SALM 94 - Khasi CL Bible (BSI)

U Blei u nongbishar ïa baroh

¹ A Trai, me long U Blei uba pynshitom; to pynpaw ïa ka jingbitar jong me!

² Me long u nongbishar ïa ki briew baroh; A to ïeng bad ai ha kiba sarong ïa kaei kaba ki dei hok ban ïoh!

³ Slem haduh katno ki bymman kin ïalehkmen? Slem haduh katno, A Trai?

⁴ Slem haduh katno ki riewrunar kin leh sarong bad kob shaphang ki kam runar jong ki?

⁵ Ki pynlwet ïa ki briew jong me, A Trai; ki banbeiñ ïa kito kiba long ki jong me.

⁶ Ki pynïap ïa ki riewkynthei bad ïa ki khunswet, bad shoh pynïap ïa u nongwei uba shong ha ka ri jong ngi.

⁷ Ki ong, “U Trai um ym ïohi ïa ngi; U Blei ki Israel um ithuh ei ei.”

⁸ Ko ki briew jong nga, kumno phi lah ban long kiba bieit mutlop sat? Lano phin nang ïa kane?

⁹ U Blei u la thaw ïa ki shkor jong ngi — hato un ym ïohsngew? U la thaw ïa ki khmat jong ngi — hato un ym ïohi?

¹⁰ U mai ïa ki jaitbynriew — hato un ym pynshitom ïa ki? U long u nonghikai jong ngi baroh — hato un ym don jingtip ei ei?

¹¹ U Trai u tip ïa kaei kaba ki pyrkhat; u tip katno ki long ki bymshemphang ha kaba pynshong nongrim.

¹² A Trai, katno suk long u briew uba me hikai, uta ha uba me hikai ïa ka aiñ jong me!

¹³ Me ai ha u ïa ka jingjahthait na ki sngi ka jingjynjar haduh ban da tih ïa ka tliew ban ngat u bymman.

¹⁴ U Trai un ym iehnoh ïa la ki briew; bad un ym iehnoh ïa kito kiba long ki jong u.

¹⁵ Ka jingbishar hok kan wan biang ha ki ïingbishar, bad baroh ki briew kiba hok kin kyrshan ïa ka.

¹⁶ Uei uba ïeng na ka bynta jong nga pyrshah ïa ki bymman? Uei uba don ha ka liang jong nga pyrshah ïa ki nongleh sniew?

¹⁷ Lada U Trai um shym la ïarap ïa nga, ngan jin da la leit kloi sha ka ri kaba jar jar.

¹⁸ Nga la ong, “Nga la kyllon noh”; hynrei ka jingieit baneh jong me, A Trai, ka batskhem ïa nga.

¹⁹ Haba nga lyng-a bad khuslai, me pyntngen bad pynkmen ïa nga.

²⁰ Mem don ei ei ban leh ïa ki nongsynshar bymhok, kiba pynlong ïa ka jingbymhok ban ksan,

²¹ kiba ïasylla lang pyrshah ïa ki briew kiba bha bad rai pynrem ïa kiba lui lui sha ka jingïap.

²² Hynrei U Trai u kyrshan ïa nga; U Blei jong nga u ïada ïa nga.

²³ Un pynshitom ïa ki namar ki kam bymman jong ki bad un pynjot ïa ki namar ki pop jong ki; U Trai U Blei jong ngi un pynjot ïa ki.