SALM 89 - Khasi CL Bible (BSI)

Ka jingrwai ha ka por shem jynjar ka jaitbynriew

¹ A Trai, ngan ïai rwai ïa ka jingieit baneh jong me; ngan pynbna ïa ka jingïaineh jong me junom.

² Nga tip ba ka jingieit jong me kan neh ha ki por baroh, ba ka jingïaineh jong me ka long kaba neh skhem kum ka sahit bneng.

³ Me la ong, “Nga la pynlong ka jutang bad u briew uba nga la jied, nga la kular ha u Dabid u shakri jong nga,

⁴ ‘U khun u ksiew jong me un ïailong u syiem, ngan buh kyrpang ïa ka longïing syiem jong me junom.’ ”

⁵ Ki bneng ki rwai ïa kiei kiei kiba phylla kiba me leh, kiba khuid ki rwai ïa ka jingïaineh jong me, A Trai.

⁶ Ym don ha bneng u ba kum ma me, A Trai; ym don ki jingthaw ha bneng uba long mar ryngkat bad me.

⁷ Ïa me la sheptieng ha ka jingïalang jong kiba khuid, bad baroh na ki, ki ïeng ha ka jingtiengburom ïa me.

⁸ A Trai U Blei Badonbor Baroh, ym don uba khlaiñbor kum ma me, ha kiei kiei baroh me long uba ïaineh, A Trai.

⁹ Me synshar halor ka duriaw badonbor; me pynjai jai ïa ki jingat phyllung ba khih bitar.

¹⁰ Me la pynlwet ïa u Rahab, u mrad kynsha bad me pynïap ïa u; me pynher krad ïa ki nongshun jong me da ka jingkhlaiñbor jong me, me jop ïa ki nongshun jong me.

¹¹ Ka bneng ka long ka jong me, ka khyndew ruh; me la thaw ïa ka pyrthei bad baroh kiba don ha ka.

¹² Me la thaw ïa ka shatei bad ka shathie; u lum Tabor bad u lum Hermon ki rwai ïa me da ka jingkmen.

¹³ A katno uba donbor me long! A katno kaba khraw ka long ka jingkhlaiñ jong me!

¹⁴ Ïa ka hima jong me la seng nongrim ha ka hok bad ka jingbishar hok; ka jingieit bad ka jingïaineh ki paw ha ki kam jong me baroh.

¹⁵ A katno suk ki long ki briew kiba mane ïa me da ki jingrwai, kiba im ha ka jingshai jong ka jingbhasbun jong me!

¹⁶ Namar jong me ki shadkmen baroh shi sngi, bad ki ïaroh ïa me ïa ka jingbha jong me.

¹⁷ Me ai ki jingjop bakhraw ïa ngi; ha ka jingieit jong me, me pynlong ïa ngi ban leh risa.

¹⁸ Ma me, A Trai, me la jied ïa u nongïada jong ngi; ma me, U Blei Uba Khuid jong ki Israel, me la ai ha ngi ïa u syiem jong ngi.

Ka jingkular U Blei ha u Dabid

¹⁹ Ha ka jingïohipaw la slem bah me la ong ha ki shakri baïaineh jong me, “Nga la ai ïa ka jingïarap ha u shipai uba pawnam, nga la ai ïa ka khet ha uwei uba la jied na ki briew.

²⁰ Nga la pynlong ïa u Dabid u shakri jong nga ban long syiem, da kaba pynsleh ïa u da ka umphniang bakhuid.

²¹ Ka jingkhlaiñ jong nga kan ïai don sah bad u, ka bor jong nga kan pynkhlaiñ ïa u.

²² Ki nongshun kin ym jop pyrshah ïa u, ki bymman kin ym lah ban jop ïa u.

²³ Ngan pynlwet ïa ki nongshun jong u bad ngan pynïap ïa baroh kiba shun ïa u.

²⁴ Ngan ieit ïa u bad ngan ïaineh bad u, ngan pynlong ïa u, uba jop borabor.

²⁵ Ngan pynïar ïa ka hima jong u naduh ka duriaw Mediterranian haduh ka wah Ïuphratis.

