SEKHARAÏAH 8 - Khasi CL Bible (BSI)

Ki jingkular U Trai ban pynbha pat ïa ka Jerusalem

¹ U Trai Badonbor Baroh u la ai ïa kane ka khubor ha u Sekharaïah:

² “Nga la angnud ban ïarap ïa ka Jerusalem namar ka jingieit bajylliew jong nga ïa ki briew jong ka, ka jingieit kaba la pynlong ïa nga ban bitar ïa ki nongshun jong ka.

³ Ngan wan phai pat sha Jerusalem, ka nongbah bakhuid jong nga, bad ban shong ban sah hangta. Ïa ka yn tip kum ka nongbah baïaineh, bad ïa u lum jong U Trai Badonbor Baroh yn khot u lum bakyntang.

⁴ Sa shisien pat ki tymmen shynrang bad kynthei, kiba la tymmen haduh katta ba ki pyndonkam ïa ki diengduh haba ki ïaid, kin shong ha ki jaka paidbah jong ka nongbah.

⁵ Bad ki lynti bah kin dap pat da ki khynnah shynrang bad kynthei kiba ïalehkai.

⁶ “Kane ka lah ban i kum ka bym lah long ha kito ki jaitbynriew kiba dang sah mynta, hynrei kam long ka bym lah ban long ïa nga.

⁷ Ngan pyllait im ïa ki briew jong nga na ki ri sha kiba la shim noh ïa ki,

⁸ bad ngan wallam pat ïa ki na mihngi bad na sepngi ban shong ban sah ha Jerusalem. Kin long ki briew jong nga, bad ngan long U Blei jong ki, da kaba synshar ha ka jingïaineh bad ha ka jinglehhok.

⁹ “To long shlur! Mynta phi ïohsngew ïa kijuh ki kyntien ba ki nongïathuhlypa ki la kren ha ka por ba la buh nongrim na ka bynta ban tei pat ïa ka Templ jong nga.

¹⁰ Ha shuwa kata ka por ym don mano mano ba lah bor ban wai la ïa ki mrad lymne ki briew, ban ym don mano mano ba lait na ki nongshun jong u. Nga la pynphai ïa ki briew pyrshah iwei ïa iwei pat.

¹¹ Hynrei mynta nga leh ha ka rukom ba kham pher ïa kiba lait im jong kane ka jaitbynriew.

¹² Kin thung ïa ki jingthung jong ki ha ka jingsuk. Ki bri sohwaiñ jong ki kin pynmih ki sohwaiñ, ka khyndew kan pynmih ïa ki jingthung, bad u slap un don kyrhai. Ngan ai ïa kine ki jingkyrkhu baroh ha ki briew jong ka hima jong nga kiba dang lait im.

¹³ Ko ki paid Judah bad Israel! Ha ki por ba-mynshuwa ki nongwei ki ïatim iwei ïa iwei pat da kaba ong, ‘Ai ba kijuh ki jingpynjot kiba la hap ha Judah bad Israel kin hap halor jong phi!’ Hynrei ngan pynim ïa phi, bad nangta kito ki nongwei kin ong iwei ïa iwei pat, ‘Ai ba phin ïohpdiang ïa kijuh ki jingkyrkhu kiba la wan ha ka Judah bad Israel!’ Kumta to long shlur bad wat sheptieng.”

¹⁴ U Trai Badonbor Baroh u ong, “Mynba ki kpa tymmen jong phi ki pynbitar ïa nga, nga la pynkhreh ka jingpynjot ïa ki bad ngam shym pynkylla ïa la ka jingmut, hynrei nga pyndep ïa ki jingthmu jong nga.

¹⁵ Hynrei mynta nga pynkhreh ban kyrkhu ïa ki paid ka Jerusalem bad Judah. Kumta wat sheptieng.

¹⁶ Kine ki long kiei kiei kiba phi dei ban leh. Kren ïa ka jingshisha iwei ïa iwei pat. Ha ki ïingbishar ai ïa ki jingbishar hok kiba shisha — kaba wanrah ïa ka jingsuk.

¹⁷ Wat thmu ïa ki rukom pynmynsaw iwei ïa iwei pat. Wat ai ïa ka jingsakhi lamler ha kaba jingsmai. Nga isih ïa ka jinglamler, ka jingbymlehhok bad ka jinglehbor.”

¹⁸ U Trai Badonbor Baroh u la ai ïa kane ka khubor ha u Sekharaïah.

¹⁹ “Ki jingshah jingit kiba la long ha u bnai basaw, uba san, uba hynñiew, bad uba shiphew kin kylla long ki Jingkhawai Niam ka jingkmen bad ka jingshadkmen ïa ki paid Judah. Phi dei ban ieit ïa ka jingshisha bad ka jingsuk.”

²⁰ U Trai Badonbor Baroh u ong, “Ka por ka poi haba ki briew na ki nongbah babun kin wan sha Jerusalem.

²¹ Kito kiba na kawei ka nongbah kin ong ha kito kiba na kawei pat, ‘Ngi leit ban mane ïa U Trai Badonbor Baroh bad ban duwai na ka bynta ka jingkyrkhu jong u. To wan bad ngi!’

²² Bun ki briew bad ki jaitbynriew bakhlaiñbor kin wan sha Jerusalem ban mane ïa U Trai Badonbor Baroh bad ban duwai na ka bynta ka jingkyrkhu jong u.

²³ Ha kito ki sngi shiphew ngut ki nongwei kin wan sha uwei u Jiw bad ong, ‘Ngi kwah ban ïoh bynta ha ka lawei jong phi, namar ngi la lah ïohsngew ba U Blei u don bad phi.’ ”