SALM 91 - Khasi CL Bible (BSI)

U Blei u nongïada jong ngi

¹ Uno uno uba leit sha U Trai ban ïoh jingïada, uno uno uba ïaisah hapoh ka jingkah jong U Badonbor Baroh,

² u lah ban ong ha u, “Me long u nongkyrshan bad nongïada jong nga, me long U Blei jong nga; ha me nga shaniah.”

³ Un ri sumar ïa me na ki jingma barieh baroh bad na ki jingpang bashyrkhei baroh.

⁴ Un tap ïa me da ki thapniang jong u; men long shngain hapoh ka jingsumar jong u; ka jinglong baïaineh jong u kan ïada bad kyrshan ïa me.

⁵ Men ym sheptieng na ki jingma mynmiet ne na ki jingtur ïaleh ha ka por mynsngi,

⁶ ne ïa ki khlam kiba shoh ha kaba dum, ne ïa ki jingsniew kiba pynïap haba shai ka sngi.

⁷ Ha syndah jong me shihajar ngut ki lah ban kyllon, shiphew hajar ngut ha baroh sawdong jong me, hynrei men ym shah pynmynsaw.

⁸ Men shu peit bad men ïohi kumno ki bymman ki shah pynshitom.

⁹ Me la pynlong ïa U Trai u nongkyrshan jong me, ïa U Bahakhlieh Tam u nongïada jong me,

¹⁰ bad kumta ka jingpynjot kan ym shoh ïa me, ka jingleh jubor kan ym wan hajan ka ïing jong me.

¹¹ U Blei un buh ïa ki angel ban khmih halor jong me ban ïada ïa me shano shano ba me leit.

¹² Kin rah ïa me ha ki kti jong ki, ban ri ïa me na ka jingjynthut jong ki kjat jong me ha ki maw.

¹³ Men ïuhroit halor ki sing bad ki bseiñ, ïa ki sing ba-itriem bad ïa ki 'seiñpuh.

¹⁴ U Blei u ong, “Ngan pynim ïa kito kiba ieit ïa nga, bad ngan ïada ïa kito kiba ithuh ïa nga kum U Trai.

¹⁵ Haba ki khot ïa nga, ngan jubab ïa ki; haba ki don ha ka jingjynjar, ngan long ryngkat bad ki. Ngan pyllait im ïa ki bad ngan pyndonburom ïa ki.

¹⁶ Ngan ainong ïa ki da kaba pynslem ïa ka rta jong ki, ngan pynim ïa ki.”