SEKHARAÏAH 10 - Khasi CL Bible (BSI)

U Trai u kular ïa ka jingpyllait

¹ To pan na U Trai ïa u slap ha ka pyrem jong ka snem. U dei U Trai uba phah ïa ki lyoh slap bad ïa u 'lap praw, da kaba pynjyrngam ïa ki lyngkha na ka bynta uwei pa uwei.

² Ki briew ki kylli ïa ki bleithaw bad ïa ki nongbatai kupar, hynrei ki jubab kiba ki ïoh ki long ki jinglamler bad ki bym don jingmut. Katto katne ki pyrshang ban batai ïa ki jingphohsniew, hynrei tang ban shu ïalam bakla ïa phi; ka jingpyntngen ba ki ai ka long ka bymmyntoi. Kumta ki briew ki sakma kylleng kum ka langbrot ba la jah. Ki don ha ka jingjynjar namar ba kim don u nongïalam.

³ U Trai u ong, “Nga bitar ïa kito ki nongwei kiba synshar ïa ki briew jong nga, bad ngan pynshitom ïa ki. Ki paid Judah ki long ki jong nga, bad ma nga, U Trai Badonbor Baroh, ngan sumar ïa ki. Kin long ki kulai thma badonbor jong nga.

⁴ Napdeng jong ki, kin wan ki nongsynshar, ki nongïalam, bad ki rangbah ai hukum ki ban synshar ïa ki briew jong nga.

⁵ Ki paid Judah kin jop kum ki shipai kiba kyrdem ïa ki nongshun jong ki ha ka ktieh jong ki lynti bah. Kin ïaleh namar U Trai u don bad ki, bad kin jop wat ïa ka kynhun shipai shong kulai jong u nongshun.

⁶ “Ngan pynkhlaiñ ïa ki paid Judah; ngan pyllait im ïa ki paid Israel. Ngan don ka jingsngewsynei ïa ki bad ngan wallam pat ïa ki baroh sha ïing. Kin long kum kiba ngam pat ju kyntait ïa ki. Nga long U Trai U Blei jong ki; ngan jubab ïa ki jingduwai jong ki.

⁷ Ki paid Israel kin long kiba khlaiñ kum ki shipai, kiba kmen kum ki rangbah kiba la dih waiñ. Ki khun ki ksiew jong ki kin kynmaw ïa kane ka jingjop bad kin kmen namar kaei kaba U Trai u la leh.

⁸ “Ngan khot ïa ki briew jong nga bad ngan lumlang ïa ki. Ngan pyllait im ïa ki bad pynlong ïa ki, kiba bun paid kumba ki ju long.

⁹ Wat la nga la pynsakma ïa ki hapdeng ki jaitbynriew, pynban ha ki jaka kiba jngai eh kin kynmaw ïa nga. Ma ki bad ki khun jong ki kin lait im bad kin wan phai lang sha ïing.

¹⁰ Na Ijipt bad na Assyria ngan wallam ïa ki sha ïing bad ngan pynshongduh ïa ki ha ka ri jong ki hi. Ngan pynshongduh ïa ki ha Gilead bad ha Lebanon kumjuh; ka ri baroh kawei kan dap da ki briew.

¹¹ Haba ki ïaid lyngba ïa ka duriaw ka jingjynjar jong ki, ma nga, U Trai, ngan shoh ïa ki jingat phyllung, bad ki jingjylliew jong ka Nile kin tyrkhong. Ïa ka Assyria kaba sarong yn pynpoh, bad ka Ijipt bakhlaiñbor kan duh noh ïa ka bor jong ka.

¹² Ngan pynkhlaiñ ïa ki briew jong nga; kin ïamane bad kohnguh ïa nga.” U Trai u la kren.