SALM 97 - Khasi CL Bible (BSI)

U Blei u nongsynshar Bahakhlieh Tam

¹ U Trai u long u syiem! Ko pyrthei, to lehkmen! To shadkmen, ko ki dewlynnong ha ki duriaw!

² Ki lyoh bad ka jingdum ki ker sawdong ïa u; u synshar da ka hok bad ka jingbishar hok.

³ Ka ding ka ïaid ha shuwa jong u bad ka thang ïa ki nongshun kiba don sawdong jong u.

⁴ Ka leilieh jong u ka pynshai ïa ka pyrthei; ka khyndew ka ïohi ïa ka bad ka khynñiuh.

⁵ Ki lum ki um noh kum ka bthing ha khmat U Trai, ha khmat U Trai jong ka khyndew baroh.

⁶ Ki bneng ki pynbna ïa ka hok jong u, bad ki jaitbynriew baroh ki ïohi ïa ka burom jong u.

⁷ Baroh kiba mane bleithaw kin shah pynlehrain, baroh ki blei ki dem ngon ha khmat jong U Trai.

⁸ Ki briew ka Seïon ki lehkmen, bad ki nongbah ka Judah ki shadkmen namar ki jingbishar jong me, A Trai.

⁹ A Trai Badonbor Baroh, me long u nongsynshar ha ka pyrthei baroh; me kham khraw palat ban ïa ki blei baroh.

¹⁰ U Trai u ieit ïa kito kiba isih ïa kaba sniew; u ïada ïa ka jingim jong ki briew jong u; u pyllait im ïa ki na ka bor jong ki bymman.

¹¹ Ka jingshai ka tyngshaiñ ha kiba hok, bad ka jingkmen ha kiba bha.

¹² Ko phi kiba hok baroh to lehkmen namar kaei kaba U Trai u la leh! To kynmaw ïa kaei kaba U Blei uba khuid u la leh, bad to ainguh ïa u.