SEKHARAÏAH 7 - Khasi CL Bible (BSI)

U Trai u pynrem ïa ka jingshah jingit ka bymshisha

¹ Ha ka snem kaba saw ba u Darius u long u patsha, ha ka sngi kaba saw jong u bnai uba khyndai (u bnai Kisleb), U Trai u la ai ka khubor ha nga.

² Ki briew ka Bethel ki la phah ïa u Shareser bad ïa u Regemmelekh bad ïa ki rangbah jong ki sha ka Templ jong U Trai Badonbor Baroh ban duwai na ka bynta ka jingkyrkhu jong U Trai

³ bad ban kylli ïa ki lyngdoh bad ki nongïathuhlypa ïa kane ka jingkylli: “Hato ngin nang bteng ban ïambriew namar ka jingpynjot ïa ka Templ, da kaba shahjingit ha u bnai uba san kumba ngi la ju leh la bun bun snem mynta?”

⁴ Kane ka long ka khubor jong U Trai kaba la wan ha nga.

⁵ U la ong, “Ïathuh ïa ki briew jong ka ri bad ïa ki lyngdoh ba haba ki shahjingit bad ïambriew ha u bnai basan bad bahynñiew ha kine ki hynñiewphew snem, kam shym dei ha ka jingñiewburom ïa nga.

⁶ Bad haba ki la bam bad dih, ka long na ka bynta ka jingpynhun ïa ki hi.”

⁷ Kane ka dei kaei kaba U Trai u la ong lyngba ki nongïathuhlypa kiba mynshuwa ha ka por mynba ka Jerusalem ka dang manbha bad dap da ki briew bad mynba dang don bun ki briew kiba shong basah ym tang ha ki shnong sawdong ïa ka nongbah hynrei kumjuh ruh ha ka phang bashathie bad ha ki kjat lum ha ka phang sepngi.

Ka jingbymkohnguh, ka daw jong ka jingshah ringmraw

⁸ U Trai u la ai ïa kane ka khubor ha u Sekharaïah:

⁹ “La slem bah nga la ai ïa kine ki hukum ha ki briew jong nga: ‘Phi dei ban peit ba ïa ka jinglehhok la pyndep, bad phi dei ban pyn-i ka jingbhasbun bad ka jingisynei iwei ïa iwei pat.

¹⁰ Wat banbeiñ ïa ki riewkynthei, ki khunswet, ki nongwei kiba shong basah hapdeng jong phi, lane mano mano kiwei pat kiba kyrduh. Bad wat pyrkhat ïa ki rukom ban pynmynsaw iwei ïa iwei pat.’

¹¹ “Hynrei ki briew jong nga ki kyntait da ka jingmynthi ban pynshahshkor ïa nga. Ki khang ïa ki jingmut jong ki

¹² bad ki pynlong ïa ki dohnud jong ki, kiba eh kum u mawsiang. Namar ba kim shym la shahshkor ïa ka jinghikai kaba nga la phah lyngba ki nongïathuhlypa kiba la im slem bah, nga la bitar shikatdei eh.

¹³ Namar ba kim shym la shahshkor mynba nga la kren, ngam shym la jubab mynba ki la duwai.

¹⁴ Kum ka 'erïong nga la sar noh ïa ki ban shong ban sah ha ki ri nongwei. Ïa kane ka ri babha la iehnoh kynjah ïa ka, khlem don mano mano bashong ba sah hangta.”