SEKHARAÏAH 14 - Khasi CL Bible (BSI)

Ka Jerusalem bad ki hima

¹ Ka sngi ha kaba U Trai un shong ha ka khet bishar ka la jan. Te ïa ka Jerusalem yn sa lute, bad ïa ka jinglute yn sa pynïabynta ha ka jingïohi jong phi.

² U Trai un wallam lang ïa baroh ki jaitbynriew ban ïaleh thma ïa ka Jerusalem. Ïa ka nongbah yn sa shim noh, ïa ki ïing la lute, bad ïa ki kynthei la batbor. Shiteng na ki briew kin leit sha ka jingshah ringmraw, hynrei ïa kiba sah na ki yn ym shim noh na ka nongbah.

³ Nangta U Trai un mih shabar bad un ïaleh pyrshah ïa kito ki hima, kumba u la ïaleh ha ki por ba la dep.

⁴ Ha kata ka por un ïeng halor u lum Olib, ha ka phang mihngi jong ka Jerusalem. Te ïa u lum Olib yn sa kad arliang na mihngi sha sepngi da ka them kaba khraw. Shiteng jong u lumbah un kynriah shaphang shatei bad shiteng jong u shaphang shathie.

⁵ Phin lait phet lyngba kane ka them kaba pynkhlad arliang ïa une u lumbah. Phin phet kumba ki kpa tymmen jong phi ki la leh mynba u jumai u khynñiuh ha ka por jong u Ussaïah u syiem ka Judah. U Trai U Blei jong nga un wan, un wallam ïa ki angel baroh lem bad u.

⁶ Haba kata ka por ka poi, yn ym don shuh ka jingkhriat lane u thah,

⁷ lane kano kano ka jingdum. Kan ïai don borabor ka jingshai sngi, wat ha ka por mynmiet. Lano kane kan jia, tang U Trai uba tip.

⁸ Haba kata ka sngi ka poi, ka um basngur kan tuid na Jerusalem, shiteng na ka sha ka Duriaw Baïap bad kawei pat ka shiteng sha ka duriaw Mediterranian. Kan tuid baroh shisnem, ha ka aïom ba-rkhiang bad ha ka aïom bajhieh.

⁹ Nangta U Trai un long u syiem jong ka pyrthei baroh; uwei pa uwei baroh un mane ïa u kum U Blei bad tip ïa u da kajuh ka kyrteng.

¹⁰ Ïa ka thain baroh kawei naduh Geba ha ka phang bashatei bad shaduh Rimmon ha ka phang bashathie, yn pynmadan. Ka Jerusalem kan ïeng halor ka ri sawdong jong ka; ka nongbah kan kot naduh ka Khyrdop Benjamin shaduh ka Khyrdop Kyndong, ha kaba la ju don ka khyrdop ba-mynshuwa, bad na u Mot Hananel sha ki jaka khñiot waiñ jong u syiem.

¹¹ Ki briew kin shong kin sah hangta ha ka jingshngain, kin ym shah byrngem shuh da ka jingpynjot.

¹² U Trai un wallam ka jingpang bashyrkhei halor ki jaitbynriew baroh kiba ïaleh thma ïa ka Jerusalem. Ka doh jong ki kan pyut noh katba ki dang im; ki khmat bad ki thylliej jong ki kin pyut noh.

¹³ Ha kata ka por U Trai un pynlong ïa ki ba kin shaïong jingmut bad sheptieng haduh katta ba uwei uwei baroh un kem ïa u briew hajan jong u bad tur ïaleh ïa u.

¹⁴ Ki rangbah jong ka Judah ki ïaleh ban ïada ïa ka Jerusalem. Kin shim kum ka jinglute ïa ka spah jong ki hima baroh — ka ksiar, ka rupa bad ki jaiñphong babun.

¹⁵ Ka jingpang bashyrkhei kan hap halor ki kulai, ki khashor, ki ut, bad ki kada — halor ki mrad baroh ha ki jaka sher dara jong u nongshun.

¹⁶ Nangta baroh na kiba lait im na ki jaitbynriew kiba la tur ïaleh ïa ka Jerusalem kin leit shata man la ka snem ban mane ïa U Trai Badonbor Baroh kum u syiem bad ban rakhe ïa ka Jingkhawai Niam Ki Ïingtrep.

¹⁷ Lada kano kano ka jaitbynriew ka kyntait ban leit bad mane ïa U Trai Badonbor Baroh kum u syiem, te u slap un ym hap ha ka ri jong ki.

¹⁸ Lada ki nong Ijipt ki kyntait ban rakhe ïa ka Jingkhawai Niam Ki Ïingtrep, te yn sa shoh ïa ki da kajuh ka jingpang kaba U Trai un phah ha ki jaitbynriew baroh kiba kyntait ban leit.

¹⁹ Kane kan long ka jingpynshitom ka ban hap halor ka Ijipt bad ha baroh kiwei pat ki jaitbynriew lada kim rakhe ïa ka Jingkhawai Niam Ki Ïingtrep.

²⁰ Ha kata ka por wat ïa ki baje ha ki tyllai teh jong ki kulai yn thoh da ki kyntien “Ba la pynkyntang sha U Trai.” Ki khiew shet ha ka Templ kin long kiba kyntang kum ki jingdiang ha khmat ka duwan.

²¹ Ïa uwei pa uwei u khiew shet ha Jerusalem bad ha baroh ka Judah yn pynkyrpang na ka bynta ban pyndonkam ha ka jingmane ïa U Trai Badonbor Baroh. Ki briew kiba ai ïa ki jingkñia kin pyndonkam ïa ki ban phon ïa ka doh jong ki jingkñia. Haba kata ka por ka poi, yn ym don shuh uno uno u nongkhaïi ha ka Templ jong U Trai Badonbor Baroh.