SEKHARAÏAH 11 - Khasi CL Bible (BSI)

Ka jingkyllon noh ki nongbanbor

¹ To plie ïa ki jingkhang jong pha, ko Lebanon, khnang ba ka ding kan thang duh ïa ki dieng Kedar jong pha!

² To ïam bad to ud, ko dieng Kseh-Sypress — ki Kedar ki la kyllon; ïa kito ki dieng badonburom la pynjot! To ïam bad to ud, ko ki dieng Sning jong ka Bashan — ïa ka khlaw kaba rben la khet noh!

³ Ki nongsynshar ki kyang jam ha ka jingsngewsih; ka burom jong ki ka la leit noh! To pynshahshkor ïa ka jingkyrhuh jong ki sing; ïa ka ïing khlaw jong ki ha shi lynter jong ka Jordan la pynjot.

Ki ar ngut ki nongaplangbrot

⁴ U Trai U Blei jong nga u la ong ha nga, “To leh ïa ka bynta jong u nongaplangbrot jong ka kynhun langbrot kaba dei ban shah shohdoh.

⁵ Ki trai jong ki, ki pynïap ïa ki bad ki lait na ka jingshah pynshitom. Ki die ïa ka doh bad ki ong, ‘To ïaroh ïa U Trai! Ngi la riewspah!’ Wat ki nongaplangbrot jong ki hi kim don jingisynei ïa ki.”

⁶ (U Trai u la ong, “Ngan ym isynei shuh ïano ïano ha ka pyrthei. Ma nga da lade ngan buh ïa ki briew baroh hapoh ka bor jong ki nongsynshar jong ki. Kine ki nongsynshar kin pynjot ïa ka pyrthei, bad ngan ym pyllait ïa ka na ka bor jong ki.”)

⁷ Kito kiba la thied bad die ïa ki langbrot ki la wai ïa nga, bad nga la long u nongaplangbrot jong ki langbrot kiba la dei ban shah shohdoh. Nga la shim ar tylli ki dieng: Ïa uwei nga la khot “U Jingsngewbha” bad ïa uwei pat “U Jingtylli.” Bad nga la sumar ïa ki langbrot.

⁸ Ngam lah shah shuh ïa ki lai ngut kiwei pat ki nongaplangbrot, kiba la isih ïa nga, bad nga la beh noh ïa ki baroh hapoh shi bnai.

⁹ Nangta nga la ong ha ka kynhun langbrot, “Ngan ym long shuh u nongaplangbrot jong phi. Ai kin ïap kito kiba dei ban ïap. Ai ba yn pynjot kito kiba dei ban shah pynjot. Kito kiba dang sah kin pynjot iwei ïa iwei pat.”

¹⁰ Nangta nga la shim ïa u dieng uba la khot “U Jingsngewbha” bad nga la kdiah ïa u, ban pyndam noh ïa ka jutang kaba U Trai u la pynlong bad ki jaitbynriew baroh.

¹¹ Kumta ïa ka jutang la pyndam noh ha kata ka sngi. Kito kiba la thied bad die ïa ki langbrot ki ap khmih ïa nga, bad ki tip ba U Trai u la kren lyngba kaei kaba nga la leh.

¹² Nga la ong ha ki, “Lada phi mon, to ai ïa ka bainong jong nga. Hynrei lada kam long kumta, to bat noh ïa ka.” Kumta ki la siew ïa nga laiphew tylli ki sbai rupa kum ka bainong jong nga.

¹³ U Trai u la ong ha nga, “Buh ïa ka ha ka jingkynshew jong ka Templ.” Kumta nga la shim ïa ki laiphew tylli ki sbai rupa — ka jingkheiñ kaba khraw kaba ki la pyrkhat ba nga la shongdor — bad buh ïa ka ha ka jingkynshew jong ka Templ.

¹⁴ Nangta nga la kdiah ïa u dieng uba ar, uta uba la khot “U Jingtylli,” bad ïa ka jingtylli jong ka Judah bad ka Israel la pynkhynñiuh.

¹⁵ Nangta U Trai u la ong ha nga, “Sa shisien pat to leh ïa ka bynta u nongaplangbrot, ha kane ka sien u bymmyntoi ei ei.

¹⁶ Nga la buh u nongaplangbrot ban khmih ïa ka kynhun langbrot jong nga, hynrei um shym la ïarap ïa ki langbrot kiba la shah byrngem da ka jingpynjot; lymne ba u leit wad ïa kaba la jah noh, lane pynkhiah ïa kito kiba la mynsaw, lane bsa ïa kiba khiah. Pynban u bam ïa ka doh jong ki langbrot kiba sngaid bad u weng noh ïa ki khnap jong ki.

¹⁷ Uta u nongaplangbrot u bymmyntoi ei ei u long uba la tim! U la iehnoh ïa la ka kynhun langbrot. Ka thma kan pynjot khoit ïa ka bor jong u. Ka kti jong u kan ïapstai bad ka khmat kamon jong u kan long kaba matlah.”