SEKHARAÏAH 12 - Khasi CL Bible (BSI)

Ka jingpyllait ka ban sa wan ïa ka Jerusalem

¹ Kane ka dei ka khubor shaphang ka Israel na U Trai, U Trai uba la pyiar ïa ka suiñbneng, uba la thaw ïa ka pyrthei, bad uba la ai jingim ïa u briew. U ong,

² “Ngan pynlong ïa ka Jerusalem kum shi khuri ka waiñ; ki jaitbynriew sawdong jong ka kin dih bad ïaid sheng sheng kum ki rangbah kiba la buaid. Bad haba ki kerkut ïa ka Jerusalem, ïa kiwei ki nongbah kiba sah jong ka Judah ruh yn kerkut.

³ Hynrei haba kata ka por ka poi, ngan pynlong ïa ka Jerusalem kum u maw uba khia — kano kano ka jaitbynriew kaba pyrshang ban rah ïa ka kan mynsaw. Baroh ki jaitbynriew jong ka pyrthei kin ïasoh lang kum ka bor shipai ban tur ïaleh ïa ka.

⁴ Ha kata ka por ngan pynshyrkhei ïa ki kulai jong ki baroh bad ngan pynlong ïa ki nongshong jong ki baroh ban leh lamwir. Ngan khmih halor ki briew ka Judah, hynrei ngan pynmatlah ïa ki kulai jong ki nongshun jong ki.

⁵ Nangta ki kur jong ka Judah kin ong ha lade, ‘U Trai U Blei Badonbor Baroh u ai ka jingkhlaiñ ha ki briew jong u kiba shong basah ha Jerusalem.’

⁶ “Ha kata ka por ngan pynlong ïa ki kur ka Judah kum ka ding ha ka khlaw lane ha ka lyngkha kew ba la ih — kin pynjot ïa ki jaitbynriew kiba don sawdong. Ki briew ka Jerusalem kin ïaisah ha ka jingshngain ha ka nongbah.

⁷ “Ma nga, U Trai, ngan ai ka jingjop nyngkong ïa ki kynhun shipai jong ka Judah, khnang ba ka burom kaba ki khun ki ksiew jong u Dabid bad ki briew ka Jerusalem kin ïohpdiang kan ym long kaba khraw ban ïa kata kaba sah jong ka Judah.

⁸ Ha kata ka por U Trai un ïada ïa kito kiba shong basah ha Jerusalem, bad wat kiba tlot tam napdeng jong ki kin long kiba khlaiñ kumba long u Dabid. Ki khun ki ksiew jong u Dabid kin ïalam ïa ki kum u angel jong U Trai, kum U Blei hi da lade.

⁹ Ha kata ka por ngan pynjot ïa kawei pa kawei ka hima kaba pyrshang ban tur ïaleh ïa ka Jerusalem.

¹⁰ “Ngan pyndap ïa ki khun ki ksiew jong u Dabid bad ïa kiwei pat ki briew jong ka Jerusalem da ka mynsiem ka jingisynei bad ka mynsiem ka jingduwai. Kin ïakhmih ha uta ïa uba ki la dung pynïap, bad kin ïambriew na ka bynta jong u kum kito kiba ïambriew na ka bynta i khun marwei. Kin ïambriew kthang eh, kum kito kiba la duh noh ïa u khun nyngkong jong ki.

¹¹ Ha kata ka por ka jingïambriew ha Jerusalem kan long kaba khraw kum ka jingïambriew na ka bynta u Hadad Rimmon ha ki pyntha jong ka Megiddo.

^12-14 Kawei pa kawei ka longïing ha ka ri kan ïambriew da lade: Ka longïing kaba la hiarpateng na u Dabid, ka longïing kaba hiarpateng na u Nathan, ka longïing kaba hiarpateng na u Lebi, ka longïing kaba hiarpateng na u Shimei, bad baroh kiwei pat ki longïing. Kawei pa kawei ka longïing kan ïambriew da lade hi, bad ki rangbah jong kawei pa kawei ka longïing kin ïa-ïam briew la ka jong hi kaba ïapher na ki kynthei.