SEKHARAÏAH 1 - Khasi CL Bible (BSI)

U Trai u khot ïa ki briew jong u ban wan phai sha u

¹ Ha u bnai uba phra jong ka snem kaba ar kaba u Darius u long u patsha ka Persia, U Trai u la ai ïa kane ka khubor ha u Sekharaïah u nongïathuhlypa, u khun jong u Berekhaïah bad u ksiew jong u Iddo.

² U Trai Badonbor Baroh u la bthah ïa u Sekharaïah ban ong ha ki briew, “Ma nga, U Trai, nga la bitar shikatdei ïa ki kpa tymmen jong phi,

³ hynrei mynta nga ong ha phi, ‘To wan phai sha nga bad ngan wan phai sha phi.

⁴ Wat long kum ki kpa tymmen jong phi. La slem bah ki nongïathuhlypa ki la ai ha ki ïa ka khubor jong nga, da kaba ïathuh ha ki ban ym im bymman, ban ym im shuh ka jingim bapop. Hynrei kim shym la shahshkor ïa nga lane kohnguh ïa nga.

⁵ Ki kpa tymmen jong phi bad kito ki nongïathuhlypa kim don shuh.

⁶ Lyngba ki shakri jong nga ki nongïathuhlypa nga la ai ha ki kpa tymmen jong phi ïa ki hukum bad ki jingmaham, hynrei ki la kyntait ïa ki bad ki la shahshitom ïa kaba mih nangta. Nangta ki la kylla-kaba-mut bad ki la pdiang ba ma nga, U Trai Badonbor Baroh, nga la lah pynshitom ïa ki kumba ki dei ban shah bad kumba nga la kut jingmut ban leh.’ ”

Ka jingïohipaw jong u nongïathuhlypa ïa ki kulai

⁷ Ha ka snem kaba ar kaba u Darius u long u patsha, ha ka sngi kaba arphew saw jong u bnai uba khatwei (u bnai Shebat), U Trai u la ai ha nga ka khubor ha ka jingïohipaw ha ka por mynmiet.

⁸ Nga la ïohi ïa uwei u angel jong U Trai uba shong halor u kulai basaw. U la sangeh hapdeng katto katne tylli ki dieng Martl ha ka them, bad hadien jong u la don sa kiwei pat ki kulai — kiba saw, kiba thohbroin, bad kiba lieh.

⁹ Nga la kylli ïa u, “Ko rangbah, kine ki kulai ki mut aïu?” U la jubab “Ngan pyn-i ïa phi aïu ki kit jingmut.

¹⁰ U Trai u la phah ïa ki ban leit bad jurip ïa ka pyrthei.”

¹¹ Ki la wan ïathuh ha u angel: “Ngi la leit sha kylleng ka pyrthei bad ngi la shem ba ka pyrthei baroh kawei ka don hapdeng ka jingbymlah ban leh ei ei bad ha ka jingshah pyndem.”

¹² Nangta u angel u la ong, “A Trai Badonbor Baroh, me la bitar ïa ka Jerusalem bad ïa ki nongbah jong ka Judah haduh hynñiewphew snem mynta. Slem sa katno kan long ha shuwa ba men pyn-i ha ki ka jingisynei?”

¹³ U Trai u la jubab ïa u angel da ki kyntien pyntngen,

¹⁴ bad uta u angel u la bthah ïa nga ban pynbna ïa kaei kaba U Trai Badonbor Baroh u la lah ong: “Nga la don ka jingieit bajylliew bad jingsngewkhia ïa ka Jerusalem ka nongbah bakhuid jong nga,

¹⁵ bad nga bitar shikatdei eh ïa ki jaitbynriew kiba sngewkmen ïa ka jingjar jar bad ka jingsuk. Namar katba nga dang bat ïa ka jingbitar jong nga pyrshah ïa ki briew jong nga, kito ki jaitbynriew ki la kham pynsniew ïa ki jingshitom jong ki briew jong nga.

¹⁶ Kumta nga la wan phai pat sha Jerusalem ban pyn-i jingisynei ïa ka nongbah. Yn pynïeng pat ïa ka Templ jong nga, bad ïa ka nongbah yn tei pat.”

¹⁷ U angel u la bthah ruh ïa nga ban pynbna: “U Trai Badonbor Baroh u ong ba ki nongbah jong u kin manbha biang bad ba sa shisien pat un ïarap ïa ka Jerusalem bad kam ïa ka nongbah kum ka jong u hi.”

Ka jingïohipaw ïa ki reng

¹⁸ Ha kawei pat ka jingïohipaw nga la ïohi saw tylli ki reng masi dab.

¹⁹ Nga la kylli ïa u angel uba la lah kren ha nga, “Aïu kine ki reng ki kit jingmut?” U la jubab, “Ki ïeng na ka bynta ki bor pyrthei kiba la pynsakma ïa ki briew jong ka Judah, ka Israel, bad ka Jerusalem.”

²⁰ Nangta U Trai u la pyn-i ha nga saw ngut ki nongtrei kiba don bad ki tyrnem.

²¹ Nga la kylli, “Kine ki rangbah ki la ïawan ban leh aïu?” U la jubab, “Ki la ïawan ban pyntriem bad pynkyllon ïa ki hima kiba la pynlwet khoit ïa ka ri Judah bad pynsakma ïa ki briew jong ka.”