SALM 96 - Khasi CL Bible (BSI)

U Blei u syiem uba hakhlieh tam

¹ To rwai ha U Trai ïa ka jingrwai bathymmai! To rwai ha U Trai, ko phi ka pyrthei baroh!

² To rwai ha U Trai, bad to ïaroh ïa u! Pynbna man ka sngi ïa khubor babha ba u la pynim ïa ngi.

³ Pynbna ïa ka burom jong u sha ki hima, ïa ki kam radbah jong u sha ki jaitbynriew baroh.

⁴ U Trai u long uba khraw bad uba dei eh ban ïaroh; u long uba dei ban shah pyndonburom kham palat ïa ki blei baroh.

⁵ Ki blei jong kiwei pat ki jaitbynriew baroh ki long tang ki bleithaw; hynrei U Trai u la thaw ïa ki bneng.

⁶ Ka burom bad ka main longsyiem ki ker sawdong ïa u; ka bor bad ka jingitynnat ki pyndap ïa ka Templ jong u.

⁷ To ïaroh ïa U Trai, phi ki jaitbynriew baroh ha ka pyrthei; ïaroh ïa ka burom bad ka jingkhlaiñbor jong u.

⁸ To ïaroh ïa ka kyrteng badonburom jong U Trai; to wanrah ïa ka jingainguh bad wan sha ka Templ jong u.

⁹ Dem ngon ha khmat uta Uba Khuid haba u wanpaw; to khynñiuh ha khmat jong u, phi ka pyrthei baroh!

¹⁰ To ong ha ki jaitbynriew baroh, “U Trai u long u syiem! Ïa ka pyrthei la pynshong skhem ha la ka jaka bad ym lah ban pynkhih; un bishar ïa ki jaitbynriew da ka hok.”

¹¹ To lehkmen, ko ka khyndew bad ka sahit bneng! To kyrhuh, ko ka duriaw bad baroh ki jingthaw ba don ha pha;

¹² to lehkmen ko ki lyngkha bad baroh kiei kiei kiba don ha pha! Ki dieng ha ki khlaw kin risa da ka jingkmen,

¹³ haba U Trai un wan ban synshar ïa ka pyrthei. Un synshar ïa ki jaitbynriew jong ka pyrthei da ka hok bad ka jinglehhok.