SEKHARAÏAH 2 - Khasi CL Bible (BSI)

Ka jingïohipaw ïa u ksai thew

¹ Ha kawei pat ka jingïohipaw nga la ïohi ïa u briew uba don u ksai thew ha ka kti jong u.

² “Shano phin leit?” nga la kylli. “Ban thew ïa ka Jerusalem,” u la jubab, “ban ïohi katno ka jingjrong bad ka jingïar jong ka.”

³ Nangta nga la ïohi ïa u angel uba la lah kren ha nga ba u jam sha khmat bad ba uwei pat u angel u la wan ban ïashem ïa u.

⁴ Uba nyngkong u la kren ha uta uwei pat, “Khie mareh bad ong ha u samla uba don u ksai thew ba yn sa don bun byllien ki briew bad shibun bah ki jingri ha Jerusalem, ba kan long kaba heh katta katta ban don ki kynroh.

⁵ U Trai u la lah kular ba ma u hi un long ka kynroh ding sawdong ïa ka nongbah ban ïada ïa ka bad ba un shong un sah hangta ha ka burom jong u baroh.”

Ïa kiba shah ringmraw la khot ban wan noh sha ïing

^6-7 U Trai u la ong ha la ki briew, “Nga la pynsakma ïa phi ha ki liang baroh. Hynrei mynta, ma phi kiba shah ringmraw, phet noh na Babilonia bad leit phai pat sha Jerusalem.

⁸ Uno uno uba shoh ïa phi u shoh ïa uta uba kordor eh ha nga.” Kumta U Trai Badonbor Baroh u la phah ïa nga lem bad kane ka khubor ïa ki jaitbynriew kiba la lute ïa ki briew jong u:

⁹ “U Trai da lade hi un ïaleh pyrshah ïa phi, bad ïa phi yn sa lute da ki briew kiba shisien ki la long ki shakri jong phi.” Haba kane ka jia, uwei uwei baroh un tip ba U Trai Badonbor Baroh u la phah ïa nga.

¹⁰ U Trai u la ong, “To rwai da ka jingkmen, ko ki paid ka Jerusalem! Nga wan ban shong ban sah hapdeng jong phi!”

¹¹ Ha kata ka por shibun ki jaitbynriew kin wan sha U Trai bad long ki briew jong u. Un shong un sah hapdeng jong phi, bad phin tip ba u la lah phah ïa nga sha phi.

¹² Sa shisien pat ka Judah kan long ka nongkynti bakyrpang jong U Trai ha ka ri bakyntang jong u, bad ka Jerusalem kan long ka nongbah kaba u ieit tam na baroh.

¹³ To pynjar jar, uwei pa uwei baroh, ha ka jingdon ryngkat jong U Trai, namar u wan na ka jaka shong kaba khuid jong u.