²⁶ Un sa ong ha nga, ‘Me long U Kpa jong nga bad U Blei jong nga, me long u nongïada bad u nongpynim jong nga.’

²⁷ Ngan pynlong ïa u, u khun phrangsngi jong nga, uba khraw tam na ki syiem baroh.

²⁸ Ngan ïai bat ïa ka kular jong nga bad u, bad ka jutang jong nga bad u kan neh junom.

²⁹ Ka longïing syiem jong u kan neh skhem kum ka sahit bneng, uba hiarpateng na u, un ïailong u syiem.

³⁰ “Hynrei lada ki khun ki ksiew jong u kim kohnguh ïa ka aiñ jong nga, bad kim im kat kum ki hukum jong nga,

³¹ lada kim suidñiew ïa ki jinghikai jong nga bad kim sumar ïa ki hukum jong nga,

³² Te ngan pynshitom ïa ki na ka bynta ki pop jong ki, ngan pynlong ïa ki ban jynjar na ka bynta ki jingbakla jong ki.

³³ Hynrei ngan ym sangeh ha kaba ieit ïa u Dabid, lane ban ym pynkheiñ ïa ka kular jong nga bad u.

³⁴ Ngan ym pynkheiñ ïa ka jutang jong nga bad u, lane shim noh ïa kawei ka kular kaba nga pynlong bad u.

³⁵ “Shisien shi junom nga la kular da ka kyrteng bakhuid jong nga: ngan ym lamler satia ïa u Dabid.

³⁶ Un ïai don ki nonghiarpateng, bad ngan ap phira ïa ka hima jong u. Katba ka sngi ka dang tyngshaiñ

³⁷ kan neh skhem kum u bnai, u ban sakhi hok ha ka sahit bneng.”

Ka jingïam sngewsih halor ka jingshahjop u syiem

³⁸ Hynrei me la bitar ïa u syiem uba la jied jong me, me la iehnoh bad kyntait ïa u.

³⁹ Me la pynkheiñ ïa ka jutang jong me bad la u shakri; me la bret ïa ka pansngiat jong u ha ka ktieh.

⁴⁰ Me la pyntwa ïa ki kynroh ka nongbah jong u; bad me la iehnoh ïa ki kut jong u ha ki jingjot jingpra.

⁴¹ Baroh kiba ïaid lynti ki lute ïa ki jingdon jingem jong u; baroh ki paramarjan jong u ki rkhiebeiñ ïa u.

⁴² Me la ai ïa ka jingjop ha ki nongshun jong u; me la pynlong ïa ki baroh kiba kmen.

⁴³ Me la pynlong ïa ki tiar ïapom jong u ki bymmyntoi, bad me la shah ïa u ban shahjop ha ka thma.

⁴⁴ Me la knieh noh na u ïa u diengsynshar syiem jong u, bad me la bret ïa ka khet jong u ha madan.

⁴⁵ Me la pynlong tymmen ïa u ha shuwa ka por jong u; bad me la tap ïa u da ka jingjahburom.

Ka jingduwai na ka bynta ka jingpyllait

⁴⁶ A Trai, hato men shu buhrieh ïa lade junom? Sa katno ka jingbitar jong me kan pluh kum ka ding?

⁴⁷ A to kynmaw katno kaba lyngkot ka jingim jong nga; to kynmaw ba me la thaw ïa ngi baroh kiba dei ban ïap!

⁴⁸ Uei uba lah ban im bad u bymïap shuh? Kumno u briew uba lah ban pyllait ïa lade na ka jingtep?

⁴⁹ A Trai, hangno keiñ ki jingpynshisha kiba mynshuwa jong ka jingieit jong me? Hangno kita ki jingkular kiba me la pynlong bad u Dabid?

⁵⁰ Wat klet kumno ma nga, u shakri jong me, nga la shah krenbeiñ; kumno nga ïaishah ïa baroh ki jingtim jong ki nongmane bleithaw.

⁵¹ Ki nongshun jong me ki krenbeiñ ïa u syiem ba me la jied, A Trai, ki krenbeiñ ïa u kat shaba u leit.

⁵² A to ïaroh ïa U Trai junom! Amen! Amen!