SALM 98 - Khasi CL Bible (BSI)

U Blei u nongsynshar jong ka pyrthei

¹ To rwai ha U Trai ïa ka jingrwai bathymmai; u la leh ïa kiei kiei kiba phylla! Da ka bor jong u hi bad ka jingkhlaiñ bakhuid u la ïoh ïa ka jingjop.

² U Trai u la pynbna ïa ka jingjop jong u, u la pynlong ïa ka bor bapynim jong u ba yn tip ha ki jaitbynriew.

³ U bat ïa la ka kular ha ki paid Israel da ka jingïaineh bad jingieit baneh ïa ki. Ki briew baroh kiba don sawdong ki la ïohi ïa ka jingjop U Blei jong ngi.

⁴ To ïarwai da ka jingkmen ha U Trai, phi ka pyrthei baroh; to ïaroh ïa u da ki jingrwai bad ki jingrisa ka jingkmen!

⁵ To rwai ki jingïaroh ha U Trai! To tem ïa ki sur ha ki duitara!

⁶ To put ïa ki turoi bad ki ronsing, bad to risa da ka jingkmen ha U Trai, u syiem jong ngi.

⁷ To kyrhuh, ko ka duriaw, bad ki jingthaw baroh kiba don ha pha; rwai, ko ka pyrthei, bad baroh kiba shong ha pha!

⁸ To thab ïa la ki kti, ko ki wah; ko ki lum, to rwai lang da kaba kmen ha khmat U Trai,

⁹ namar u wan ban synshar ïa ka pyrthei. Un synshar ïa ki jaitbynriew ka pyrthei da ka hok bad ka jinglehhok.