SEKHARAÏAH 3 - Khasi CL Bible (BSI)

Ka jingïohipaw jong u nongïathuhlypa ïa u Rangbah Lyngdoh

¹ Ha kawei pat ka jingïohipaw, U Trai u la pyn-i ha nga ïa u Joshua u rangbah lyngdoh uba ïeng ha khmat u angel jong U Trai. Bad hangta hajan jong u Joshua la ïeng u Soitan, uba la khreh ban wallam ka jingmudui pyrshah ïa u.

² U angel jong U Trai u la ong ha u Soitan, “To U Trai un pynrem ïa me, ko Soitan! To U Trai, uba ieit ïa ka Jerusalem, un pynrem ïa me. Une u briew u long kum u dieng ïa uba la sei noh na ka ding.”

³ U Joshua u la ïeng hangta, u da phong ki jaiñ bajakhlia.

⁴ U angel u la ong ha la ki shakri ba kynja bneng, “Shim noh ïa ki jaiñ bajakhlia kiba une u briew u phong.” Nangta u ong ha u Joshua, “Nga la shim noh ïa ka pop jong me bad ngan ai ha me ki jaiñ bathymmai ban phong.”

⁵ U la hukum ïa ki shakri ban pynspong ka jaiñspong bakhuid halor ka khlieh jong u Joshua. Ki la leh kumta, bad nangta ki la pynphong ki jaiñ thymmai ïa u katba u angel jong U Trai u dang ïeng hangta.

⁶ Nangta u angel jong U Trai u la ïathuh ha u Joshua ba

⁷ U Trai Badonbor Baroh u la lah ong: “Lada me kohnguh ïa ki aiñ jong nga bad leh ïa ki kamram kiba nga la shaniah ha me, te men ïailong uba khmih ïa ka Templ jong nga bad ïa ki phyllaw jong ka, bad ngan shahshkor ïa ki jingduwai jong me, kumba nga shahshkor ïa ki jingduwai jong ki angel kiba don ha ka jingdon ryngkat jong nga.

⁸ Kumta to pynshahshkor, ko Joshua, me uba long u Rangbah Lyngdoh, to pynshahshkor, phi ki para lyngdoh jong u, ma phi kiba long ka dak jong ka lawei babha: Ngan pynpaw ïa la u shakri, ïa uba la khot U Tnat!

⁹ Nga buh ha khmat jong u Joshua ïa uwei u maw uba don hynñiew tylli ki dong. Ngan shniah ka jingthoh halor jong u bad ha ka shi sngi ngan shim noh ïa ka pop jong kane ka ri.

¹⁰ Haba kata ka sngi ka wan, uwei uwei na phi un khot sngewbha ïa la u paramarjan ban wan bad ban lehkmen ïa ka jingsuk bad ka jingshngain, ba la ker sawdong da ki bri sohwaiñ bad ki diengsoh Dumbur.”