SALM 87 - Khasi CL Bible (BSI)

Ha kaba ïaroh ïa ka Jerusalem

¹ U Trai u tei ïa ka nongbah jong u halor u lum bakyntang,

² u kham ieit ïa ka nongbah Jerusalem ban ïa kiwei pat ki jaka ha Israel.

³ To shahshkor, ko nongbah U Blei, ïa kiei kiei kiba phylla ba u ïathuh shaphang jong pha:

⁴ “Ngan kynthup ïa ka Ijipt bad ka Babilonia; haba ngan ñiew ïa ki jaitbynriew kiba kohnguh ïa nga; ngan kheiñ napdeng ki nongshong shnong ka Jerusalem ïa ki briew ka Philistia, ka Tyros bad ka Sudan.”

⁵ Ïa ka Seïon yn sa ong ba baroh ki jaitbynriew ki dei hangta bad u Badonbor Baroh un pynlong ïa ka kaba khlaiñ.

⁶ U Trai un thoh ïa ka thup kyrteng ïa ki kynja bynriew, bad yn kynthup ïa ki baroh kum ki traishnong ka Jerusalem.

⁷ Ki shad bad ki rwai, “Ha ka Seïon ka don ka tyllong jong ki jingkyrkhu jong ngi baroh.”