SALM 92 - Khasi CL Bible (BSI)

Ka jingrwai ïaroh

¹ Katno ka long kaba bha ban ainguh ïa me, A Trai, ban rwai ha ka burom jong me, A me Uba Hakhlieh Tam Eh;

² ban pynbna ïa ka jingieit baneh jong me man ka step, bad ïa ka jinglong baïaineh jong me man ka miet,

³ ha ka sur jong ki jingtem ksai bad ha ka jingkyn-ud ka duitara.

⁴ Ki kam kiba donbor jong me, A Trai, ki pynkmen ïa nga; namar ïa kaei kaba me la leh, nga rwai da kaba kmen.

⁵ Katno kaba khraw long ki jingleh jong me, A Trai! Katno kaba jylliew long ki jingmut jong me!

⁶ Kane ka dei kaei kaei kaba uba bieit um lah ban tip; u briew uba mutlop um lah ban sngewthuh:

⁷ ki bymman ki lah ban mih kum ki ñiut, kito kiba leh bakla ki lah ban manbha, pynban kin sa shah pynjot thiaw,

⁸ namar ma me, A Trai, me long uba hakhlieh tam junom.

⁹ Ngi tip ba ki nongshun jong me kin ïap, bad ki bymman baroh kin shahjop.

¹⁰ Me la pynlong ïa nga uba khlaiñ kum u masi prut; me la kyrkhu ïa nga da ka jingsuk.

¹¹ Nga la ïohi ïa ka jingshahjop ki nongshun jong nga bad nga la ïohsngew ïa ka jinglynñiar ki bymman.

¹² Kiba hok kin roi kum ki dieng Tlai; kin san kum ki dieng Kedar ka Lebanon.

¹³ Ki long kum ki dieng ba la thung ha ka ïing jong U Trai, kiba roi ha ka Templ jong U Blei jong ngi,

¹⁴ kiba dang seisoh haba ki la tymmen ruh bad ki ïai jyrngam bad khlaiñ.

¹⁵ Kane ka pyn-i ba U Trai u long uba hok, bad ym don jingbakla ha u nongïada jong nga.