SEKHARAÏAH 6 - Khasi CL Bible (BSI)

Ka jingïohipaw ïa ki saw tylli ki kali ïapom

¹ Nga la ïoh sa kawei pat ka jingïohipaw. Ha kane ka por nga la ïohi saw tylli ki kali ïapom kiba wan mih napdeng ki ar tylli ki lumbah rnong.

² Ïa ka kali ïapom kaba nyngkong la tan da ki kulai rong saw, ïa kaba ar da ki kulai rong ïong,

³ ïa kaba lai da ki kulai rong lieh, bad ïa kaba saw da ki kulai thohbroin.

⁴ Nangta nga la kylli ïa u angel, “Ko rangbah, kaei ka jingmut jong kine ki kali ïapom?”

⁵ U la jubab, “Kine ki long ki sawlyer, ki dang shu lah wan na ka jingdon ryngkat jong U Trai ka pyrthei baroh.”

⁶ Ka kali ïapom ba la tan da ki kulai rong ïong ka la leit shaphang shatei sha Babilonia, ki kulai rong lieh ki leit shaphang sepngi, bad ki kulai thohbroin ki leit sha ka ri bashathie.

⁷ Katba ki kulai thohbroin ki dang wan mih, ki la long kiba da kwah eh ban leit bad ban jurip ïa ka pyrthei. U angel u la ong, “Khie leit bad jurip ïa ka pyrthei!” — bad ki la leh kumta.

⁸ Nangta u angel u la pyrta jam sha nga, “Ki kulai kiba la leit shaphang shatei sha Babilonia ki la pynjai jai ïa ka jingbitar jong U Trai.”

Ka hukum ban pynphong pansngiat ïa u Joshua

⁹ U Trai u la ai ha nga ïa kane ka khubor.

¹⁰ U la ong, “Shim ïa ki jingai sngewbha ba la ai da u Heldai, u Tobijah bad u Jedaïah kiba la shah ringmraw, bad leit shisyndon sha ka ïing jong u Josaïah u khun jong u Sephanaïah. Kine ki rangbah baroh ki la wan phai pat na ka jingshah ringmraw ha Babilonia.

¹¹ To thaw ka pansngiat na ka rupa bad ka ksiar kaba ki la ai, bad buh ïa ka halor ka khlieh jong u Joshua, u Rangbah Lyngdoh u khun jong u Jehosadak.

¹² Ïathuh ïa u ba U Trai Badonbor Baroh u ong, ‘U briew ïa uba la khot U Tnat un manbha ha kaba u don bad un tei ïa ka Templ jong U Trai.

¹³ U long ma u, u ban tei ïa ka bad ïohpdiang ïa ka burom kaba dei ïa u syiem bad un synshar ïa ki briew jong u. U lyngdoh un ïeng hajan ka khet jong u, bad kin ïatreilang ha ka jingsuk bad ha ka jingïasngewtynnat.’

¹⁴ Ka pansngiat kan long ka jingpynsah kynmaw ha ka Templ jong U Trai ha ka jingñiewburom ïa u Heldai, u Tobijah, u Jedaïah, bad u Josaïah.”

¹⁵ Ki rangbah kiba sah sha jngai bah kin wan bad ïarap ban tei pat ïa ka Templ jong U Trai. Bad haba la tei pat ïa ka, phin tip ba U Trai Badonbor Baroh u la phah ïa nga sha phi. Kane baroh kan jia lada phi kohnguh lut ïa ki hukum jong U Trai U Blei jong phi.