SEPHANAÏAH 3 - Khasi CL Bible (BSI)

Ka pop jong ka Jerusalem bad ka jingsiewspah

¹ Ka Jerusalem ka long kaba la tim, kata ka nongbah kaba ijli, kaba ïeng ïaleh pyrshah, kaba banbeiñ ïa la ki jong ki briew.

² Kam shym la pynshahshkor ïa U Trai lane pdiang ïa ka jingsneng pynbeit jong u. Kam shym la buh ïa la ka jingshaniah ha U Trai lane kyrpad ïa ka jingïarap jong u.

³ Ki rangbah pynïaidkam jong ka ki long kum ki sing bakyrhuh; ki nongbishar jong ka ki long kum ki suri bathngan, kiba lalot eh kat ban pynsah sa tang ka shyieng haduh mynstep.

⁴ Ki nongïathuhlypa ki long ki bym don jingkitkhlieh bad kiba shetkylla; ki lyngdoh ki pyntngit ïa kaei kaba kyntang, bad ki pynwan ïa ka aiñ jong U Blei sha ka jingmyntoi jong ki hi.

⁵ Hynrei U Trai u dang don ha ka nongbah; u leh ïa kaei kaba dei bad da lei lei ruh em ïa kaei ka bymdei. Man ka step khlem bakla, u wallam ka jinglehhok ha ki briew jong u. Bad pynban hangta ki briew bymhok ki ïai leh bymdei bad kim sngewlehrain.

⁶ U Trai u ong, “Nga la pynduh lut ïa ki jaitbynriew baroh; nga la pynjot ïa ki nongbah jong ki bad iehnoh ïa ki kynroh bad ïa ki kut jong ki ha ki jingjot. Ki nongbah ki la shah iehnoh; ki lynti bah ki thylli — ym shym pynsah ïa uwei ruh.

⁷ Nga la pyrkhat ba kumta ki briew jong nga kin da la ñiewkor ïa nga bad pdiang ïa ka jingsneng pynbeit jong nga, ba kin ym da la klet ïa ka jinghikai kaba nga la hikai ïa ki. Hynrei shen shen ki la leh bymman kumba ki ju leh.

⁸ “Shu ap,” U Trai u ong. “Ap ïa ka sngi haba ngan ïeng ban pynrem ïa ki jaitbynriew. Nga la pynbeit ïa la ka jingmut ban lumlang ïa ki jaitbynriew bad ki hima khnang ban shah ïa ki ban sngew ïa ka bor ka jingbitar jong nga. Ïa ka pyrthei baroh kawei yn pynjot da ka ding ka jingbitar shla jong nga.

⁹ “Nangta ngan pynkylla ïa ki briew jong ki hima, bad kin duwai tang sha nga bad ym sha kiwei pat ki blei. Ki baroh kin kohnguh ïa nga.

¹⁰ Wat na ka Sudan kaba sha jngai, ki briew jong nga kiba la sakma kin wallam ki jingainguh sha nga.

¹¹ Ha kata ka por, ma phi, ki briew jong nga phim donkam shuh ban lehrain ba phi la ïeng ïaleh pyrshah ïa nga. Ngan weng noh ïa uno uno baroh uba sarong bad uba sngewmeng, bad phin ym ïeng ïaleh pyrshah shuh da lei lei ïa nga ha u lum bakyntang jong nga.

¹² Ngan ieh hangta ïa ki briew kiba sngewrit bad kiba duk, ki ban wan sha nga na ka bynta ka jingïarap.

¹³ Ki paid Israel kiba lait im kin ym leh kano kano ka bym dei ïano ïano, kin ym ïathuh lamler, lymne pyrshang ban shukor. Kin manbha bad shongshngain, kin ym sheptieng ïano ïano.”

Ka jingrwai jong ka jingkmen

¹⁴ To rwai bad risa da ka jingkmen, ko ki paid Israel! To shadkmen da la ka dohnud baroh, ko Jerusalem!

¹⁵ U Trai u la pynkut ïa ka jingpynshitom ïa phi; u la weng noh ïa ki nongshun jong phi baroh. U Trai, u syiem ka Israel, u long bad phi; ym don daw mynta ban sheptieng.

¹⁶ Ka por ka poi haba kin ong ïa ka Jerusalem, “Wat sheptieng, ko ka nongbah Seïon! Wat ai ba ki kti jong pha kin noh kyrwep!

¹⁷ U Trai U Blei jong pha u long bad pha; ka bor jong u ka ai ha pha ka jingjop. U Trai un shem jingsngewbha ha pha, bad ha ka jingieit jong u un ai ha pha ka jingim bathymmai. Un rwai bad un kmen halor jong pha,

¹⁸ kumba kmen ki briew ha ka Jingkhawai Niam.” U Trai u ong, “Nga la pynkut ïa ka jingbyrngem ïa ka jingtim bad weng noh ïa ka jinglehrain jong pha.

¹⁹ Ka por ka poi! Ngan pynshitom ïa ki nongbanbeiñ jong pha; ngan pyllait im ïa baroh kiba dkoh bad ngan wallam sha ïing ïa kiba shah ringmraw. Ngan pynphai ïa ka jinglehrain jong ki sha ka jingdonburom, bad baroh ka pyrthei kan ïaroh ïa ki.

²⁰ Ka por ka poi! Ngan wallam sha ïing ïa ki briew jong pha kiba la shah pynsakma; ngan pynlong ïa pha kaba pawnam ha kylleng ka pyrthei bad ngan pynlong ïa pha kaba manbha pat.” U Trai u la kren.