SEKHARAÏAH 5 - Khasi CL Bible (BSI)

Ka jingïohipaw ïa ka kot kli kaba her

¹ Nga la khmih biang, bad ha kane ka por nga la ïohi ïa ka kot kli kaba her ha ka lyer.

² U angel u la kylli ïa nga kaei nga la ïohi. Nga la jubab, “Ka kot kli baher ha ka lyer; ka don khyndai mitar ka lynter bad saw mitar shiteng ka pyngkiang.”

³ Nangta u la ong ha nga, “Halor jong ka la thoh ïa ka jingtim kaba dei ban leit sha ka ri baroh kawei. Ha kawei ka liang jong ka kot kli ka ong ba ïa uwei pa uwei u nongtuh yn weng noh na ka ri; bad ha kawei pat ka liang ka ong ba ïa uno uno uba ïathuh lamler hapoh ka jingsmai yn shim noh ïa u ruh.

⁴ U Trai Badonbor Baroh u ong ba un phah shabar ïa kane ka jingtim, bad kan rung shapoh ka ïing jong uwei pa uwei u nongtuh bad sha ka ïing jong uwei pa uwei uba ïathuh lamler hapoh ka jingsmai. Kan ïaineh ha ki ïing jong ki bad ieh ïa ki ha ka jingjot.”

Ka jingïohipaw ïa ka kynthei hapoh ka shang

⁵ U angel u la mihpaw biang bad u la ong, “Ha khmih! Ïa kaei re kaei kawei pat kaba wan!”

⁶ “Ka dei kaei?” Nga la kylli. U la jubab, “Ka dei ka shang, bad ka ïeng na ka bynta ka pop jong ka ri baroh kawei.”

⁷ Ka shang ka la don ka jingtap ba la shna da ka sisa. Katba nga dang khmih, la plied ïa ka jingtap, bad hangta hapoh ka shang la shong ka kynthei!

⁸ U angel u la ong, “Kane ka kynthei ka ïeng na ka bynta ka jingbymman.” Nangta u ñiat ïa ka sha tbian shapoh jong ka shang bad u tap pat shapoh ïa ka jingtap.

⁹ Nga la khmih shajrong bad ïohi ïa ki ar ngut ki kynthei kiba her sha nga lem bad ki thapniang bakhlaiñbor kum kito ki jong ka thring. Ki la shim ïa ka shang bad ki her noh lem bad ka.

¹⁰ Nga la kylli ïa u angel, “Shaei ki rah ïa ka?”

¹¹ U la jubab, “Sha Babilonia, ha kaba kin tei ka templ na ka bynta jong ka. Haba la dep shna ïa ka Templ, ïa ka shang yn buh hangta ïa ka ba yn mane.”