nga. Ka don ka jingpynïap ha ki lynti bah; wat hapoh ïing ka don ka jingïap.

²¹ “To shahshkor ïa ki jingud jong nga; ym don mano mano ban pyntngen ïa nga. Ki nongshun jong nga ki kmen ba me la wallam ka jingjot halor jong nga. To wallam ïa ka sngi kaba me la kular; to pynlong ïa ki nongshun jong nga ban shahshitom kum ma nga.

²² “To pynrem ïa ki na ka bynta ka jingbymman jong ki baroh; to pynshitom ïa ki kumba me la pynshitom ïa nga na ka bynta ki pop jong nga. Nga ud ha ka jingjynjar, bad nga pang ha ka dohnud jong nga.”