SALM 99 - Khasi CL Bible (BSI)U Blei u syiem Bahakhlieh Tam eh 1 U Trai u long u syiem, bad ki briew kin khynñiuh. U shong ha ka khet halor ki kherub, bad ka pyrthei kan khynñiuh. 2 U Trai u long uba khlaiñbor ha Seïon; U long uba hakhlieh tam halor ki jaitbynriew baroh. 3 Baroh kin ïaroh ïa ka kyrteng kaba khraw bad kaba kynja syiem jong u. Uba Khuid long ma u! 4 Ko Syiem bakhlaiñbor, me ieit ïa kaei kaba dei; me la pynskhem ïa ka jingbishar hok ha Israel; me la wanrah ïa ka hok bad ka jinglehhok. 5 To ïaroh ïa U Trai U Blei jong ngi; to mane ha khmat ka khet jong u! Uba Khuid long ma u! 6 U Moses bad u Aaron ki la long ki lyngdoh jong u, bad u Samuel u la long uwei uba la duwai ha u; kiba la khot kyrpad ïa U Trai, bad u la jubab ïa ki. 7 U la kren ha ki na u rishot lyoh; ki kohnguh ïa ki aiñ bad ki hukum ba u la ai ha ki. 8 A Trai, U Blei jong ngi, me la jubab ïa la ki briew; me la pyn-i ïa ki ba me long U Blei uba map ei, wat la me pynshitom ïa ki namar ki pop jong ki. 9 To ïaroh ïa U Trai U Blei jong ngi, bad to mane ha u lum bakyntang jong u! U Trai U Blei jong ngi u long uba khuid. |
Khasi CL Bible
Copyright © Bible Society of India, 2016.
Used by permission. All rights reserved worldwide.
Bible Society of India