SALM 9 - Khasi CL Bible (BSI)

Ka jingainguh ïa U Blei namar ka jingbishar hok jong u

¹ Ngan ïaroh ïa me, A Trai da ka dohnud jong nga baroh; ngan ïathuh ïa ki kamphylla jong me baroh kiba me la leh.

² Ngan rwai da ka jingkmen namar jong me, ngan rwai ka jingïaroh ïa me, ko Blei Badonbor Baroh.

³ Ki nongshun jong nga ki phai dien haba me mihpaw; ki kyllon bad ki ïap.

⁴ Me long uba beit bad uba hok ha ki jingbishar jong me, bad me la bishar ha ka jingsngewlem ïa nga.

⁵ Me la pynrem ïa ki bymngeit blei, bad me la pynjot ïa ki bymman; yn ym kynmaw shuh ïa ki.

⁶ Ïa ki nongshun jong ngi la pynduh thiaw junom; me la pynjot thiaw ïa ki nongbah jong ki, bad ym don ba kynmaw shuh ïa ki.

⁷ Hynrei U Trai u long u syiem junom; u la buh ïa ka khet jong u na ka bynta ka jingbishar;

⁸ U synshar ïa ka pyrthei da ka hok; u bishar da ka jinglehhok ïa ki jaitbynriew.

⁹ U Trai u long ka jakarieh ïa kiba shah banbeiñ, ka jaka bashngain ha ki por jynjar.

¹⁰ Kito kiba ithuh ïa me, A Trai, kin shaniah ha me, mem ju iehnoh ïano ïano ba wan sha me.

¹¹ To rwai ka jingïaroh ïa U Trai uba synshar ha Seïon! Ïathuh ha kawei pa kawei ka jaitbynriew ïa ki kam kiba u la leh!

¹² U Blei u kynmaw ïa kito kiba shahshitom; um ju klet ïa ka jingkyang jong ki, bad u pynshitom ïa kito kiba leh bymdei ïa ki.

¹³ To isynei ïa nga, A Trai! Peit ïa ki jingshah shitom ba ki nongshun jong nga ki pynlong ïa nga! To pyllait ïa nga na ka jingïap, A Trai,

¹⁴ ba nga lah ban ïeng ha khmat ki briew ka Jerusalem bad ïathuh ha ki ïa kiei kiei baroh kaba na ka bynta jong ki nga ïaroh ïa me. Ngan shadkmen namar me la pynim ïa nga.

¹⁵ Kiba mane blei thala ki la tih ïa ka thliew bad ki la hap hapoh jong ka; ki la ngat ha la ki jingriam jong ki hi.

¹⁶ U Trai u la pynpaw ïa lade da ki jingbishar bahok; bad ïa ki bymman la riam da ki kam jong ki hi.

¹⁷ Ka jingïap ka dei ka jingkut jong ki bymman baroh, jong kito baroh kiba kyntait ïa U Blei.

¹⁸ Kiba kyrduh kin ym ïailong kiba la klet noh; ïa ka jingkyrmen kiba duk yn ym pynduh junom.

¹⁹ To wan, A Trai! Wat ai ba ki briew kin kyntait ïa me! Wallam ïa ki bymngeit blei ha khmat jong me bad pynbna ïa ka jingbishar halor jong ki.

²⁰ Pynlong ïa ki ban sheptieng, A Trai! pynlong ïa ki ban tip ba ki dei tang ki briew.