SEPHANAÏAH 2 - Khasi CL Bible (BSI)

Ka jingkyrpad ban kylla-kaba-mut

¹ Ko jaitbynriew bym don jinglehrain, to tipbriew

² ha shuwa ba yn beh noh ïa pha kum ïa u stait ba la beh noh da ka lyer, ha shuwa ba ka jingbitar shla jong U Trai ka wan halor jong pha, ha shuwa ka sngi ha kaba u pyn-i ïa ka jingbitar shla jong u.

³ To phai noh sha U Trai, phi baroh ki briew kiba sngewrit, kiba kohnguh ïa ki hukum jong u. To leh ïa kaei kaba dei, bad to pynrit ïa lade ha khmat U Trai. Lehse phin lait na ka jingpynshitom ha ka sngi haba U Trai u pyn-i ïa ka jingbitar jong u.

Ka jingtim ïa ki Hima sawdong jong ka Israel

⁴ Yn ym iehnoh ïano ïano ha ka nongbah Gasa. La iehnoh ïa ka Ashkelon. Ïa ki briew jong ka Ashdod yn beh noh ha ka shiteng sngi, bad ïa ki briew jong ka Ekron yn beh noh na ka nongbah jong ki.

⁵ Ma phi ki Philistia phi long kiba la tim, phi ki briew kiba shong basah ha shi lynter jong ka rud duriaw. U Trai u la ai ka rai bishar halor jong phi. Un pynjot ïa phi, bad yn ym pynsah ïa uwei ruh.

⁶ Ka ri jong phi harud duriaw kan kylla long ki pyntha bym don jingkah lem bad ki trep jong ki nongap langbrot bad ki sem langbrot.

⁷ Ki paid ka Judah kiba lait im kin buhai ha ka ri jong phi. Kin pynbamphlang ïa ki kynhun langbrot jong ki hangta bad thiah hapoh ki ïing ka Ashkelon. U Trai U Blei jong ki un long lem bad ki bad un pynlong ïa ki ban manbha pat.

⁸ U Trai Badonbor Baroh u ong, “Nga la ïohsngew ba ki briew jong ka Moab bad Ammon ki krenbeiñ bad ki pynsalia ïa ki briew jong nga, bad ki kren khraw ba kin kurup ïa ka ri jong ki.

⁹ Kumba shisha nga long U Trai uba im, U Blei jong ka Israel, nga smai ba ka Moab bad ka Ammon kin shah pynjot kum ka Sodom bad Gomorrah. Kin long ka jaka jong ki thliew mluh bad ki jingjot bymjukut, kaba la tap da ki ñiut. Kito na ki briew jong nga kiba lait im kin lute ïa ki bad shim ïa ka ri jong ki.”

¹⁰ Kata ka long kumno ki briew jong ka Moab bad ka Ammon kin shah pynshitom na ka bynta ka jingsarong bad jingmeng jong ki bad na ka bynta ka jingkrenbeiñ ïa ki briew jong U Trai Badonbor Baroh.

¹¹ U Trai un pynshyrkhei ïa ki. Un pynhiar ïa ki blei jong ka pyrthei sha ka bym long ei ei, bad kumta kawei pa kawei ka jaitbynriew kan mane ïa u, kawei kawei ha la ka jong ka ri.

¹² U Trai un pynïap ruh ïa ki briew jong ka Sudan.

¹³ U Trai un pyndonkam ïa ka bor jong u ban pynjot ïa ka Assyria. Un pynlong ïa ka nongbah Ninebeh ka jingjot ba la shah iehnoh, ka ri shyiap bym don um.

¹⁴ Kan long ka jaka ha kaba ki kynhun jingri, ki masi, bad ki mrad ba bun jait kin dem. Ki dkhoh kin shong ha ki jingjot jong ka bad kin pah na ki jingkhangïit. Ki tyngab kin pah ha ki khmat jingkhang. Ïa ki dieng Kedar jong ki jingtei jong ka yn sloit noh.

¹⁵ Kata ka long kaei ka ban jia ïa ka nongbah kaba sarong katta katta ïa la ka bor bad kaba pyrkhat ba ka don ha ka jingshngain. Ki briew jong ka ki pyrkhat ba ka nongbah jong ki ka long kaba khraw tam ha ka pyrthei. Katno kan long ka jaka kaba kynjah, ka jaka ha kaba ki mradkhlaw kin pynjahthait! Uwei uwei baroh uba ïaid lyngba jong ka un kynran dien ha ka jingsheptieng.