SEKHARAÏAH 9 - Khasi CL Bible (BSI)

Ka jingbishar ïa ki hima kiba marjan

¹ Kane ka long ka khubor jong U Trai: U la rai pynshitom ïa ka ri Hadrakh bad ïa ka nongbah Damaskos. Ym tang ki jait Israel hynrei ka nongbah Syria ruh ka long ka jong U Trai.

² Ka Hamath, kaba ïakhap pud bad ka Hadrakh, ka long ruh ka jong u, bad kumta ruh ki long ki nongbah Tyros bad Sidon, lem bad ki jingtbit jong ki baroh.

³ Ka Tyros ka la tei ki kut na ka bynta ïa lade bad ka la kynton shibun eh ka rupa bad ka ksiar ba ka la kynrei kum ka tngit.

⁴ Hynrei U Trai un shim noh ïa kiei kiei baroh kiba ka don. Un kynting ïa ka spah jong ka sha ka duriaw, bad ïa ka nongbah yn thang haduh khyndew.

⁵ Ka nongbah Ashkelon kan ïohi ïa kane bad kan sheptieng. Ka nongbah Gasa kan ïohi ïa kane bad kan shah ka jingshitom bakhraw. Kumta ruh kan long ka Ekron, bad ïa ki jingkyrmen jong ka yn pynkhynñiuh. Ka Gasa kan duh noh ïa u syiem jong ka, bad ïa ka Ashkelon yn ieh kynjah.

⁶ Ki briew ba ïakhleh jaitbynriew kin shong kin sah ha Ashdod. U Trai u ong, “Ngan pyndem lut ïa kine ki Philistia kiba sarong.

⁷ Kin ym lah shuh ban bam ïa ka doh lem bad ka snam ha ka, lane ïa kiwei pat ki jingbam ba la mana. Baroh kiba lait im kin long ka bynta jong ki briew jong nga bad kin long kum ka kur ha ka jait Judah. Ka Ekron kan kylla long ka bynta jong ki briew jong nga, kumba ki Jebus ki la long.

⁸ Ngan ap phira ïa ka ri jong nga bad ngan ym shah ïa ki kynhun shipai ban ïaid lyngba jong ka. Ngan ym shah shuh ïa ki nongbanbor ban banbeiñ ïa ki briew jong nga. Nga la ïohi haduh katno ki briew jong nga ki la shahshitom.”

U syiem u ban sa wan

⁹ To kmen to shadkmen ko ki briew ka Seïon! Pyrta da ka jingkmen phi ki briew jong ka Jerusalem! Ha khmih u syiem jong phi u wan sha phi! U wan ha ka jingrisa bad ha ka jingjop, hynrei ha ka jingsngewrit bad u da shong halor ka kada — halor u khun kada.

¹⁰ U Trai u ong, “Ngan weng noh ïa ki kali thma na Israel bad shim ïa ki kulai na Jerusalem; ïa ki ryntieh ba la pyndonkam ha ka thma yn pynjot. U syiem jong phi un pynlong jingïasuk hapdeng ki jaitbynriew; un synshar na ka duriaw sha ka duriaw, na ka wah Ïuphratis sha kiba kut jong ka pyrthei.”

Ka jingpynbha pat ïa ki briew jong U Blei

¹¹ U Trai u ong, “Namar ka jutang jong nga bad phi kaba la shonshab da ka snam jong ki jingkñia, ngan pyllaitluid ïa ki briew jong phi — kaba laitluid na ki thliew bym don um jong ka jingshah ringmraw.

¹² To wan phai, phi kiba shah ringmraw kiba mynta phi la don ka jingkyrmen; to wan phai sha ka jaka jong phi kaba shngain. Mynta nga ong ïa phi ba ngan siew pat ar shah ïa phi da ka jingkyrkhu na ka bynta baroh kaba phi la shahshitom.

¹³ Ngan pyndonkam ïa ka Judah kum ka ryntieh jong u shipai bad ïa ka Israel kum ki khnam. Ngan pyndonkam ïa ki rangbah jong ka Seïon kum ka waitlam, ban ïaleh ïa ki rangbah jong ka Gris.”

¹⁴ U Trai un mihpaw halor ki briew jong u; un siat ïa ki khnam jong u kum ka leilieh. U Trai Nongsynshar un pynsawa ïa ka turoi; un ïaid ha ki 'erïong na shathie.

¹⁵ U Trai Badonbor Baroh un ïada ïa ki briew jong u, bad kin pynjot ïa ki nongshun jong ki. Kin pyrta ha ka thma kum ki rangbah ba la buaid bad kin pynmih ïa ka snam jong ki nongshun jong ki; kan tuid kum ka snam jong ka jingkñia ba la theh halor ka duwan na ka jingdiang.

¹⁶ Haba kata ka sngi ka poi, U Trai un pyllait im ïa ki briew jong u, kumba u nongaplangbrot u pyllait im ïa ka kynhun langbrot jong u na ka jingma. Kin tyngshaiñ ha ka ri jong u kum ki mawlynnai ha ka pansngiat.

¹⁷ Katno kaba bha bad kaba itynnat ka ri kan long! Ki samla kin san kin khlaiñ da u kew bad ka waiñ jong ka.