SEKHARAÏAH 13 - Khasi CL Bible (BSI)

¹ “Haba kata ka por ka poi,” ong U Trai Badonbor Baroh, “yn plie ïa ka umpohliew ban pynkhuid ïa ki khun ki ksiew jong u Dabid bad ïa ki briew jong ka Jerusalem na ka pop bad ka jingmane bleithaw jong ki.

² Ha kata ka por ngan weng noh ïa ki kyrteng jong ki bleithaw na ka ri, bad ym don mano mano ban kynmaw shuh ïa ki. Ngan weng noh ïa uno uno uba kam ba u long u nongïathuhlypa bad ngan shim noh ïa ka jingkwah ban mane ïa ki bleithaw.

³ Te lada uno uno u ïaiban ban ïathuhlypa, u kpa bad ka kmie jong u hi kin ong ïa u ba u dei ban shah pynïap, namar u la kam ba u kren ïa ka ktien jong U Trai, hynrei u kren pynban ïa ki jinglamler. Haba u ïathuhlypa, u kpa bad ka kmie jong u kin dung pynïap ïa u.

⁴ Haba kata ka por ka poi, yn ym don nongïathuhlypa u ban sngewsarong ïa ki jingïohipaw jong u lane leh kum u nongïathuhlypa lane kup ïa ka jaiñkup bakhain jong u nongïathuhlypa khnang ban shukor ïa ki briew.

⁵ Pynban, un ong, ‘Ngam dei u nongïathuhlypa. Nga long u nongrep — nga la rep ha ka khyndew baroh shi rta ka jingim jong nga.’

⁶ Te lada uno uno u kylli ïa u, ‘Kiei kito ki jingmong ha ka shadem jong phi?’ Un jubab, ‘Nga la ïoh ïa ki ha ka ïing u paralok.’ ”

Ka hukum ban pynïap ïa u nongaplangbrot jong U Blei

⁷ U Trai Badonbor Baroh u ong, “To khie joit, ko waitlam, bad tur ïaleh ïa u nongaplangbrot uba trei na ka bynta jong nga! Pynïap ïa u, bad ïa ki langbrot yn pynsakma. Ngan tur ïaleh ïa ki briew jong nga

⁸ bad ha kylleng ka ri, ar na ka lai bynta ki briew kin ïap.

⁹ Bad ngan tynjuh ïa ka bynta kaba lai kaba dang lait im bad ngan pynkhuid ïa ki kumba phrang ïa ka rupa da ka ding. Ngan tynjuh ïa ki kumba la ju tynjuh ïa ka ksiar. Nangta kin duwai ha nga, bad ngan jubab ïa ki. Ngan ïathuh ïa ki ba ki long ki briew jong nga, bad kin phla ba nga long U Blei jong ki.”