SEPHANAÏAH 1 - Khasi CL Bible (BSI)

¹ Kane ka long ka khubor ba U Trai u la ai ha u Sephanaïah ha ka por ba u Josaïah u khun jong u Ammon u long u syiem ka Judah. (U Sephanaïah u la hiarpateng na u syiem Hesekaïah lyngba u Amaraïah, u Gedalaïah, bad u Kushi.)

Ka sngi ka jingbishar jong U Trai

² U Trai u la ong, “Ngan sa pynjot ïa kiei kiei baroh ha ka pyrthei,

³ ïa baroh ki briew bad ki mrad, ki sim bad ki dohkha. Ngan wallam ka jingkyllon jong u bymman. Ngan pynjot ïa u bynriew baroh, bad yn ym pynsah ïa uno uno uba lait im. Ma nga, U Trai nga la kren.

⁴ “Ngan pynshitom ïa ki briew jong ka Jerusalem bad ka Judah baroh. Ngan pynjot ïa ka dien bakhatduh ka jingmane ïa u Baal hangta, bad ym don mano mano ban kynmaw wat ïa ki lyngdoh blei nongwei kiba shakri ïa u.

⁵ Ngan pynjot ïa uno uno uba leit kiew sha tnum ïing bad mane ïa ka sngi, u bnai, bad ïa ki khlur. Nga pynjot ruh ïa kito kiba mane ïa nga bad kiba smai ban ïaineh ha nga, hynrei pynban ki shim smai ha ka kyrteng jong u blei Molekh.

⁶ Ngan pynjot ïa kito kiba la phai lyndet bad ki bym bud shuh ïa nga, kito ki bym shym wan sha nga, lane kylli na nga ban kdew lynti ïa ki.”

⁷ Ka sngi ka la jan haba U Trai un shong ha ka jingbishar; kumta to sngap jar ha ka jingdon ryngkat jong u. U Trai u pynkhreh ban kñia ïa ki briew jong u bad u la khot sngewbha ïa ki nongshun ban lute ïa ka Judah.

⁸ “Ha kata ka sngi ka jingpynïap,” ong U Trai, “ngan pynshitom ïa ki rangbah pynïaidkam, ki khun shynrang jong u syiem, bad baroh kiba leh ïa ki rukom nongwei.

⁹ Ngan pynshitom ïa baroh kiba mane kum ki nongmane bleithaw bad kiba tuh bad pynïap khnang ban pyndap ïa ka ïing u kynrad jong ki da ka jinglute.

¹⁰ “Ha kata ka sngi,” ong U Trai, “phin ïohsngew ïa ka jingsawa ka jingïam ha ka Khyrdop Dohkha ha Jerusalem. Phin ïohsngew ka jingud ha ka bynta bathymmai jong ka nongbah bad ka jingsawa bajam jong ka jingkhyllem ha ki lumrit.

¹¹ To ïam bad to kyang haba phi ïohsngew ïa kane. Phi kiba shong basah ha ki bynta ba ha trai jong ka nongbah, namar baroh ki nongkhaïi kin ïap!

¹² “Ha kata ka por ngan shim ïa ka sharak bad wad ïa ka Jerusalem. Ngan pynshitom ïa ki briew kiba sngewhun ha lade bad kiba sngewskhem, kiba ong ha lade, ‘U Trai um ju leh ei ei, kumne lane katai.’

¹³ Ïa ka spah jong ki yn lute bad ïa ki ïing jong ki yn pynjot. Kin ym shong ha ki ïing kiba ki tei lane dih ïa ka waiñ na ki bri sohwaiñ kiba ki thung.”

¹⁴ Ka sngi bakhraw jong U Trai ka la jan — ka la jan eh bad ka wan kloi! Kata kan long ka sngi kaba kthang, namar wat ki shipai kiba shlur tam kin kyang jam ha ka jingnoh mynsiem!

¹⁵ Kan long ka sngi jong ka jingbitar shla, ka sngi ka jingjynjar bad ka jingnoh mynsiem, ka sngi ka jingjot bad ka jingpynjot, ka sngi ka jingdum bad ka jingsngewsih, kaba dum bad ka sngi ba kah lyoh,

¹⁶ ka sngi kaba dap da ka jingsawa ki turoi thma bad ka jingpyrta-thma jong ki shipai kiba tur ïaleh ïa ki nongbah ba la ker kynroh bad ïa ki kut bajrong.

¹⁷ U Trai u ong, “Ngan wallam ïa ki jingpynjot kiba kum kine ha u bynriew ba uwei uwei baroh un tare shane shatai kum u briew bamatlah. Ki la leh pop pyrshah ïa nga, bad mynta ïa ka snam jong ki yn theh noh kum ka um, bad ki metïap jong ki kin pyut ha khyndew.”

¹⁸ Ha ka sngi haba U Trai un pyn-i ïa ka jingbitar shla jong u, wat ka rupa bad ka ksiar jong ki baroh kan ym lah ban pynim ïa ki. Ïa ka pyrthei baroh kawei yn pynjot da ka ding ka jingbitar jong u. Un pynkut — ka jingkut kaba kynsan — ïa uwei pa uwei uba im ha ka pyrthei.