SEKHARAÏAH 4 - Khasi CL Bible (BSI)

Ka jingïohipaw ïa u diengpynïeng sharak

¹ U angel uba la lah kren ha nga u la wan biang bad u la kyrsiew ïa nga la kumba nga dang thiah.

² “Kaei me ïohi?” U la kylli. “U diengpynïeng sharak ba la shna da ka ksiar,” nga la jubab. Ha ka kliar ka don ka pliang na ka bynta ka umphniang. “Halor u diengpynïeng sharak don hynñiew tylli ki sharak, kawei kawei bad ki jaka na ka bynta ki hynñiew tylli ki ksai sharak.

³ Don ar tylli ki dieng Olib hajan u diengpynïeng sharak, uwei ha kawei kawei ka liang jong u.”

⁴ Nangta nga la kylli ïa u angel, “Kine kiei kiei ki ïeng na ka bynta kaei, ko rangbah?”

⁵ “Hato mem tip?” U la kylli ïa nga. “Em, ngam tip, ko rangbah,” nga la jubab.

Ka jingkular U Blei ïa u Serubbabel

⁶ U angel u la bthah ïa nga ban ai ha u Serubbabel ïa kane ka khubor na U Trai: “Men jop, ym da ka bor shipai lymne da ka bor ka jingkhlaiñ jong me, hynrei da U Mynsiem jong nga.

⁷ Ki jingjynthut kiba khraw kat ki lumbah kin jah noh ha khmat jong me. Men tei pat ïa ka Templ, bad katba me dang buh ïa u maw bakhatduh ha la ka jaka, ki briew kin pyrta ‘Kaba itynnat, kaba itynnat!’ ”

⁸ Sa kawei pat ka khubor ka la wan ha nga na U Trai.

⁹ U la ong, “U Serubbabel u la buh ïa ka nongrim jong ka Templ, bad un pyndep ïa ka jingtei. Haba kane ka jia, ki briew jong nga kin tip ba dei ma nga uba la phah ïa me sha ki.

¹⁰ Ki la noh mynsiem namar ka jingsuki jong ka jingïaid ka kam. Hynrei kin ïohi ba u Serubbabel u dang ïai tei ïa ka Templ, bad kin long kiba kmen.” U angel u la ong ha nga, “Ki hynñiew tylli ki sharak ki long ki hynñiew tylli ki khmat jong U Trai kiba khmih halor ka pyrthei baroh.”

¹¹ Nangta nga la kylli ïa u, “Kaei ka jingmut jong ki ar tylli ki dieng Olib ha kawei kawei ka liang jong u diengpynïeng sharak?

¹² Bad kaei ka jingmut jong ki ar tylli ki tnat dieng Olib hajan ki ar tylli ki tyndong ksiar na kaba la phylliew ïa ka umphniang Olib?”

¹³ U la kylli ïa nga, “Hato mem tip?” “Em, ngam tip, ko rangbah,” nga la jubab.

¹⁴ Nangta u la ong, “Kine ki long ki ar ngut ki rangbah kiba U Blei u la jied bad pynsleh ba kin shakri ïa u, U Trai jong ka pyrthei baroh kawei.”